Эргэлт.мн мэдээллийн сайт баасан гараг бүрт сэрэмжлүүлэг болгох үүднээс “Хавтаст хэрэг” булангаа хүргэдэг билээ. Бид энэ удаад эрүүл мэнддээ анхаарч, дасгал хөдөлгөөн хийхээр яваад, гэмт хэргийн хохирогч болж, бусдад хүчирхийлүүлсэн ноцтой хэргийн хавтаст хэргийг хүргэж байна.

        Шүүгдэгч Т.М нь 2026 оны хоёрдугаар сарын 22-нд  Баянзүрх дүүргийн 26 дугаар хорооны нутаг дэвсгэрт байрлах Үндэсний цэцэрлэгт хүрээлэнгийн талбайд хохирогч Б.Ч ийн хүсэл зоригийн эсрэг хувцсыг нь тайлж, амыг нь дарж, ална шүү гэж заналхийлж бэлгийн харьцаанд орсон хэрэгт холбогджээ.

         Хохирогч Б.Ч  мэдүүлэхдээ “...Би өглөө болгон эрт босож Үндэсний цэцэрлэгт хүрээлэнгээр алхдаг. 2026 оны хоёрдугаар сарын 22-ны 05:00 цагт гэрээсээ гарч, алхахаар очсон. Хүрээлэнгийн хашаан дотор явж байтал нэг эрэгтэй араас дуудаад, “Хүүе ээ, яагаад ганцаараа явж байгаа юм бэ” гэж хэлээд араас бариад авсан. Тэр хүний царай харагдаагүй. Тэгээд миний ард гарчихаад "Би битүүний өдөр шоронгоос гарсан, би шийдчихсэн хүн, хашхирвал ална шүү" гээд намайг айлгаж, сүрдүүлсэн. Намайг чирч авч яваад нэг сандлын хажууд зогсоогоод “Доошоо тонгой” гэж хэлсэн. Мөн миний амыг дарж, амьсгалыг боогдуулсан. Би арга ядаад “Миний бие өвдөөд, эвгүй байна” гэхэд “Баашлаад байгаарай” гээд үснээс минь зулгаасан. Тэгээд намайг хүчиндсэн. Бүх зүйл дууссаны дараа “Мөнгө болчихоор юм байвал бүгдийг нь гарга" гэж хэлсэн. Би өөрийн халаасанд байсан гар утас болон гартаа байсан монетон /мушгиа хэлбэртэй, граммыг нь мэдэхгүй байна/ нэг ширхэг бөгжөө өгсөн. Тэгээд миний халаасыг ухаад, машины түлхүүр авч, “Чиний машин хаана байгаа юм бэ. Машин руу чинь очъё” гэж хэлээд намайг дарамталсан хэвээр байсан. Бид хоёр миний машин руу явахаар болж хүрээлэнгээс гарсан. Миний ард үлдээд утсаар ярихаар нь би зугтаж, цагдаагийн байгууллагад хандсан. Мөн тэр эрэгтэй намайг хүчиндэж, ёс бус аашилж байхдаа бичлэг хийж авсан” гэжээ.

        Шүүгдэгч Т.М мэдүүлэхдээ “...Би тэр өдөр Зайсанд байх найз З-ын ажил дээр Mongolz-ийн тогтолт үзсэн.  Тэр үедээ согтууруулах ундааны зүйл хэрэглэсэн. Тэгээд “Чухаг” хотхонд байрлах гэр рүү өөрийнхөө тээврийн хэрэгслийг унаад явсан. Би согтсон байсан учраас юу болсноо санахгүй байна. Ямартай ч Үндэсний цэцэрлэгт хүрээлэнгийн хажуу талын худалдааны төвийн зогсоол дээр зогссон. Нэг л мэдэхэд Үндэсний цэцэрлэгт хүрээлэн дээр нэг эмэгтэйг дагачихсан явж байсан. Тэр эмэгтэй миний урд алхаж яваад, дасгал хийсэн. Харанхуй байсан учраас “Шөнө яагаад ганцаараа явж байгаа юм бэ” гэж хэлсэн. Удалгүй би тухай эмэгтэйтэй хүчээр бэлгийн харилцаанд орсон. Бас тэр үед би утсаараа бичлэг хийж байснаа хальт санаж байна. Гэхдээ ямар бичлэг гэдгийг огт мэдэхгүй. Гэртээ орж унтчихаад, утсаа хартал нэг бичлэг байсан. Сандарсандаа үзэхгүйгээр тэр бичлэгийг устгаж, байхгүй болгосон. Би тухайн эмэгтэйгээс “мөнгө болох юм байна уу” гэж асуусан чинь шууд халаасандаа байсан гар утас, машины болон гэрийн түлхүүр, гараасаа нэг бөгж гаргаад өгсөн. Тэгээд хэсэг хугацааны дараа бид босоод тухайн эмэгтэйн машин руу очихоор явж байсан. Тэр эмэгтэй надаас “Миний гар утсыг өгчих өө” гэж гуйхад нь би гар утас, түлхүүрийг нь за би энүүгээр ч яах юм билээ гэж бодоод өгсөн. Мөн бөгжийг нь ч өгөх гээд халааснаасаа хайхад олдохгүй байсан. Тэгээд хоёулаа хамт машин руу нь явахаар болоод хойд зүг рүү хамт явж байсан чинь надтай хамт архи ууж тоглолт үзсэн найз маань над руу залгаад “Гэртээ харьсан уу” гэж залгасан. Утсаар ярих хооронд нөгөө эмэгтэй надаас холдоод явсан. Би араас нь дуудсан ч зогсохгүй болохоор нь өөрийнхөө машин руу шууд явсан” гэсэн байна.

      Шүүгдэгч Т.М-д Эрүүгийн хуулийн тусгай ангийн 12.1 дүгээр зүйлийн 1 дэх хэсэгт зааснаар хоёр жилийн хугацаагаар хорих ял, Эрүүгийн хуулийн 17.2 дугаар зүйлийн 1 дэх хэсэгт зааснаар нэг жилийн хугацаагаар хорих ял тус тус шийтгэсүгэй.