Шороотой “бөх” ч гавьдаггүй л юм, угтаа. УИХ-ын сонгуульд өрсөлдөх нэр дэвшигчдийн нэр тодорсон өдрөөс хэл ам дагуулж, хэрүүл тэмцлийн бай болж байгаа хэд хэдэн улстөрч байна. Үүний нэг Орхон, Булган, Хөвсгөлийн тойрогт АН-аас нэр дэвшиж буй Дорлигийн Өсөхбаяр.

Орхон аймгийн МоАХ-ын тэргүүн Д.Өсөхбаяр энэ өдрүүдэд хамгийн хударгагүй нэгнээр тодроод байна. Тэр мэдээлэлд ойр байдлаа ашиглаж, журмын нөхрөө хуурч, нэр дэвшихээр болсон гэх мэдээлэл цахим сүлжээнд хөвөрч байна. Энэ хууралт, эрх мэдлээ урвуулан ашиглалт нь ганц удаагийнх биш, өнгөрсөн сонгуулиар ч давтагдсан гэнэ. Өөрөөр хэлбэл, Дорлигийн Өсөхбаяр гэх луу унжсан, хууралтын мастер нэр дэвшиж байна гэсэн үг л дээ.

      Аав нь Булган аймгийн Сайхан сумын уугуул, ээж нь Хөвсгөл аймгийн Ренчинлхүмбэ сумын уугуул. Д.Өсөхбаяр өөрөө Дархан хотод төрж, Эрдэнэт хотод өссөн. Цахилгаанчин мэргэжилтэй, “Эрдэнэт үйлдвэр”-т цахилгаанчнаар ажиллаж байгаад 2000 онд “Орхон чандмань” ХХК-ийг байгуулж, тус компаниараа дамжуулан хадам аав С.Мишигийнхээ Эрдэнэт хот дахь "Чандмань” худалдааны төвийг удирдаж эхэлснээр анх бизнест орсон. Түүнээс хойш Д.Өсөхбаяр “Чандмань” худалдааны төвөөсөө гадна “Гурван од” төв, “Дэлгэрэх” төв, “Тэмүүлэл” төв гэх мэт Эрдэнэт хотын бүх л том худалдаа, үйлчилгээний төвүүдийг эзэмшиж, удирдаж ирсэн. Мөн Д.Өсөхбаярын “Орхон чандмань” ХХК нь Эрдэнэт хотын болон “Эрдэнэт үйлдвэр”-ийн барилгын тендерүүдийг “түүдэг”. Жишээ нь, Эрдэнэт хотын орон сууцны хорооллууд дундах амрах, нарлах, тоглох талбайнуудыг Д.Өсөхбаярын “Орхон чандмань” ХХК нь төсвийн хөрөнгөөр гүйцэтгэж байв.

       Д.Өсөхбаярын улс төрийн уяа сойлгыг Х.Баттулга тааруулдаг. Тодруулбал, Д.Өсөхбаяр жүдо, самбо бөхийн тамирчин байсан бөгөөд Монголын жүдо бөхийн холбооны дэд ерөнхийлөгч, Орхон аймгийн Жудо бөхийн холбооны тэргүүнээр ажиллаж ирсэн. Өөрөөр хэлбэл, Х.Баттулгатай бөхөөр дотноссон нэгэн. Тиймдээ ч Х.Баттулгыг Ерөнхийлөгч байх үед нь Зөвлөхөөр ажиллаж байсан. Мөн Х.Баттулгын МоАХ-ны харьяа Орхон аймгийн МоАХ-ны тэргүүнээр нь ажилладаг.

 Улмаар 2020 оны УИХ-ын сонгуульд Х.Баттулгын дэмжлэгтэйгээр Булган аймагт нэр дэвшсэн ч Ц.Анандбазар, Ж.Бат-Эрдэнэ хоёрт ялагдсан. Гэсэн ч хоосон хоцроогүй, 2020 оны орон нутгийн сонгуульд нэр дэвшиж, Орхон аймгийн ИТХ-ын төлөөлөгчөөр сонгогдсон. Өдгөө даагаа нэхэхээр дахин горилж буй.

