Уул уурхай, хүнд үйлдвэрийн сайд Г.Ёндон 2019 оны есдүгээр сарын 4-д хоёр хүүхдийнхээ сургалтын төлбөр болох 10.7 сая төгрөгийг "Монголросцветмет" ТӨҮГ-аас төлсөн баримт ил болсон. Тэрбээр энэ тухайгаа “2000 оноос хэрэгжиж эхэлсэн компанийн гүйцэтгэх удирдлага нь менежментийг урамшуулах, сургалтын төлбөрийн хөнгөлөлт эдлүүлэх гэсэн заалт байдаг. Заалтын дагуу компани ашиггүй ажиллавал урамшуулал хөнгөлөлтийг олгодоггүй. Тиймээс 2012-2015 оны хооронд компани ашиггүй ажиллаж, сургалтын төлбөрийн урамшууллыг олгож байгаагүй. Би 2018 онд энэ компанийн гүйцэтгэх захирлаар томилогдсон. Энэ хугацаанд компани өндөр ашигтай ажилласан” гэж тайлбарласан.

Тэгвэл өнөөдөр “Монголросцветмет” ТӨҮГ –аас тайлбар хийлээ. Тодруулбал, “Монголросцветмет” ТӨҮГ-ийн захирал Б.Мөнхбат “Юун түрүүнд манай байгууллага бол ашгийн төлөө байгууллага гэдгийг ойлгох нь зүйтэй. УУХҮ-ийн сайд Г. Ёндон манай компанийн орлогч захирал байхдаа урамшуулал авах эрхтэй байсан нь үнэн. Манай “Монголросцветмет” ТӨҮГ-ийн нийт 180 хүн энэ төрлийн урамшуулал авах эрхтэй байдаг. Зөвхөн захирлууд биш ажилчид нь ч байгаа. Нарийн мэргэжилтнүүд, чадварлаг ажилчдаа урамшуулах нэг хэлбэр бол энэ. Энэ урамшууллыг ашиглахгүй ч байж болно. Г.Ёндон сайдын хувьд хоёр хүүхэд нь гадаадад сурдаг учраас мөнгөний зайлшгүй хэрэгцээтэй болоод л энэ урамшууллыг ашигласан байх. Гэхдээ Г.Ёндон сайд улс төрийн үгийн баялаггүй, төлөв даруу учир өөрийгөө буруу илэрхийлсэн байх" гэлээ. Түүнчлэн "Манай компани өнөөдрийн байдлаар 67,4 тэрбум төгрөгийн өртэй байгаа” гэсэн юм.