• Өнөөдөр 2024-03-29

Ж.АНУНАРАН: Монголын залуу уран бүтээлчдийн 7 төлөөлөл

2020-12-09,   3060

Энэ удаагийн “Оюунт Монгол” буланд уран бүтээлч, зураач Ж.Анунаран энэ цаг үед уран бүтээлээ туурвиж яваа долоон залуу уран бүтээлчийг нэрлэлээ.

Уран бүтээлч Ж.Анунаран нь метафор дүүрэн метафизик ертөнцийг анирдсан бүтээлүүдээрээ олонд танигдаж, орчин үеийн урлагийн чиглэлээр бүтээлээ туурвидаг уран бүтээлч билээ. Тэрбээр өөрийн өвөрмөц холимог техникийн арга ажиллагааг боловсруулж, даавуу, үзэг, зүү, утас, акрилик, тос, хэвлэл, эсгий зэрэг баялаг материалуудыг хооронд нь сүлэлдүүлж уран бүтээлээ туурвидаг билээ. Үүний үр дүнд зөөлөн, нарийвчлан шагласан арга ажиллагаанаас 3D хэлбэр бүхий ажлууд, фото зургийн суурьтай холимол маягийн бүтээлүүд төрдөг аж. Түүний нэрлэсэн долоон уран бүтээлчтэй танилцъя.

О.ҮРЖИНХАНД

Зураач О.Үржинханд бидний мэдэх “эмэгтэй” ертөнцийг монгол зургийн аргаар хүүрнэн өгүүлдэг бөгөөд ялангуяа эх хүний ертөнцийг түүний бүтээлээс тольдон хардаг. Эх хүнд байдаг нигүүлсэл, урсгал нандин чанар түүний бүтээлээс нэвт үнэртэх шиг болдог доо. Бүтээлийнх нь тийм зөөлөн мэдрэмж нь гал цогтой өнгө болон зэрэгцээ олон ертөнцүүд багтаасан зохиомжоор илэрдэг нь сонирхолтой.

Д.ДОРЖДЭРЭМ

Уран бүтээлч Д.Дорждэрэмийн бүтээлд байгаль, хүн, хүүхэд бүр үр хөврөл ч түүний гол илрэл болдог. Харин бүтээх хэл нь янз янз. Зураг, баримал, инстоляц, видео, фото байдлаар илэрхийлэх аргуудыг туршиж тухайн бүтээлийн илэрхийллээ бий болгодог. Бүтээлийнх нь дотогш алсарч, гүн гүнзгий бясалгалын байдалд оршиж буй нь үзэгчийг ч эрхгүй ховсдох шиг болдог.

Г.ГЭРЭЛХҮҮ

Залуу уран бүтээлч Г.Гэрэлхүү саяхан шинэ уран бүтээлийн үзэсгэлэнгээ дэлгэсэн. Түүний ажлууд хувь хүний дотоод ертөнцийг дурсамжийн дүрслэлээр баяжуулж, хорвоо дэлхийд болж буй зүйлсийг хөрвүүлэн илэрхийлдэг. Түүний монгол зургийн өнгө төрх хувиран комик зургийн дүрсийн хэлийг багтаасан шинэ хэллэг бий болгож буй.

Д.ҮҮРИЙНТУЯА

Зураач Д.Үүрийнтуяа уламжлалт монгол зургийн нарийн арга ажиллагаа бүхий завсрын өнгө ноёлсон бүтээлээрээ алдартай. Түүний ажлууд дүрс бүрийн цаана хоёрдмол утгыг агуулах мэт маш нууцлаг байдлаар өрнөдөг. Дүрүүд нь чимээгүй байдлаар үзэгчтэй яриа өрнүүлэх мэт үзэгч рүү хандсан эсвэл бүр тэднээс нуугдсан байдаг.  Ихэвчлэн уран бүтээлчийнх нь өмнөөс бүтээл нь ярих нууцлаг хэл бий болгосон мэт санагддаг.

Ж.ШИЖИРБААТАР

Ж.Шижирбаатар залуу уран бүтээлчийн төлөөлөл ба түүний ажлуудад биеэ хувилан орших залуу эмэгтэйчүүд дүрслэгдэх нь олонтаа. Ямар нэг зүйлд төвлөрөх тэдгээр дүрийг принт болон барлах техникийг багтаасан холимог арга техник бүтээлд нь илэрч байдаг.  Бүтээлүүд нь цайвраас эхлэн дулаан өнгүүдийг голлон явсаар чимээ аниргүй байдалд уусан нэгддэг.

Б.ОРХОНТУУЛ

Залуу бүтээлч Б.Орхонтуулын бүтээлд тун нягт нямбай арга ажиллагааг үзүүлж, илэрхийлж буй дүрүүд нь үргэлж ёгт утгыг агуулдгаараа онцлогтой. Зарим талаар тэдгээр дүрслэлд хаа холын дурсамж, өмнөх үеийн домоглог болон сюр хэллэг түгээмэл байх ба нэг талаар үзэгчийг автуулах нөгөө талаар гайхшруулах нь түүний бүтээлийн зорилго мэт.

Б.БАЯРЦЭНГЭЛ

Б.Баярцэнгэл нь шинэ залуу бүтээлч агаад ид  уран бүтээлийн эрэл хайгуулын дунд өөрийгөө эрэлхийлж буй, халуун уран бүтээлч. Түүний ажлууд завсрын өнгөөр голчилж, цаашлан гол дүрээ тодотгох байдлаар өрнөдөг. Мөн буддагийн дүр түүний бүтээлд онцгой дүрслэгдэнэ. Түүгээр хүний олон янзын төрх байдал, итгэл бишрэлийг харуулж, гүн гүнзгий хувийн орон зайг бүтээлээрээ илэрхийлдэг.


Ж.АНУНАРАН: Монголын залуу уран бүтээлчдийн 7 төлөөлөл
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3
  • Сэтгэгдэл үлдээсэн: 2020-12-14 09:29:24
    Tsetsegee : Saihan buteel uzeh harah setgeliin mash tom taashaal olon saihan aviyaslag zaluuchuud uuriin gesen ontslog gariin usegtei buteeluud hiij baigaa ni yutai saihan ... Ulam ikhiig hiigeerei huleegeerei tasraltgui bidniigee gaihashruulaarai
  • Сэтгэгдэл үлдээсэн: 2020-12-09 14:31:36
    хэхэ: Сонирхолтой жагсаалт бна. Гэхдээ дан зураач нарыг оруулсан нь тиймхэн
  • Сэтгэгдэл үлдээсэн: 2020-12-09 13:42:12
    Zochin: love talented people
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188