2024 оны УИХ-ын сонгуульд нэр дэвших нам, эвслүүд тойрог болон жагсаалтаар нэр дэвших гишүүдээ өчигдөр тодруулж, баталсан. МАН-ынхан жагсаалтаараа УИХ-ын гишүүн, сайд нарын дэвшүүлэхгүй гэдгээ мэдэгдэж, инженер, эмч гээд салбар салбарын шилдэг төлөөлөгчдийг багтаасан гэсэн юм.

          Тэгвэл салбар бүрийн манлайлагчдыг эгнээндээ нэгтгэсэн гэх МАН-ын 2024 оны УИХ-ын сонгуульд оролцуулахаар шийдвэрлэсэн дэвшигчид гадаадын ямар их сургуульд ямар мэргэжлээр суралцаж, мэргэжил дээшлүүлснийг харцгаая.

ТОКИОГИЙН ИХ СУРГУУЛИЙГ ТӨГССӨН, АРХИТЕКТОР Г.ЛУВСАНЖАМЦ

          МАН-ын жагсаалтыг архитектор Г.Лувсанжамц тэргүүлсэн. Тэрбээр Токиогийн Политехникийн их сургуульд архитектораар сурсан бөгөөд улмаар Токиогийн их сургуульд Хот төлөвлөлтөөр магистр, докторын зэрэг хамгаалсан нэгэн. Суралцаж байх хугацаандаа Улаанбаатар хот дээр судалгаа, шинжилгээ хийдэг байжээ. Төгсөлтийн ажлаа “Гэр хорооллын дэд бүтэц, орон сууцжуулалт” сэдвээр хийсэн тэрбээр үргэлжлүүлэн жил бүр энэ чиглэлийн судалгаа хийдэг байна. Тэрбээр  Багануурын их сургуулиудын хотхон, Оюу Толгойн ил уурхайн ерөнхий төлөвлөгөө зэрэг төсөл дээр ажиллажээ.

“RMIT” ИХ СУРГУУЛИЙГ ТӨГССӨН , ЦАХИЛГААНЫ ИНЖЕНЕР М.ЭНХЦЭЦЭГ

         Архангай аймгийн Тариат сумын уугуул, Орхон аймагт дунд сургуулиа дүүргэж, 2000 онд ШУТИС-ийн ЭХИС-ийг  цахилгааны системийн автоматжуулалтын инженерийн мэргэжлээр бакалавр, 2005 онд магистр хамгаалсан. Ажлын гараагаа ТБЦДС ХК-ийн Эрдэнэт-Хар хорины салбараас эхлүүлсэн бөгөөд "ЦДҮС" ТӨХК-ийн инженерээр ажиллаж байгаад 2015 онд Австралид очиж, 2017 онд RMIT их сургуулийг Цахилгааны инженер мэргэжлээр магистрын зэргийг  хамгаалсан байна.

         2022 онд доктор болж, өдгөө Австралийн зөвлөх үйлчилгээний компанид ажиллаж байгаа юм.

ГУРВАН ИХ СУРГУУЛЬД СУРЧ БАЙСАН ГЭХ Ч.АНАР

        “Шарк Танк” нэвтрүүлгийн хөрөнгө оруулагч гэдгээрээ олон танигдсан Ч.Анар.  Тэрбээр Өвөрхангай аймгийн ерөнхий боловсролын сургуулийг төгсөж, 1998 онд МУИС-д элссэн ч төгсөөгүй байна. Улмаар ТИС-ийн Холбоо мэдээллийн технологийн сургууль, Берлинд Техникийн их сургууль, ОХУ-ын их сургууль гээд гурван их сургуулийн бүх кредитийг тус тус нэг жилийн дотор үзэж дуусгасан ч альч сургуулиас нь диплом аваагүй байна.

         Ч.Анар "Нетсофт" компанийн үүсгэн байгуулагчдын нэг бөгөөд “Жи-Мобайл” компанийн үүсгэн байгуулагч. Мөн “Анд Глобал”, “Mlab” компанийн үүсгэн байгуулагч юм. Тус хоёр компаниас салбарласан найман охин компанитай юм.

“Trento”-гийн их сургуулийн доктор О.САРАНЧУЛУУ

        Хөгжлийн бэрхшээлтэй иргэдийг  нийгмийн амьдралд эргэн орж, дасан зохицоход нь тусалдаг “Achilles International Mongolia”  хэмээх  олон улсын байгууллагын Монгол дахь салбарыг  2015 оноос хойш удирдаж байгаа О.Саранчулуун.

