Сонгуулийн ерөнхий хорооноос сонгуулийн хууль бус сурталчилгаатай холбоотой асуудлаар мэдэгдэл гаргаад буй. Энэ талаар цагдаагийн байгууллагаас мэдээлэл өглөө.

ЦЕГ-ын Зөрчлийн хэрэг бүртгэх албаны чиглэлийн ахлах байцаагч, цагдаагийн хошууч Э.Саруул "УИХ-ын 2024 оны сонгуулийн бэлтгэл ажлыг хангах, гэмт хэрэг зөрчлөөс урьдчилан сэргийлэх арга хэмжээ авч байна. Улмаар сонгуулийн үйл ажиллагаатай холбоотой иргэд, аж ахуйн нэгжээс өргөдөл, гомдол гаргасан тохиолдолд байнгын ажиллагаатай шуурхай штаб ажиллуулж байна. Тавдугаар сарын 7-ны байдлаар сонгуулийн үйл ажиллагаатай холбоотой 23 гомдол ирснээс 15 нь зөрчлийн, найм нь гэмт хэргийн шинжтэй байна. Иймд уг асуудлыг прокурорын хяналт дор шалгалтын ажиллагааг явуулж байна" гэлээ. 

Мөн энэ үеэр Сонгуулийн ерөнхий хорооны нарийн бичгийн дарга Д.Даваа-Очир "УИХ-ын гишүүд нийт ард түмний төлөөлөл гэдэг утгаар нь аль ч аймагт ажиллах вэ гэдэгт хяналт тавих боломжгүй. Харин сонгуулийн хууль зөрчсөн бол иргэд хуулийн байгууллагад хандаж, хуулийн байгууллагаас буруутай нь тогтоогдвол нэр дэвшигчийн бүртгэлээс хасах хүртэл арга хэмжээ авах хуулийн зохицуулалттай. Сонгуульд горилогч Засгийн газрын мөрийн хөтөлбөр сурталчилвал хууль бус сурталчилгаа болно. Хамгийн гол нь мэдээлэл эзэнтэй байх хэрэгтэй. Бид 330 сумын сонгуулийн хороо, цагдаагийн байгууллагад хамтарч ажиллах бололцоог олгож байгаа юм. Ховд аймгийн Засаг дарга Э.Болормаагийн хувьд Баруун бүсийн хөгжлийн төвийн дарга гэсэн байр суурьнаас баруун аймгуудад ажиллаж байгаа юм билээ. Уг нь хуулиараа Засаг дарга ИТХ-д болон орон нутагтаа хийсэн ажлаа тайлагнах учиртай" гэв.