Фэйсбүүк ашиглаж бусдыг залилах, барьцаалах, гүтгэх, доромжлох, заналхийлэх, зөвшөөрөлгүй гэрэл зураг авах, дуу, дүрс бичлэг хийж дамжуулах, тараах, хувь хүний нууцад халдах худал мэдээлэл тараах зэрэг хэрэг хөл хорионы үеэр олон гарах болжээ. Хамгийн сүүлд гэхэд л хөгжлийн бэрхшээлтэй малчин залуу фэйсбүүкээр танилцсан эмэгтэйгээ дарамталж, өөрийн эрхшээлд оруулахыг санаархсан хэрэг гарсан байна. Иймд сэрэмжлүүлэг болох үүднээс дараах хэргийг ЭРГЭЛТ.МН мэдээллийн сайт “Хавтаст хэрэг” булангаараа тоймлон хүргэе.

Шүүгдэгч Ц нь ээжтэйгээ Ховд аймагт амьдардаг аж. Тэрбээр 1995 онд төрсөн бөгөөд бага ангийн боловсролтой, хөдөлмөрийн чадвараа 80 хувь алдсан нэгэн.  Ц өнгөрсөн 2020 оны тавдугаар сард фэйсбүүк ашиглан иргэн Д-ын нэр хүндэд халдсан илт худал мэдээлэл түгээжээ. Тодруулбал тэрбээр “…Энэ эмэгтэй бол биеэ үнэлэгч, худлаа хэлж биеэ үнэлээд, айлын нөхөртэй явдаг. Түүгээр ч зогсохгүй энэ эмэгтэй 3-4 залуутай явж байсан шүү, энэ биеэ үнэлэгч мөн биз дээ. Бас манай нөхөртэй яваад болохгүй байна, мессеж бичээд байна яах уу, хүмүүсээ...” гэх утга бүхий мэдээллийг олон нийтэд тараасан байна.

Хохирогч Д өөрийн нэр хүндэд халдаж, худал мэдээлэл тараасан Ц-гийн талаар мэдүүлэхдээ “Би Налайх дүүрэгт амьдардаг юм. 2020 оны гуравдугаар сард “^^^^^^^^^”  гэсэн фэйсбүүк хаягнаас миний “^^^^^^^^^”  хаяг руу найзын хүсэлт явуулахаар нь хүлээж авсан. Үүнээс хойш бид хоёр хоорондоо чат бичсээр байгаад дотно харьцаатай болж, бие биедээ “Хайртай, дуртай” гэх үгнүүдийг хүртэл бичилцэх болсон. Ц надтай видео дуудлага хийх үедээ “Нүцгэн биеэ харуулаач” гэхээр нь би бүх хувцсаа тайлаад биеэ харуулдаг байсан. Тэр ч гэсэн өөрийнхөө бэлэг эрхтнийг надад харуулдаг байлаа. Гэтэл 2020 оны тавдугаар сарын эхээр “Чиний фэйсбүүкээр хүн ороод байх шиг байна. Хайр нь шалгаад өгье” гэхээр нь фэйсбүүк хаягныхаа нууц кодыг өгчихсөн юм. Гэтэл миний кодыг өөрчлөөд, намайг нэвтрэх боломжгүй болгоод тухайн фэйсбүүкийг тэр залуу ашиглах болсон. Тэгээд би “Чамтай харьцахгүй” гэсэн чинь миний видео дуудлага хийж байсан үеийн нүцгэн зургуудыг өөр фэйсбүүк хаягнаас над руу явуулаад “Надтай харьцахгүй гэх юм бол энэ зурагнуудыг чинь олон нийтийн сүлжээнд тавина" гэж айлган сүрдүүлсэн. Уг таарамжгүй харилцааны улмаас  олон нийтийн сүлжээнд миний ээжийн “^^^^^^^^^” гэх фэйсбүүк хаяг дээр “Энэ хүүхэн манай нөхөртэй яваад болохгүй байна, яах уу” зэрэг намайг элдэв бусаар хэлсэн үг хэллэг бичиж, миний зураг, толгой хэсгийн зургийг нүцгэн хүний зурагтай эвлүүлж олон нийтэд түгээж, худал мэдээлэл тараасан, их гомдолтой байна” гэжээ.

Шүүгдэгч Ц өгсөн мэдүүлэгтээ “...Би хохирогчийг танина. Гэхдээ уулзаж байсан удаа байхгүй. Бид хоёр 2020 оны дөрөвдүгээр сараас эхлэн фэйсбүүкээр харьцаж байсан. Тэр надаас ямар нэгэн зүйл нэхэмжлээгүй байгаа. Би ямар нэгэн хохирол байвал төлнө” хэмээжээ.

Шүүгдэгч Ц нь хоёрдугаар ангийн боловсролтой бөгөөд эрүүл мэндийн шалтгааны улмаас сургууль завсарджээ. Тэрбээр ээжтэйгээ мал маллаж амьдардаг бөгөөд 2017 онд мотоциклээс унаж, нугас нь тасарч, хоёр гарнаас доош мэдээгүй болжээ. Мөн хөл дээрээ босож чадахгүй хүний асаргаанд байдаг аж. Хөдөлмөрийн чадвараа 80 хувь алдсан ч хэрэг хариуцах чадвартай болох нь шүүх сэтгэцийн шинжээчийн дүгнэлтээр тогтоогдсон байна.

Эрүүгийн хуулийн тусгай ангийн 13.14 дүгээр зүйлийн нэг дэх хэсэгт зааснаар шүүгдэгч Ц-г 550 мянган төгрөгийн торгох ялаар шийтгэжээ. Харин шүүгдэгчийн хөдөлмөрийн чадвар алдсан байдлыг харгалзан түүнд ногдуулсан 550 мянган төгрөгийн торгох ялыг зургаан сарын хугацаанд  хэсэгчлэн төлүүлэхээр тогтоосон байна.

Эх сурвалж: Монголын Криминологичдын холбоо