         МУИС-ийг нийгмийн ажлын бакалавр болон магистр, Израйль Улсын Хэбрэйн их сургуулийг нийгмийн эрүүл мэндийн магистраар, АНУ-ын Колумбын их сургуулийн нийгмийн ажлын сургуульд зочин судлаачаар, 2011 оноос АШУҮИС-ийн нийгмийн эрүүл мэндийн сургуульд суралцаж, докторын зэрэг хамгаалсан. Итали Улсын “Trento”-гийн их сургуульд докторын зэргээ хамгаалсан.

ШИНЖЛЭХ УХААНЫ АКАДЕМИЙН ЕРӨНХИЙЛӨГЧ, АКАДЕМИЧ Д.РЭГДЭЛ

       Төрийн соёрхолт, академич Д.Рэгдэл 1951 онд Говь-Алтай аймгийн Бигэр суманд төрсөн. Тэрбээр 1971-1976 онд ЗХУ-ын Харьков хотын М.Горькийн нэрэмжит Улсын их сургуульд суралцаж биологийн багш мэргэжил, биохимич мэргэшлээр төгссөн.

      1985 онд Берлиний Гумболдтын Их сургуульд доктор (Ph.D), 2001 онд “Липоксигеназууд, нийтлэг шинж, өвөрмөц онцлог” сэдвээр химийн шинжлэх ухааны доктор (Sc.D)-ын зэрэг хамгаалсан. 2002 онд ШУА-ийн гишүүнээр сонгогдсон байдаг.

        1976-1977 онд ШУА-ийн Химийн хүрээлэнд ЭШДаА, 1977-1982 онд Физик, техникийн хүрээлэнд ЭШДэА, 1982-1985 онд БНАГУ-ын А.Гумбольдтын нэрэмжит их сургуульд аспирант, 1986-1997 онд Хими, химийн технологийн хүрээлэнд Биохимийн секторын эрхлэгч, 1997-2001 онд тус хүрээлэнд эрдэмтэн нарийн бичгийн дарга, 2001-2009 онд Монгол улсын ШУА-ийн эрдэмтэн нарийн бичгийн дарга, 2009-2016 онд ШУА-ийн Тэргүүн дэд ерөнхийлөгч, 2016 оноос ШУА-ийн Ерөнхийлөгчөөр сонгогдон ажиллаж байгаа.

ХАРВАРДЫН БАГШ, ДЭД ПРОФЕССОР Д.ГАНМАА

         Харвардын Анагаах Ухааны Их Сургууль, Харвардын Нийгмийн Эрүүл мэндийн Их Сургуулийн багш, дэд профессор Д.Ганмаа.

      Нийслэлийн 23 дугаар дунд сургуулийг дүүргэж, АУДС-д цэргийн эмчээр элсэн орж, АШУИС-д бакалаврын зэрэг, Японы Яманаши АУИС-д доктор, АНУ Харвардын АУИС, Харвардын Нийгмийн Эрүүл Мэндийн Сургууль дэд профессор хамгаалсан. Тэрбээр 2004 oноос  "Монголын Эрүүл Мэндийн Үүсгэл" (MHI) хэмээх Харвардын Их Сургуулийн эрдэм шинжилгээ, судалгааны нэгж байгууллагыг үүсгэн байгууулж ажиллаж байна.

ИХ БРИТАНИ УЛСЫН ОЛОН УЛСЫН ИХ СУРГУУЛИЙН МАГИСТР М.МАНДХАЙ

     Социал Демократ Монголын эмэгтэйчүүдийн холбооны Ерөнхий нарийн бичгийн дарга М.Мандхай. Их Британи Улсын Олон улсын их сургуульд бизнес, санхүү менежментээр магистрын зэрэг хамгаалсан, Вэст Лондон коллежид Аялал жуулчлалын менежментээр суралцсан.

     Тэрбээр “Ази Номхон далайн хөрөнгө оруулалтын партнерс” компаниас ажлын гараагаа эхэлсэн ба “Оюутолгой” компанид нийгмийн төслүүд хариуцсан менежер, “Нүүдэлчин” группийн дэд захирал, Сүү ХК-ны Гүйцэтгэх захирал зэргээр хөдөө аж ахуй, уул уурхай, бизнес, санхүү, хөрөнгө оруулалтын салбарт 15 жил ажилласан.

  АНУ, ХАРВАРДЫН ИХ СУРГУУЛИЙН ДОКТОР Б.УЯНГА

        ШУТИС-ийн Геологи, газрын тосны сургуулийг Геологийн зураглал мэргэжлээр төгссөн. 2010-2016 оны хооронд АНУ-ын Харвардын их сургуулийн Дэлхий гараг судлалын тэнхимд геологийн чиглэлээр байгалийн ухааны докторын зэрэг хамгаалсан.

