"Ашигт малтмалын лиценз"-тэй холбоотой нотлох баримтыг шинжлэн судлах сонсгол өнөөдөр болж байна. Эхний өдрийн сонсголоор Ашигт малтмал хайх, ашиглах зориулалтаар газар, түүний хэвлийг тусгай зөвшөөрлөөр олгох, бүртгэх үйл ажиллагаа сэдвийн хүрээнд гурван багц асуудлыг хэлэлцэнэ.

            Энэ үеэр Хянан шалгах түр хорооны гишүүн, сонсгол даргалагч Б.Энх-Амгалан "Бид сонсгол хийхээр бэлтгэж байх хугацаандаа байгууллага, хуулийн этгээдээс шаардсан нотлох баримтыг тухайн байгууллагаас тогтоосон цаг хугацаанд бүрэн гүйцэт шаардлага хангаж ирүүлэхийг шаардсан. Гэсэн ч тогтоосон хугацаанд бүрэн гүйцэт шаардлага хангаагүй, материалаа дутуу ирүүлсэн, бүр огт баримт ирүүлээгүй зөрчил илэрсэн. Шалгалтын хугацаанд нийт 53 байгууллагаас нотлох баримт гаргуулахаар хандсан ч өнөөдрийн байдлаар хариу огт ирүүлээгүй 12 байгууллага, нотлох баримт нь шаардлага хангаагүй нэр бүхий есөн байгууллага байна" гэв.