Эрх баригч МАН ирэх жилүүдэд жуулчдын тоог нэг саяд хүргэхээр төлөвлөөд байгаа. Гэтэл жуулчдаа “сэгсэрнэ” хэмээн ярьж суугаа Байгаль орчны сайдтай улс аялал жуулчлалын салбарыг хөгжүүлж чадах болов уу. Тэр дундаа УИХ-ын чуулганы индэр дээрээс “Урд хөршийн мөнгөтэй иргэдийг сэгсрэх боломж байна” гэж хэлсэн Д.Сарангэрэл сайдын үг Үндэсний аюулгүй байдлын асуудлыг хөндөж мэдэхээр байлаа. 

Дэлхий нийтийг хамарсан КОВИД-19 гарахаас өмнө Монгол Улс аялахад хамгийн тохиромжгүй улсын тоонд багтаж байсан. Жуулчид Монголын хөдөө талыг үзэх гэж жил, сар, өдрөө төлөвлөн ажил, амьдралаа зохицуулж зорин ирдэг. Гэтэл монголчууд жуулчдын халаасыг жинхэнэ утгаар нь “сэгсрэх”, улмаар дээрэмдэх, дээрэлхэх зэрэг бүдүүлэг үйлдэл гаргадгаас жуулчдын дунд “Аюултай улс” хэмээн нэрлэгддэг. Гаднын сошиал сүлжээгээр “Монголд очвол Улаанбаатар хотоос нь хурдхан яваарай” гэж зөвлөдөг юм билээ. Арга ч үгүй биз дээ,  салбарын сайд нь гадны жуулчдаа “сэгсэрнэ” гээд яриад сууж байхад бусад нь хэрхэх нь тодорхой гэлтэй. 

Нөгөө талаар манай улсад нэг сая жуулчин ирээд үзэх зүйл үнэндээ ховор. Хэдэн тэрбумаар хэл, ам болж байж баригдаж байгаа Хэнтийн цогцолбор, хэдэн жил нүүр тахалсан Цонжин болдогоос өөр юу үзэх вэ. Уг нь Байгалийн үзэсгэлэнт газраа харуул хамгаалалттай болгоод, үзвэр үйлчилгээг нь сайжруулж, бие засах газрыг нь шийдэж, хоноглох газрыг нь бариад өгвөл жинхэнэ утгаараа мөнгө орж ирнэ дээ. Гэвч өнөөдрийг хүртэл дотоодын аялал жуулчлалаа ч хөгжүүлж чадахгүй, “мөлхөж” байгаа улсад энэ нь холын мөрөөдөл хэвээр байна. 

Харин коронавирусыг манай улс дотооддоо алдаагүй нь ирэх жилүүдэд аялал жуулчлалын салбарт эерэгээр нөлөөлж мэдэхээр байгаа. Гэвч салбарын сайд нь ийм ойлголттой байвал юун нэг сая жуулчин, нэг сая ам.доллар. Д.Сарангэрэл өмнө нь Эрүүл мэндийн сайдаар ажиллаж байсан. Коронавирусыг дотооддоо алдахгүй байхад том хувь нэмэр оруулсан гэж өөрийгөө үнэлдэг биз. Үүнийг дагаад нэр хүнд нь ч өсөж, “Хүний төлөө” медиалаар хүртэл шагнуулж байсан. Уг нь нарийндаа бол Д.Сарангэрэлийн ч гавьяа биш, халдварын голомтод ажиллаж байгаа эмч, сувилагч, онцгой, цагдаа зэрэг үүрэг гүйцэтгэж байгаа төрийн албан хаагчдын л ач. Нэг ёсондоо Д.Сарангэрэл коронавирусээр “шоудсаар” байгаад УИХ-д дахин сонгогдоод, бүр салбараа солиод Байгаль орчны сайд болчихсон гэдэгтэй хэн ч маргахгүй биз ээ. Гэхдээ тэр нэг сая жуулчиндаа юу үзүүлэх вэ, яаж үйлчлэх вэ гээд ярьж суусан бол өнөөдөр Эрүүл мэндийн сайд байснаасаа ч илүү олонд таалагдах байсан. Гэвч түүний хэр зангарагтай, мэдлэгтэй хүн бэ гэдгийн жинхэнэ төрх нь энэ салбарт ирснээр илчлэгдэж буй бололтой. Хэрвээ өөр улсад Засгийн газрын сайд нь ийм ичмээр, хариуцлагагүй, салбараа шившиглэсэн үг хэлсэн бол аль хэдийнэ хөршөөсөө уучлалт гуйчихсан, магад зарим нь сайдын суудлаа өгч байгаа биз ээ.