Аливаа вакциныг гаргаж авахад олон жилийн судалгаа, клиникийн туршилтууд шаардагддаг ба цар тахлын энэ үед дэлхийн олон улс 2021 онд аюулгүй, үр дүнтэй коронавирусийн эсрэг вакцин гарган авахаар ажиллаж байна. Одоогоор 52 төрлийн вакцин хүн дээр туршиж байгаа бөгөөд 87 төрлийн вакцин амьтан дээр турших шатанд явж байна. Эхний шатанд туршигдаад, тодорхой бүс нутагт ашиглаж байгаа зургаан төрлийн вакцин байна. Гэхдээ аль ч вакцин нь бүрэн батлагдаагүй.

“Ковид-19”-ийн вакциныг өнгөрсөн гурван сараас эхлэн хүн дээр туршиж эхэлсэн бөгөөд үүний арван вакцин нь гурав буюу сүүлийн шатны туршилт дээр явж байна. Тийм хэдий ч цөөн төрлийн вакцин вирусийн эсрэг идэвхтэй эсрэг биет үүсгэж байна. Эдгээр вакцин нь халдвараас урьдчилан сэргийлэх бөгөөд эмчилгээний үр дүнтэй бус байгаа нь эрдэмтэн судлаачдын төдийгүй нийт хүн төрөлхтний санааг зовоосоор байна. Гэхдээ хамгийн үр дүнтэй байж болох вакцины туршилтын явцыг сонирхуулъя.

ОХУ-ын “Спутник V” вакцин

Энэ сарын 11-ний өдөр ОХУ-ын “Спутник V” вакцин 92 хувийн эерэг нөлөө үзүүлэх чадвартай гэдгийг мэдээлжээ. Гэсэн ч туршилтдаа олон тооны сайн дурын хүн хамруулж, үр дүнгийн нарийвчлалыг үргэлжлүүлэн судлах шаардлагатай байгааг судлаачид хэлж байна.  

Пфизерийн вакцин

АНУ болон Германы хамтарсан Пфизерийн вакцины эхэн үеийн судалгаанд уг вакцин 90-ээс дээш хувийн эерэг нөлөө үзүүлжээ. Тэд Зул сарын баяр гэхэд вакцин гаргаж авахаар хичээн ажиллаж байгаа хэмээн мэдээлсэн байна.

Мөн Япон, Хятад, Канад, Энэтхэг, Солонгос, Франц зэрэг олон орон коронавирусийн эсрэг вакциныг гуравдугаар буюу сүүлийн шатандаа туршиж байна.