Төвөдтэй хиллэдэг бүс нутагт болсон хүчтэй үер, хөрсний нуралтын улмаас Непалд амиа алдсан хүний тоо 1000 давсан талаар тус улсын гамшгийн байгууллага мэдээллээ.

    Одоогоор 3900 гаруй хүн сураггүй байгаа бөгөөд тэдний 600 гаруй нь Тришули голын дагуух усан цахилгаан станцын төслүүдийн шавар, нурангиар дүүрсэн хонгилд гацсан байж болзошгүй ажилчид юм. Аврагчид хонгилууд руу хүчилтөрөгч шахаж байгаа бөгөөд өчигдөр нэг хонгилд нэвтэрсэн баг ямар нэгэн хүн олоогүй тул буцаж гарчээ. Непалын Ерөнхий сайд Балендра Шахийн мэдээлснээр, усан цахилгаан станцын төслүүдээс 279 хүнийг авран гаргасан байна. Аврах ажиллагааг Непал, БНХАУ-ын цэргийн алба хаагчдаас бүрдсэн олон улсын баг удирдаж байгаа бөгөөд Энэтхэг, Өмнөд Солонгос, Австралийн мэргэжилтнүүд мөн оролцож байна.

   Сураггүй болсон иргэдийн ар гэрийнхэн аврах ажиллагааг илүү шуурхай явуулахыг шаарджээ. Тэдний зарим нь хонгил дотор хүчилтөрөгчийн систем байгаа тул ажилчид амьд үлдсэн байх найдвараа хадгалж байгаагаа ярьсан байна.

   Австралийн инженер, Олон улсын хонгилын холбооны ерөнхийлөгч асан Арнольд Дикс Непалын эрх баригчдад алсаас зөвлөгөө өгч байгаа бөгөөд үерийн улмаас хонгилуудын байршлыг тогтооход хүндрэл үүссэн гэжээ. Түүний хэлснээр, тухайн бүс нутаг асар их хэмжээний хад чулуу, шавар, нурангид дарагдаж, “сарны гадарга мэт” болсон байна.

   Непал улс уулын гол мөрөн дагуух усан цахилгаан станцын төслүүдэд ихээхэн түшиглэдэг. Эрх баригчдын мэдээлснээр үерийн улмаас ашиглалтад орсон болон баригдаж байсан дор хаяж 11 усан цахилгаан станцын төсөл эвдэрчээ. Үүний зэрэгцээ амиа алдсан иргэдийн цогцсыг таньж тогтооход томоохон хүндрэл үүсээд байна. Эрүүл мэндийн яамны мэдээлснээр одоогоор олдсон 900 орчим цогцосны ердөө дөрөв орчим хувь нь танигдсан байна.

   Үерийн ус голын урсгалаар дамжин Читван дүүрэгт хүрч, энд 300 орчим хүний цогцос эрэг дээр гарч иржээ. Хөргүүрийн багтаамж хүрэлцэхгүй болсон тул танигдаагүй цогцсуудыг түр хугацаанд булшлах арга хэмжээ авч, дараа нь ДНХ-ийн шинжилгээгээр хэн болохыг тогтоосны дараа ар гэрийнхэнд нь шилжүүлэхээр ажиллаж байна.

Үер буусан газрын зураг

   Непалын Ерөнхий сайд Балендра Шах аврах ажиллагааг эрчимжүүлж байгаагаа мэдэгдээд, энэ удаагийн гамшиг нь уур амьсгалын өөрчлөлттэй холбоотойгоор Гималайн бүс нутагт нүүрлэж буй эрсдэл нэмэгдэж байгааг харууллаа гэжээ. Харин Төвөдийн талд БНХАУ-ын төрийн хэвлэлд мэдээлснээр 16 хүн амиа алдаж, 546 хүн сураггүй байна. Үерийн улмаас Непалтай хиллэдэг бүсийн барилга байгууламжууд их хэмжээгээр сүйдэж, өмнө нь хөл хөдөлгөөн ихтэй байсан хилийн боомтын хэсэгт нэг усан цамхгийн суурь л үлдсэн байна. Мөн БНХАУ-ын эрх баригчид хохирлын тоо албан ёсоор мэдээлснээс хавьгүй өндөр гэх мэт мэдээллийг цахим орчинд тараасан иргэдэд захиргааны шийтгэл ногдуулж эхэлсэн бол Непалд ч мөн үерийн талаар ташаа мэдээлэл тараасан гэж үзсэн цахим контентыг устгах арга хэмжээ авч байна.