УИХ-ын гишүүн Х.Ганхуяг Банкны тухай хуулийн хэрэгжилтэд хяналт тавьж ажиллах ёстой Төв банк болон банкны удирдлага үндсэн чиг үүргийн хүрээнд ажлаа хийхгүй байгаа асуудлыг шалгуулахаар УЕП-т хандаж байгаа талаараа мэдээлэл хийлээ.

     Тэрбээр "2021 онд Банкны тухай хуулийг батлаж, эрх зүйн шинэ зохицуулалттай болсон. Ингэснээр арилжааны банкнуудын монополь байдлыг задлах зохицуулалт хийхээр оруулж ирсэн. Өмнөх хуулийн үйлчлэл 2023 оны арванхоёрдугаар сарын 31-нд дууссан. Тэгэхээр арилжааны банкуудын 20 хүртлэх хувийн хувьцааг задлаж, олон нийтэд нээлттэй хувьцаат компани болгох, банк банкнаас бусад төрлийн үйл ажиллагаа эрхлэхийг хориглох шинэ эрх зүйн зохицуулалттай болгосон.

     Гэтэл өнөөдрийг хүртэл хуулийн хэрэгжилт хангагдаагүй байна. Үүнийг би Монголбанкны удирдлагуудад байна гэж хардаж байгаа юм. Тиймээс энэ асуудлыг УЕП-т шалгуулахаар хандаж байна. Монополь байгаа газар үнэ өртөг өндөр байдаг. Арилжааны банкууд монополь байхаар зээлийн хүү өндөр, хүртээмж бага байна. 20-24 хувийн хүүтэй зээлээр бизнес эрхлэх ямар ч боломжгүй шүү дээ. Арилжааны банкуудын олгож байгаа зээлийн ихэнх нь Засгийн газраас зарласан тусгай хөтөлбөр төсөл, хөтөлбөрүүдэд зээл олгож байгаа. Нийт таван их наядын зээл олгосон. Энэ нь хөнгөлөлттэй зээлүүд байна гэсэн үг. Гэтэл энгийн хувийн аж ахуйн нэгжүүд арилжааны банкнаас зээл авах боломжгүй байна. Банкны тухай хуульд нэмэлт өөрчлөлт оруулах асуудлыг хоёр долоо хоногийн өмнө хулгайгаар оруулж ирэх гэж оролдсон. Тухайн үед нь зогсоож чадсан. Тиймээс одоо байгаа Монголбанкны удирдлагуудад хариуцлага тооцох хэрэгтэй. Цаашлаад Монголбанкны Ерөнхийлөгчийг хугацаанаас нь өмнө буулгах шаардлага УИХ-ын даргад хүргүүлнэ. Арилжааны банкууд 20 хүртлэх хувийг нээлттэй арилжаалах хуулийн зохицуулалттай ч өнөөдөр 4-5 хувийг нь л нээлттэй зах зээлд гаргаад байна. Тэгэхээр 90-95 хувь нь нэг хүний эзэмшилд байгаа гэсэн үг. Уг нь арилжааны банкууд хувьцаагаа зөвхөн дотоодын зах зээлд бус гадаад зах зээл дээр гаргах, мэргэжлийн хөрөнгө оруулагчийг оруулж ирэх боломж байлаа. Ингэснээр зээлийн хүү буурч, зээлийн хүртээмж нэмэгдэх байлаа" гэлээ.