        2019 оныг хүртэл Японы Токиогийн их сургуульд геологи, уул уурхайн чиглэлээр судалгааны ажил хийж байгаад эх орондоо ирж суурьшсан салбарын мэргэжилтэн юм. АНУ болон Японд суралцаж, геологи, уул уурхайн чиглэлээр судалгаа хийж байх хугацаандаа АНУ-ын Геологийн Алба, Японы Геологийн Албадад ажиллаж, мэргэжлийн судалгаа хийж байсан.

     2020 оноос хойш Үндэсний Геологийн албанд Дэд дарга, Ерөнхий геологичоор, мөн Уул уурхай, хүнд үйлдвэрийн яаманд Геологийн бодлогын газрын даргаар ажиллаж байсан. Одоо УУХҮ-ийн дэд сайдаар ажиллаж байгаа.

ПОТСДАМЫН ИХ СУРГУУЛИЙН УЛС ТӨРИЙН ШИНЖЛЭХ УХААНЫ ДОКТОР Б.ХЭРЛЭН

      Б.Хэрлэн нь төрийн удирдлага, удирдлагын сэтгэлзүйгээр суралцаж төгсөөд Герман Улс, Потсдамын их сургуульд төрийн удирдлагын магистр, Герман Улс, Потсдамын их сургуульд улс төрийн шинжлэх ухааны докторын зэрэг хамгаалжээ.

      Тэрбээр Удирдлагын академийн удирдлагын социологи сэтгэл зүйн тэнхимийн багш, профессороор ажиллаж байв. 2020 оны сонгуульд УИХ-ын 20 дугаар тойрогт МАХН-аас нэр дэвшиж байсан.

КЭМБРИЖИЙН ИХ СУРГУУЛИЙН ДОКТОР Д.БУМ-ОЧИР

     Монгол Улсын угсаатан зүйч, 2021 оны зургадугаар сараас Ерөнхийлөгч У.Хүрэлсүхийн Соёл, шашны бодлогын зөвлөх Дуламын Бум-Очир. Тэрбээр 1993-1996 онд Монгол хэл, бичгийн дээд сургуулийг Монгол-англи хэлний багш мэргэжлээр, 1996-1997 онд Монгол Улсын их сургуулийн Гадаад хэл, соёлын сургуулийн герман хэлний курс төгссөн.

    1996-1998 онд ХБНГУ-ын Боннын их сургууль болон Монгол Улсын их сургуулийн Монгол хэл, соёлын сургуульд Хэлбичгийн ухааны магистрын зэрэг, 1998-2000 онд Монгол Улсын Шинжлэх ухааны академийн Хэл зохиолын хүрээлэнд Хэлбичгийн ухааны докторын зэрэг, 2000-2001 онд ИБУИНВУ-ын Кэмбрижийн их сургуульд Нийгэм-соёлын антропологийн магистрын зэрэг, 2002-2006 онд ИБУИНВУ-ын Кэмбрижийн их сургуульд Антропологийн ухааны докторын зэргийг тус тус хамгаалсан.

ТОКИОГИЙН ИХ СУРГУУЛИЙН ХУУЛЬ ЗҮЙН УХААНЫ МАГИСТР О.НОМИНЧИМЭГ

        Хотын дарга Х.Нямбаатар хоёрдугаар орлогч О.Номинчимэг. Токиогийн Их Сургуулийг эрх зүйн бакалавр болон харьцуулсан эрх зүйн магистр зэрэгтэй төгссөн бөгөөд АНУ-ын Колумбын хуулийн сургуулийг 2015 онд хууль зүйн магистрын зэрэгтэй төгссөн.

      О. Номинчимэг нь Монгол улс болон АНУ-ын Нью-Йорк мужийн хуулиар зөвлөгөө өгөх эрхтэй. Тэрбээр Олон улсын худалдааны танхимын Арбитрын шүүх (ICC Court of Arbitration)-ийн гишүүн бөгөөд БНХАУ-ын CIETAC, CMAC болон Монголын Олон Улсын Арбитрт арбитрчаар бүртгэлтэй. 2011-2017 онд Хоган Ловеллс олон улсын хуулийн фирмийн Улаанбаатар болон Парис дахь салбарт хуульч, ахлах хуульчаар ажиллаж байсан ба 2021 он хүртэл Өмгөөллийн Номин энд Адвокатс ХХН-ийн үүсгэн байгуулагч, захирлаар ажиллаж байсан.

