Алдар нэр, олон хүний хайр хүндэтгэлийг хүлээх тусам өөрсдийн хэлсэн үг, хийсэн үйлдэлдээ хариуцлага хүлээх ёстой болдог. Учир нь нэр алдрыг нийгмийн үлгэр жишээ байх, зөв жишиг руу манлайлах үүрэг дагалддаг. Хэрвээ бодлогогүй ганц үг, үйлдэл нь олон нийтийн дургүйцлийг хүргэвэл карьер нь дуусаж болдог билээ. Тэгвэл олны дургүйцлийг хүргэж, бойкотлуулж, карьер нь унасан зургаан алдартны түүхийг хүргэж байна.

Ж.К. Роулинг

Алдарт "Харри Поттер" цувралын зохиолч Ж.К.Роулинг трансжендер хүмүүсийн тухай жендерийн мэдрэмжгүй үгс хэлснийх нь төлөө түүнийг шүтэн бишрэгчид нь бойкотолж байлаа. Тэрбээр трансжендер эмэгтэйчүүдийг "даашинзтай эрэгтэйчүүд" хэмээн өөрийн блогтоо урт гэгч нь трансфобиа нийтлэл бичжээ. Үүний дараа түүнийг бойкотолж эхэлсэн бөгөөд Хүний эрхийн шагналаа буцаан өгч, Австралийн номын дэлгүүр түүний бүх номыг лангуунаасаа авч байлаа. Уг явдлын талаар Роулинг "Миний хэлсэн үг трансжендер хүмүүсийг гадуурхаагүй" хэмээн бичсэн ч шүтэн бишрэгчид нь итгээгүй юм. Мөн уг явдлаас өмнө олон ч удаа иймэрхүү явдал давтагдсан байна. Уг явдалд "Харри Поттер" цувралын жүжигчин Даниел Радклифф шүтэн бишрэгчдээсээ түүний өмнөөс уучлал гуйж байжээ.

Ёширо Мори

Өнгөрсөн хоёрдугаар сард Японы Ерөнхий сайд асан, Токиогийн Олимпын хорооны Ерөнхийлөгч Ёширо Мори мэгтэйчүүдийн талаар сексист үг хэлснийхээ төлөө суудлаасаа огцорсон юм.

Тэрбээр Эмэгтэйчүүдтэй уулзах уулзалтын үеэр "Эмэгтэйчүүд хэт их ярьдаг" хэмээн хэлсэн нь олон нийтийн дургүйцлийг хүргэж, бойкотлох хөдөлгөөн өрнөжээ. Үүний дараа тэрбээр Олимп болохоос тавхан сарын өмнө суудлаасаа огцорч, олон түмнээс уучлалт гуйсан юм.  

Лю Ифэй

Өнгөрсөн жилийн намар "Мулан" кино нээлтээ хийх үед үзэгчид Хятад гаралтай, Америкийн жүжигчин Лю Ифэйг бойкотолж, "Мулан" киног нь үзэхгүй байх санал гаргаж байв. Учир нь тухайн үед Хонконгт иргэд ардчиллын төлөө жагсаж, цагдаа нар эсэргүүцэгчдэд хүч үзүүлсэн хэрэг гарсан билээ. НҮБ цагдаагийн хүчнийхнийг буруутгаж байв. Тэгвэл Лю Ифей өөрийн цахим хаягтаа Хонконгийн цагдаагийн хүчнийхнийг дэмжиж буйгаа илэрхийлж, "Хонконг ямар ичмээр юм бэ" хэмээн нэмж бичжээ. Дисней компани түүний нэр хүндээр Хятадад илүү орлого олж чадна хэмээн төлөвлөж байсан ч түүний уг үгнээс үүдэн байдал эсрэгээрээ эргэсэн байна.

Арми Хаммер

"Намайг нэрээрээ дуудаач" киноны жүжигчин Арми Хаммерын найз охинтойгоо харьцаж буй мессэж задарсны улмаас кинонд тоглох бүх гэрээгээ цуцлуулжээ. Тэрбээр найз охиндоо хүчирхийлэл үйлддэг байсан нь тогтоогдсон бөгөөд "Ханнибаллизм" утгатай мессэж нь илэрсний дараа бойкотолжээ. Уг хэргийн дараа түүний өмнөх найз охин нь мөн хүчирхийлдэг байсан талаар мэдээлсэн байна.

Вүүди Аллен

Алдарт кино найруулагч Вүүди Аллен жүжигчдэдээ бэлгийн хүчирхийлэл үйлддэг байсан хэрэг задарч "Me Too" хөдөлгөөний үеэр түүнийг бойкотолж эхэлсэн юм. Мөн тэрбээр өргөж авсан охинтойгоо насанд хүрээгүй байхад нь хайр сэтгэлийн холбоотой болсон нь бойкотлох бас нэгэн шалтгаан болжээ. Түүнтэй ахиж хамтрахгүй хэмээн олон жүжигчид мэдэгдсэн юм.

Жи Сү

БНСУ-ын жүжигчин Жи Сү-гийн талаар нэгэн нэрээ нууцалсан хэрэглэгч "Би Жи Сү-гийн ангийн найз нь байгаа юм. Тэрбээр арван жилдээ их дээрэлхүү хүүхэд байсан. Хүүхдүүдийг шалтгаангүй зодож, насанд хүрээгүй хүүхдэд хүчирхийлэл үзүүлсэн бичлэгээ найзуудтайгаа үзэж инээлддэг байсан" хэмээн бичсэн юм. Үүний дараа арван жилийнх нь нэг анги гэх хэд хэдэн хүмүүс хэрхэн хохирч байснаа бичиж, шүтэн бишрэгчид нь дургүйцлээ илэрхийлэх бойкотолж эхэлсэн юм. Түүнийг шүүхээс дуудсан бөгөөд өөрөө уг үйлдэлдээ гэмшиж байгаагаа илэрхийлсэн байна.