-“Монголросцветмет” ТӨҮГ нь улсын төсөв, татвартай холбоогүй, ашгийн төлөөх байгууллага-

Уул уурхай, хүнд үйлдвэрийн сайд Г.Ёндон хоёр хүүхдийнхээ сургалтын төлбөрийг улсын мөнгөөр буюу “Монголросцветмет” ТӨҮГ-аар төлүүлсэн асуудлаар мэдээлэл хийлээ.  Г.Ёндон нь 2018 оноос “Монголросцветмет” ТӨҮГ-ын үйлдвэрлэл эрхэлсэн орлогч захирлаар ажиллаж байсан бөгөөд 2020 оны долдугаар сарын 8-нд Уул уурхай, хүнд үйлдвэрийн сайдаар томилогдсон юм.

Тэрбээр "Монголросцветмет" ТӨҮГ-ын орлогч захирлаар ажиллаж байх хугацаандаа буюу 2019 оны есдүгээр сарын 4-д хоёр хүүхдийнхээ сургалтын төлбөр болох 10.7 мянган төгрөгийг "Монголросцветмет" ТӨҮГ-аас төлүүлсэн байдаг.

Энэ талаар тэрбээр “Олон хэвлэлээс хандсан учраас би тайлбар хийж байна. “Монголросцветмет” ТӨҮГ нь улсын төсөв, татвартай холбоогүй байгууллага. Ашгийн төлөөх байгууллага юм. Төрийн өмчийн компанийг ашигтай болон алдагдалтай ажиллуулах гэсэн хоёр асуудал байдаг. Та бүхний сонирхож байгаа асуудал “Монголросцветмет” компанид 2000 оны эхэн үеэс  хэрэгжиж эхэлсэн журамтай холбоотой. Энэ журамд компанийн гүйцэтгэх удирдлага нь менежментийг урамшуулах, сургалтын төлбөрийн хөнгөлөлт эдлүүлэх гэсэн заалт байдаг. Заалтын дагуу компани ашиггүй ажиллавал урамшуулал хөнгөлөлтийг олгодоггүй. Тиймээс 2012-2015 оны хооронд компани ашиггүй ажиллаж, сургалтын төлбөрийн урамшууллыг олгож байгаагүй. Би 2018 онд энэ компанийн гүйцэтгэх захирлаар томилогдсон. Энэ хугацаанд компани өндөр ашигтай ажилласан. Иймд сургалтын төлбөр олгосон. “Монголросцветмет” компани шилэн дансны хуулийг сайн хэрэгжүүлж байгаа учраас асуудал 2019 онд нээлттэй болчихсон байсан. Одоо миний хашиж байгаа албан тушаалтай холбоотой энэ асуудлыг гаргаж байх шиг байна. Хөдөлмөрийн гэрээ, журмандаа заачихсан учраас би өөрийгөө болохгүй зүйл хийсэн гэж бодохгүй байгаа.