Ашигт малтмалын лиценз"-тэй холбоотой нотлох баримтыг шинжлэн судлах сонсгол үргэлжилж байна.

        Эхний сэдэв болох Ашигт малтмалын олголт, бүртгэл сэдвээр нийт 16 гэрчийг сонсголд дуудсан. "Алтайн хар азарга" ХХК-ийн хувьцаа эзэмшигч М.Өлзийбат, "Алтан тоонот өргөө" ХХК-ийн хувьцаа эзэмшигч Л.Алтанцэнгэл, "Алтан тоонот өргөө" ХХК-ийн хуульч Ганбаатар, "Хургатай хайрхан" ХХК-ийн эзэмшигч Ц.Цэрэнпунцаг, тус компанийн уурхайн инженер Ж.Сэргэлэн, "Эрдэнэс Баянбогд" ХХК-ийн гүйцэтгэх захирал Ц.Отгонтамир, тус компанийн үйл ажиллагаа хариуцсан захирал Г.Жавхлантөр зэрэг гэрчүүд оролцож байна. Зарим гэрчийн хувьд эрүүл мэндийн шалтгааны улмаас сонсголд оролцох боломжгүй боллоо гэсэн хариуг хүргүүлсэн байна.

    СОНСГОЛ ДАРГАЛАГЧ Б.ЭНХ-АМГАЛАН: Байгууллагууд 21 тэрбум гэсэн өндөр үнэ зарлачихаад, тухайн хайгуулын лицензийн талбайг авалгүй хаяж явдаг. Тэгсэн мөртлөө хамгийн олон лицензийг аваад, шилжүүлээд байдаг. Энэ нь лицензийн наймаа хийж байна гэсэн хардлагыг төрүүлж байна. Сонгон шалгаруулалт явуулахад солбилцол явуулах, талбайн мэдээлэл бэлтгэх их олон шат дамжлагын асуудал байдаг гэсэн мэдээллийг Хянан шалгах түр хорооны шинжээчид мэдээлэл өгсөн. Тэгэхээр энэ хүмүүсийн авчихаад хаяж байгаа талбайг дороо ямар зүйлтэй юм бэ. Алт, нүүрс аль нь байна вэ. Мэдээж хоосон зүйл дээр хэдэн тэрбум төгрөгөөр нь авчихаад, хаяхгүй байх. Үүнд хариулт өгөөч.

       УУЛ УУРХАЙН ХҮНД ҮЙЛДВЭРИЙН ЯАМНЫ ГЕОЛОГИЙН БОДЛОГЫН ГАЗРЫН ДАРГА Х.САНЧИГДОРЖ: Засгийн газрын тогтоолоор сонгон шалгаруулалтын талбайг баталж байгаа. Үндэсний геологийн албанаас талбайн сонголтуудын мэдээллийг гаргаад, яамд хянуулаад Ашигт малтмал газрын тосны газар дээр сонгон шалгаруулалт зарлаж байгаа. Мэдээж сонгон шалгаруулалтын журамд хамгийн өндөр оноо буюу 70 оноог санхүүгийн саналаар авсан аж ахуй нэгжүүд 25, 21, 16 тэрбум төгрөгөөр ялсан байдалтай байгаа. Эдгээр талбай нь ихэнхдээ Баянхонгор аймгийн нутагт байгаа алттай холбоотой талбай байгаа гэсэн мэдээлэл байна.

      СОНСГОЛ ДАРГАЛАГЧ Б.ЭНХ-АМГАЛАН: Сонгон шалгаруулалтаар хаячихаад явбал цуг орсон компаниуд орох боломж хаагдах уу, хаяад явсан хүмүүст Уул уурхайн яамнаас ямар зохицуулалт хийдэг вэ?

        УУЛ УУРХАЙН ХҮНД ҮЙЛДВЭРИЙН ЯАМНЫ ГЕОЛОГИЙН БОДЛОГЫН ГАЗРЫН ДАРГА Х.САНЧИГДОРЖ:  Дараагийн компани орох боломжгүй. Уул уурхайн яамнаас хайгуулын лицензийн талбайг хаяж явсан хүмүүст одоогоор авах арга хэмжээ, зохицуулалт байхгүй. Бид нөхцөл байдлыг хараад олон удаа давтан үйлдэлтэй аж ахуйн нэгжүүд, өндөр үнэтэй саналаар орж ирж санал авчихаад, үнээ төлөхгүй, тусгай зөвшөөрөл авахгүй бол хариуцлага тооцох асуудлаар одоо байгаа журамд өөрчлөлт оруулах гээд яамны сайт дээр тавьсан байгаа.