Непал, Төвдийн хил орчимд мөсөн гол нурж, хүчтэй үер, хөрсний нуралт үүссэний улмаас олон зуун хүн амиа алдаж, олон тооны суурин усанд автаад байна.

        Энэ үеэр Непалын армийн аврагчид үерт боогдсон Расува бүсээс 45 хоногтой ихэр нярай хүүхдүүдийг эсэн мэнд аварч, нисдэг тэргээр Нувакот дүүргийн Тришули аврах хуаранд хүргэжээ. Аврагдсан ихрүүдийг Непалын армийн эмэгтэй алба хаагчид тэвэрч, хувцаслан, тайвшруулж буй сэтгэл хөдөлгөм гэрэл зураг, бичлэг олон нийтийн сүлжээнд тархаж, хүмүүст итгэл найдвар, талархлын мэдрэмж төрүүлж байна.

      Непалд сүүлийн өдрүүдэд үргэлжлэн орсон аадар бороо, мөсөн голын нуралтаас үүдэлтэй үерийн улмаас амиа алдсан хүний тоо 362-т хүрээд байна. Мөн гамшгийн бүсэд 1,400 гаруй хүн сураггүйд тооцогдож байгаа бөгөөд аврагчид зузаан шавар, нуранги дундуур эрэн хайх ажиллагааг үргэлжлүүлж байна.

      Бхоте-Коши голын сав газар болон Расува, Нувакот, Каврэ, Катманду зэрэг дүүрэгт бүхэл бүтэн тосгонууд усанд урсаж, зам, гүүр, усан цахилгаан станцын туннелиуд ихээхэн сүйджээ.

      Непалын Дотоод хэргийн яамны мэдээлснээр, арми болон цагдаагийн алба хаагчид хамтран гамшгийн бүсээс 4,000 гаруй иргэнийг нүүлгэн шилжүүлж, хоол хүнс, эм тарианы тусламж үзүүлж байна. Үүний дотор Уппер-Тришули усан цахилгаан станцын туннельд гацсан 350 ажилтан болон нутгийн иргэдийг багтаасан нийт 883 хүнийг Расувагаас амжилттай аварчээ.