Ардчилсан намын ээлжит хурлын үеэр НИТХ-ын төлөөлөгч М.Тулгат “Өнгөрсөн дөрөвдүгээр сарын 29-нд болсон НИТХ-аар удахгүй намар болох иргэдийн хурлын сонгуулийн тойргийн хуваалтыг баталж 45 төлөөлөгч 12 тойргийг баталсан. Бидний зүгээс энэ хуваалтыг дэмжээгүй, байр сууриа илэрхийлсэн ч харамсалтай нь эрх баригч нам үнэмлэхүй олонхоор өөрсдийн анхны төслийн дагуу шийдсэн байна. Тус дүүрэг 450 мянган оршин суугчтай, 274 мянган сонгогчтой хамгийн том дүүргийн нэг. Тус дүүрэгт амьдрах иргэдийн тоо Сонгинохайрхан дүүргээс 80 мянгаар илүү нэмэгджээ. Энэ нь Амгалангийн ДЦС баригдсантай холбоотой орон сууцны хөгжлийг дагаж ийн тэлжээ. Сүүлийн нэг жилийн хугацаанд МАН бүсчилсэн хөгжлийн форум зохион байгуулж Монгол Улсыг бүсчилсэн зохион байгуулалттай болгох талаар хүчтэй ярьж байна. Мөн засаг захиргааны өөрчлөлт хүчтэй яригдаж байна. Баянзүрх дүүрэг 450 мянган оршин суугчтай байхад Багахангай 5000 орчим хүн амтай байгаа нь 100 дахин илүү байгаа юм. Хэрэв бүсчилсэн хөгжлийн тойрогт харгалзаж байгаа бол үүнийг харгалзах ёстой. Тойргийн хөгжил нь хаана байгаа нь тодорхойгүй. Үүний хариуд Сэлбэ, Туул, Улиастай гол дагасан хуваалт хийсэн гэх тайлбар өгсөн. Уучлаарай, бид хөдөө орон нутгийнх биш. Орчин үеийн хот бол дэд бүтцээ дагана. Зам талбай, амьдрах хөгжлөө дагахаас биш гол ус, гуу жалга дагаж хотын хөгжил ярихгүй” гэсэн юм.