ОХИН МИНЬ ШИЛДЭГ ТӨГСӨГЧ БОЛОХДОО "БӨМБӨРЦӨГИЙН БӨХ БОЛНО. ДЭЛХИЙН АВАРГА БОЛНО" ГЭЖ ЯРИЛЦЛАГА ӨГСӨН БАЙДАГ

-Та охинтойгоо Дэлхийн аварга болсноос нь хойш ярьж чадсан уу?

      -Барилдааных нь дараа хальт царайг нь харсан. Сүлжээ тасраад сайн ярьж чадаагүй. Бид уйлчихсан байсан болоод олигтой ярьж чадаагүй. Өнөөдрөөс сүлжээтэй болохоороо залгах байх.

МАНАЙХ УРАНМАНДАЛ ХАЙРХАНАА ТАХИЖ, ШҮТДЭГ

-Охин нь энэ онд гурав дараалан түрүүллээ. Монголчууд охиныг нь олимпын аварга болно гэж бодож байгаа. 

     -Бид ч мөн адил охиноо олимпод амжилттай сайхан барилдаасай хэмээн залбирч сууна. Охиндоо бас итгэж байгаа. Манайх Уранмандал хайрхнаа шүтдэг. Нутаг айлууд ээлжлэн тахидаг заншилтай. Зургадугаар сарын 16-нд манайх овоогоо тахина. Сайхан үйл явдал давхцаж байгаад баяртай байгаа. Нутаг ус, нутгийн зон олноо баярлуулчихаад охиноо олимпын дэвжээн дээрээс харна даа.

-Охин нь дэлхийн аварга болчихсон мөртлөө их даруухан харагдаж байсан. Ер нь ямар зан чанартай тамирчин бэ?

      -Охин минь төрөлхийн даруу төлөв зантай. Алтын төлөө барилдах тэмцээн дээр уйлж байна лээ. Тэгэхэд нь сэтгэл нь хөдөлсөн байх. Охиныхоо уйлж байгааг хараад дагаад л уйлчихсан.

-Хожуу жүдогоор хичээллэж эхэлсэн гэдэг юм билээ. Анх бөхөөр хичээллэхэд нь та хэрхэн хүлээж авсан бэ?

      -Охин минь аравдугаар ангидаа самбо бөхөөр дүүтэйгээ хамт хичээллэдэг байсан юм. Тэр үед нь эхнэр бид хоёр эмэгтэй хүүхдүүд байж бөхөөр хичээллээ хэмээн дургүйцдэг байлаа. Тэгээд дүү Баасанжаргалыг нь барилдуулаагүй. Харин Баасанхүү Идэр дээд сургуулийн оюутан болчихоод жүдо бөхөөр хичээллэсэн. Ер нь саяхнаас жүдогоор хичээллэж амжилттай барилдаж байгаа охиноороо үргэлж бахархдаг. Анх барилдаж байх үед нь дэлхийн аварга болно чинээ санаж, бодож байгаагүй шүү дээ.

ЭЭЖИЙН ТАЛД ГОДОН ДАМПИЛ ГЭХ АЙМГИЙН АРСЛАН БАЙСАН ЮМ БИЛЭЭ

-48 кг-ын жинд барилдахаа жингээ хасдаг уу?

     -Таван килограмм хасаж барилддаг. Бэлтгэлээс гадна жин хасах нь надад хэцүү санагддаг. 2-3 килограммыг хоолоороо бусдыг нь хөлсөөрөө гаргаж байж жин хасдаг. Зарим үед дуугүй болчихсон байдаг. Тэр нь надад мэдрэгддэг л юм. Тэсвэр, хатуужилтай хүн л тамирчин болдог юм билээ. 

-Танай удамд бөх хүн бий юү?

      -Манай ээжийн талд Годон Дампил гэх аймгийн арслан байсан. Онгироо хүн байсан юм байлгүй толгойгоороо дэнчин тавьж барилддаг байсан гэж ярьдаг. Эхнэрийн талд бөхийн удам байхгүй. Би залуудаа суманд тав давж, сумын начин болж байлаа. Гэхдээ бөхөд тийм ч сонирхолтой биш.

-Охин нь багадаа ямар сурлагатай хүүхэд байсан бэ?

      -Охин минь нийгмийн идэвхтэй хүүхэд байсан. Уралдаан тэмцээн болгонд л оролцдог байлаа. Шилдэг төгсөгч болохдоо “Бөмбөрцөгийн хүн болно. Дэлхийн тамирчин болно” гэж ярилцлага өгсөн байдаг. Дэлхийн аварга болоход нь тэр нь санаанд тодхон байлаа.

-Та бүхэн Мөрөнгийн төвдөө амьдарч байна уу?

     -Манайх Мөрөнд амьдардаг. Дөрвөн хүүхэд минь Мөрөнд төрж, өссөн. Бид хувиараа бизнес эрхэлдэг эгэл жирийн айл байгаа юм.

-Та охиныхоо ямар мэхийг үзэх дуртай вэ?

       -Охиныгоо жийх, давуулан шидэхдээ гарамгай гэж боддог. Тэр мэхэнд нь дуртай. 

-Та бүхэнд эрүүл энхийг хүсье, баярлалаа. 

-Баярлалаа, миний охин урамтай сайхан барилдаж олон жил нутаг ус, ах, дүүгээ баярлуулж, монголчуудынхаа бахархал нь болж явах болтугай гэж ерөөмөөр байна. Охиныгоо сайн, сайхан явна гэдэгт огтхон ч эргэлздэггүй.