МАН-ын Бүлгийн дарга Д.Тогтохсүрэн тойрогт нэр дэвшихээр боллоо. Тэр уг нь жагсаалтад багтахаар болж, тойрогт өөр хүн сойж байсан. Хачирхалтай нь, нэр дэвшигчдийг зарлах өдөр тэрбээр шийдвэрээ өөрчилж, тойрогт үзнэ гэв. 

        Тодруулбал, тэрбээр хэдхэн минутын өмнө сэтгүүлчдийн асуултад хариулахдаа “Энэ жилийн сонгуулиар гишүүд тойргоос болон намын жагсаалтаар нэр дэвшихээр болсон. Тойрогт нэр дэвшигчдийн хувьд тухайн тойрогтоо хамгийн нэр хүндтэй олон түмний санал бодлыг илэрхийлэх хүмүүс тойрогт нэр дэвшинэ. Улс төрийн намын тухай хуулийн өөрчлөлт хийгдсэн. Нэгдүгээрт, нийгмийн төлөөлөл болсон хүнийг намаас дэвшүүлнэ. Тэгэхээр манай нам шалгуур тогтоох ёстой. Багш нарын төлөөлөл, малчдын төлөөлөл байх ёстой гэсэн үг. Өөрөөр хэлбэл, нийгмийн төлөөллийг хангах ёстой. Манайх бусад намын хувьд үүрэг, хариуцлага хүлээсэн нам шүү  дээ. Би жагсаалтаар нэр дэвшихгүй. Тойргоос нэр дэвшинэ” гэсэн юм. 

          УИХ-ын I тойрог буюу есөн мандаттай Өвөрхангай, Архангай, Баянхонгор аймагт МАН-аас дараах хүмүүс горилж, нэр нь яригдаж буй. Тодруулбал, Эрүүл мэндийн сайд С.Чинзориг, Гадаад харилцааны сайд Б.Батцэцэг, Батлан хамгаалын сайд Г.Сайханбаяр, УИХ-ын гишүүн Г.Тэмүүлэн, ЕТГ-ын дарга Я.Содбаатар, Эрчим хүчний дэд сайд М.Баярмагнай, Ерөнхийлөгчийн зөвлөх Б.Даваадалай, УИХ дахь МАН-ын Бүлгийн Ажлын албаны дарга С.Далхаасүрэн тэргүүтэй есөн хүн горилж байгаа билээ. 

Тэгвэл МАН-ын Бүлгийн дарга Д.Тогтохсүрэн I тойрогт нэр дэвших болсноор дээрх горилж буй есөн хүнээс нэг нь сугарч үлдэх нь тодорхой боллоо.