Сэлэнгэ аймгийн Мандал сумын III сургуулийн 30 сурагч хоолны хордлого авч, 26 нь сумынхаа эмнэлэгт хандсан талаар бид өмнө мэдээлсэн. Өнөөдрийн байдлаар тус сумын эмнэлэгт нэг хүүхэд хэвтэн эмчлүүлж байгаа бөгөөд биеийн байдал хэвийн. Бусад нь эмнэлгээс гарсан аж. Хордлогын шинж тэмдэг илэрсэн 6-10 насны 30 хүүхэд сумын эмнэлэгт хандсанаас 26 нь хэвтэн эмчлүүлж байсан бол хордлого авсан хүүхдийн тоо нэмэгдэж 27 болоод байсан юм. Тэгвэл сурагчид тахианы махнаас хордсон байж болзошгүй гэв.

Сэлэнгэ аймгийн Мэргэжлийн хяналтын газрын дарга Б.Баттүвшин “Хоолны хордлого авсан байж болзошгүй шинж тэмдэгтэй хүүхдүүдийн шээс, цусны шинжилгээний урьдчилсан хариу гарсан. Сурагчид тахианы махнаас хордлого авсан байж болзошгүй. Маргааш тахианы махнаас авсан шинжилгээний хариу гарна. Бүх шинжилгээний хариуг нэгтгэж, дууссаны дараагаар мэдээлэл өгнө” гэв.

Мандал сумын Онцгой комисс есдүгээр сарын 7-нд хуралдаж, гуравдугаар сургуулийн үдийн цай хөтөлбөрт хамрагддаг бага ангийн 25 бүлгийн 810 хүүхдэд эрүүл мэндийн үзлэг, тандалт хийсэн. Тус сумын гуравдугаар сургууль нь 400 хүүхдийн хүчин чадалтай хэдий ч өнөөдрийн байдлаар дөрөв дахин их ачаалалтай 1600 хүүхэд суралцдаг гэдгийг албаныхан хэлж байв.