Хүн намаас УИХ-д нэр дэвших гишүүдээ зарлаж байна. Энэ үеэр Хүн намын дарга Т.Доржханд “120 хүн манай намаас нэр дэвших хүсэлтээ ирүүлсэн. Үүнээс төвийн бүсэд инженерүүдийг, хангайн бүсэд аялал жуулчлалыг хөгжүүлэх багаа явуулж байгаа. Харин говийн бүсэд инженер, эдийн засагчдын багаа явуулж байгаа. Зүүн бүсэд хөдөө аж ахуйн мэргэжилтнүүдийг, Хан-Уул дүүрэгт эдийн засаг, санхүүгийн мэргэжилтэй хүмүүсийг нэр дэвшүүлнэ. Тухайлбал, манай намаас эдийн засагч Б.Отгонтөгс, С.Санасэр, Хан-Уул дүүрэгт А.Мандахнаранг нэр дэвшүүлнэ. Баянзүрх дүүрэгт П.Наранбаяр, О.Цэцэгбал нарыг дэвшүүлэхээр болсон. Дүүрэг, тойргийн онцлогоос хамаарч мэргэжлийн хүнийг нэр дэвшүүлж байгаа. Манай нам ялах нь чухал биш. Монгол ялах нь чухал. Хүн нам санал авахын тулд гишүүдээ нэр дэвшүүлнэ гэж бодохгүй байна. Олонд танигдаагүй ч номын санд олон сар, жил суусан, үзэл бодолтой, ажил хэрэгч гишүүдээ нэр дэвшүүлээгүй. Энэ бол Хүн намын ялгарал. Нэр дэвшигчдийн 70 хувь нь доктор, 30 хувь нь бакалаврын зэрэгтэй байна. Монголын төрд мэдлэг, боловсролтой мэргэжлийн багийг бүрдүүлсэн нам бий болсон. Манай намынхан худал хэлж, хулгай хийхгүй гэдгийг хэлье” гэв. Тэд намын жагсаалтад багтах гишүүдийг хаалттай хэлэлцэж байгаа аж.