Д.Өсөхбаярыг шороотой “бөх” гэж нэрлэсний учрыг энд хүргэе.

         Түүний нэр дэвшиж байгаа тойрогт Б.Мягмарсүрэн гэх залуу горилж байжээ. Хурлаараа ч түүний дэмжиж, дэвшүүлэхээр болоод байсан гэнэ. Хачирхалтай нь, Д.Өсөхбаяр Х.Баттулгын хүн гэдгээрээ Б.Мягмарсүрэнг “мөргөж” оронд нэр дэвшихээр болсон аж. Энэ талаар Б.Мягмарсүрэн цахим хуудастаа бичиж, Д.Өсөхбаярыг шүүхэд өгөхөө мэдэгдээд байсан.

      Тодруулбал, Б.Мягмарсүрэн “Миний хувьд 2024 оны УИХ-ын сонгуулийн IV тойрог буюу Орхон, Булган, Хөвсгөл аймгийг хамарсан Хойд бүс нутагт АН-аас нэр дэвшин өрсөлдөхөөр бэлтгэлээ хангаж байсан юм. Тавдугаар сарын 20-нд хуралдсан АН-ын Үндэсний бодлогын хорооны /ҮБХ/ хурлаар намын дарга Л. Гантөмөр сонгуулийн тойрог бүрээр нэг бүрчлэн нэр дэвшигчдээ танилцуулж, санал хураалгаж баталгаажуулсан. УИХ-ын сонгуулийн IV тойрогт Б. Мягмарсүрэн миний нэрийг мөн бусад долоон нэр дэвшигчийн нэрийг уншиж сонсгон, санал хурааж тогтоолоор баталсан юм.Гэтэл тухайн өдрийн ҮБХ-ны хурлаар батлагдсан нэрс дотроос 00.00 цагаас хойш миний нэрийг хасаж Д.Өсөхбаярын нэрийг сольж оруулсан хууль бус үйлдэл болсон байна. Түүний нэр нь АН-ын Нэр дэвшигчийг сонгон шалгаруулах хороо болон ҮБХ-ны хурлаар дэмжигдээгүй юм. Иймд хууль, дүрэм журмыг уландаа гишгэж байгаа шударга бус үйлдлийг эсэргүүцэж байгаагаа өөрийн цахим хаягаар дамжуулан олон нийтэд мэдээлэл хүргэж байгаа юм. Би энэ сонгуульд нэр дэвшихгүй байсан ч болно. Гэвч энэ мэт хууль зөрчсөн үйлдлийг үл тоож орхиж гэмээнэ цаашдаа улс оронд, улс төрийн намуудад буруу жишиг тогтож олон шударга залуусын ирээдүйг хулгайлах нөхцөл үүснэИймд АН-аас тойрогт нэр дэвшигчдийн нэрсийн жагсаалтанд хуулв зөрчин нэрээ сэм шургуулсан Д.Өсөхбаярын хууль бус үйлдлийг шалгуулж, нэрийг нь татуулах хүртэл хариуцлага тооцуулахаар СEХ-нд баримт нотолгоо бүхий гомдол хүргүүллээ. Цаашлаад шаардлагатай бол шат шатны Шүүхийн байгууллагад хандаж хуулийн зөрчлийг арилгуулж, хариуцлага тооцох хүртэл нь тэмцэх болно” гэжээ.

Өөрийн гэсэн өнгөгүй, тодорхойлолтгүй, хадам ааваараа бизнест, Х.Баттулгаар улс төрд хөтлүүлж, намын хамтрагчаа тонгорсон Д.Өсөхбаяр төрд хэрэггүй нь тодорхой харагдаж байгаа биз ээ.