• Өнөөдөр 2024-03-29

ХАВТАСТ ХЭРЭГ: Салсан найз бүсгүйгийнхээ нүцгэн зургийг цахим сүлжээнд нийтлэх оролдлого хийгээд торгуулжээ

2020-12-26,   1468

“Эргэлт.мн” мэдээллийн сайт “Хавтаст хэрэг” булангийнхаа энэ удаагийн дугаарт бусдыг заналхийлэх гэмт хэрэг үйлдсэн этгээдийн хэргийг тоймлон хүргэж байна. 

Шүүгдэгч А хуучин найз бүсгүй Э-г архи, согтууруулах ундааны зүйл хэтрүүлэн хэрэглэсэн үед нь нүцгэн зураг, бичлэгийг зөвшөөрөлгүй авчээ. Ингээд өөртэй нь уулзах, үерхэхийг шаардаж, хууль ёсны эрх, ашиг сонирхолд нь хохирол учруулж болохуйц баримт, мэдээлэл буюу дээрх нүцгэн гэрэл зураг, бичлэгийг бусдад тараахаар сүрдүүлсэн гэмт хэрэгт үйлджээ.                                                    

Хохирогч Э мэдүүлэхдээ “А намайг унтаж байхад хувцас тайлж, нүцгэн зургийг минь авч “Чиний зургийг фэйсбүүкт тавина. Германы сайт дээр явуулж зарна. Чи надтай нохой шиг харьцсан тул би чамайг түмний шившиг болгоно”  гэж дарамталж айлган сүрдүүлсэн” гэжээ. 

Харин шүүгдэгч А мэдүүлэхдээ "...Бид 2018 оны арваннэгдүгээр сард танилцаад дөрвөн сар хамт амьдарсан. Эмнэлэгт хэвтэхэд нь би түүнтэй очиж уулзаагүйгээс болоод тусдаа амьдарцгаасан. Тэр орой “Бааранд найз хүүхэнтэйгээ байна” гээд дуудахаар нь очоод хамт уусан. Тэндээс гараад манайд ирээд пиво ууж байгаад хамт хоносон. Өглөө нь сэрээд хоёулаа нүцгэн байсан болохоор би Э-гийн хоёр ширхэг фото зураг дарчихсан. Буцаад унтаж байгаад сэрээд өглөөний цай хийх хооронд Э шууд гараад явчихсан юм. Тэгэхээр нь би араас нь чат бичээд хэрэлдсэн. Тэгээд уурандаа “Өглөө чиний зургийг чинь авчихсан. Салах гээд шалтаг хайгаад байгаа бол сал. Зургийг чинь интернетэд тавина”  гэж хэлсэн. Би Э-тэй эвлэрч, хамт амьдрах зорилгоор зургийг нь үзүүлж тараана гэж сүрдүүлсэн. Би Э-гийн зургийг өөр хүнд өгөөгүй. Олон нийтийн сүлжээнд тавиагүй. Гол зорилго нь дахин уулзаж, эвлэрэх санаатай байсан юм. Би зөвшөөрөлгүй зургийг нь дарсан буруугаа хүлээж байна. Уучлалт гуйж, цүнхийг нь төлж өгнө” хэмээн мэдүүлсэн байна.

Шүүхээс шүүгдэгч  А-г Эрүүгийн хуулийн тусгай ангийн 13.5 дугаар зүйлийн нэг дэх хэсэгт зааснаар нэг сая төгрөгөөр торгох ялаар шийтгэсэн байна.

 


ХАВТАСТ ХЭРЭГ: Салсан найз бүсгүйгийнхээ нүцгэн зургийг цахим сүлжээнд нийтлэх оролдлого хийгээд торгуулжээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188