ХӨДӨЛМӨР, НИЙГМИЙН ХАМГААЛЛЫН ДЭД САЙД  С.ЗУЛПХАР

         Хөдөлмөр, нийгмийн хамгааллын Дэд сайд  С.Зулпхар. Турк Улсын Мимар Синаны их сургуулийн бакалаврын зэрэг олгох хөтөлбөрийг социологич мэргэжилтэйгээр, Монгол улсын Их Сургуулийг социологийн магистр, Удирдлагын академийн докторын сургалтыг төрийн удирдлагаар тус тус дүүргэж, төрийн захиргааны доктор (PhD)-ын зэрэг хамгаалсан. Их Британи, Умард Ирландын Нэгдсэн Вант Улсын Кембрижийн их сургуульд зочин судлаач. Унгар Улсын Төв Европын Их Сургуульд, Энэтхэг Улсын Хүн ам, хөгжлийн институтэд, БНСУ-ын Нутгийн Удирдлагын Хөгжлийн Институтад, Швейцарын Холбооны улсын Женевийн их сургуульд, АНУ-ын Флоридагийн их сургуульд судалгааны арга зүй, харьцуулсан улс төр судлал, төрийн удирдлага, төрийн захиргаа, хүн ам, хөгжлийн бодлого, манлайлал, төрийн бус байгууллагын удирдлагын чиглэлээр тус тус мэргэжил дээшлүүлсэн.

ХАРВАРДЫН ХУУЛИЙН СУРГУУЛИЙН ХУУЛЬ ЗҮЙН МАГИСТР Б.СОЛОНГОО

            Хууль зүй, дотоод хэргийн дэд сайд Б.Солонгоо. Унгарт таван жил сурч эрх зүйч мэргэжлийг эзэмшиж, Их Британийн Дандийгийн их сургуулийг ашигт малтмалын эрх зүйн орчин, бодлого сэдвээр магистрын зэрэг хамгаалж, дараа нь Харвардын хуулийн сургуулийг магистрын зэрэгтэй төгсчээ. Мөн тэрбээр Олон улсын “Хоган Ловеллс” хуулийн фирмд ажиллаж багагүй туршлага хуримтлуулсан.

ПЭСИФИК СТЭЙТС ИХ СУРГУУЛИЙН МАГИСТР Н.БАЯРЧИМЭГ

          Нанзадын Баярчимэг Дорноговь аймагт төрсөн. Хуульч мэргэжилтэй. МУИС Хууль зүйн сургууль, АНУ-ын Пэсифик Стэйтс Их сургууль төгссөн. Хууль зүйн ухааны магистр, Олон улсын Бизнесийн удирдлагын магистр.

ХАРВАРДЫН ИХ СУРГУУЛИЙГ ТӨГССӨН ЭДИЙН ЗАСАГЧ Б.ДӨЛГӨӨН

          Б.Дөлгөөн нь эдийн засагч мэргэжилтэй. Олон улсын хөгжлийн эдийн засгийн магистрын зэрэгтэй. МУИС-ийн харьяа Монгол-Туркийн хамтарсан дунд сургууль, Канад Улсын Виктория хотын Персон коллеж, АНУ-ын Коннектикат коллеж, АНУ-ын Харвардын Их сургуулийг тус тус төгссөн.

АНУ-ЫН ВАНДЕРБИЛЬТ ИХ СУРГУУЛИЙГ ТӨГССӨН БАНКНЫ МЭРГЭЖИЛТЭН Д.ЭНХЖАРГАЛ

       Д.Энхжаргал Монголбанкнаас ажлын гараагаа эхэлсэн бөгөөд Дэд Ерөнхийлөгчийн албыг хашсан анхны эмэгтэй. Д.Энхжаргал нь банк, санхүү, эдийн засгийн чиглэлээр мэргэшсэн бөгөөд хуучнаар ЗХУ-ын Үндэсний эдийн засгийн академи, АНУ-ын Вандербильт их сургуулийг төгсөж, Оксфордын их сургуульд мэргэжил дээшлүүлсэн.

        Тэрбээр Монгол Улсын Төв банканд 30 гаруй жил ажилласан туршлагатай бөгөөд 2013-2018 он хүртэл Монгол Улс-Европын Холбооны хамтарсан төсөл, Дэлхийн банк, Азийн хөгжлийн банк, Азийн дэд бүтцийн хөрөнгө оруулалтын банканд тус тус зөвлөхийн үүрэг гүйцэтгэж байсан. “Эрдэнэс Монгол” ХХК-ийн ТУЗ-ийн хараат бус гишүүн, Европ дахь Монгол эмэгтэйчүүдийн хөгжлийн холбоо, Санхүү банкны эмэгтэйчүүд, Дэлхийн монгол эмэгтэйчүүд зэрэг байгууллагын ерөнхийлөгчөөр тус тус ажилладаг.