ХАВТАСТ ХЭРЭГ: Өрхийн эмнэлэгт хууль бусаар үр хөндсөн эмчид ДӨРВӨН жилийн тэнсэн харгалзах ял оноожээ

Д. Чанцалдулам:
Эрэн сурвалжлах- Хавтаст хэргээс

2021-05-01, 2705

“Эргэлт.мн” мэдээллийн сайт “Хавтаст хэрэг” буландаа хууль бусаар үр хөндүүлж, саваа авахуулсан нэгэн эмэгтэйн хэргийг тоймлон хүргэж байна.

Шүүгдэгч Саран нь Баянзүрх дүүргийн 21 дүгээр хорооны нутаг дэвсгэрт байрлах Өрхийн эмнэлэгт эмэгтэйчүүдийн их эмчээр ажиллаж байхдаа хохирогч Гэрэлийн биед эмнэлгийн бус нөхцөлд хууль бусаар үр хөндөлт хийжээ. Үүний улмаас хохирогч Гэрэл нь умай тайруулах хагалгаанд орж умайгаа авахуулж, эрүүл мэндэд нь хүнд хохирол учирсан байна.

Хэргийн талаар эмэгтэйчүүдийн их эмч шүүгдэгч Саран мэдүүлэхдээ “Гэм буруугаа хүлээн зөвшөөрч байна. Хийсэн хэрэгтээ гэмшиж байна” гэжээ.

Хохирогч Гэрэл мэдүүлэхдээ “Би тэр өдөр эгч Навчаагийн хамт Саран эмч дээр очсон. Эмнэлэгт нь ороод үтрээндээ эм тавиулсан. Уг эмийг 2-3 минутын хугацаатай хийсэн бөгөөд тухайн эм нь савны амсар нээх үйлчилгээтэй эм гэж хэлсэн. Эм тавьж дууссаны дараа Саран эмч “Маргааш өглөө 09:00 цагт ир” гэж хэлсэн. Маргааш нь очиход үтрээнд хийсэн эмнээсээ дахин хоёр ширхгийг үтрээнд хийгээд “Өнөө орой гэхэд ураг чинь гарна” гэж хэлсэн. Тэгээд орой болоход өвдөлт өгөхгүй болохоор нь манай эгч Навчаа Саран эмч рүү залгаад “Ямар ч өөрчлөлт, өвдөлт алга байна. Яах ёстой вэ” гэж асуухад Саран эмч “Маргааш явуулчих ЭХО-д хараад үзье” гэж хэлсэн байгаа юм. Маргааш өдөр нь би эгч Цэцэгтэй хамт Саран эмч дээр очиж ЭХО-д харуулсан.

Саран эмч ЭХО-д харсныхаа дараа “Хүүхэд доошоо байрлалд орсон байна. Даваа гарагт хүрээд ир” гэж хэлсэн. Тэр өдөр нь очиход ЭХО-д хараад “Савны амсар нэг хуруу талтай нээгдсэн байна. Гарах болоогүй байна” гэж хэлсэн.

Анх тавьсан эмээ үтрээнд дахиад тавьсан тэгээд мезопростол нэртэй гурван ширхэг эм өгөөд “Энэ эмийг гурван цагийн зайтай нэг ширхгээр нь уу, маргааш ирээрэй” гэж хэлсэн. Маргааш нь очиход “Эх нялхсын эмнэлэгт оч. Би маягт бичээд өгье” гээд Навчаа эгч рүү утсаар яриад “Дүү чинь жаахан цус алдсан, Эх нялхас руу хэвтэх бичиг хийгээд өгье. Ирээд дүүгээ ав” гэж хэлсэн” хэмээн мэдүүлжээ.

Хохирогч Гэрэлийн эгч Навчаа мэдүүлэхдээ “Гэрэлийн найз охин дөрвөн сартай байхдаа Саран эмч дээр очиж эм уугаад хүүхдээ гаргуулж байсан гэж Гэрэл надад хэлсэн. Ингээд Гэрэл бид хоёр эмчтэй уулзахад “180 мянган төгрөгөөр үтрээнд эм тавьж гарах юм байна” гэж хэлсэн. Би “Хямдруулж болох уу” гэж асуухад эмч “Харин ч би хямдхан хийж байна. Тэр эмийг нь олоход хэцүү. Хэрвээ эм олдох юм бол би маргааш өглөө хэлье” гэсэн. Би мөнгийг нь төлсөн.Саран эмч над руу залгаад “Өмд аваад ир” гэж хэлсэн. Ингээд би дүү Цэцэгээг эмнэлэг рүү явуулсан. Дараа нь би эмнэлэг дээр очоод гутал гадуур хувцсыг нь авахад гутал нь цус, өмд нь битүү цус, нөж болсон байсан. Би эмч рүү нь залгаад “Юу болсон юм бэ. Яагаад ийм их цус алдсан юм” гэхэд “Эгчийгээ уучлаарай” гэсэн. Тэгээд Эх нялхас дээр байлгаж байгаад хагалгаанд орж саваа авахуулсан. Эх нялхсын эмч нарын ярьж байгаагаар “Ус гараад удсан, сав нь бактеритай байна” гэсэн байна.

Хохирогч Гэрэлийн эгч Цэцэгээ мэдүүлэхдээ: “Би сольж өмсөх өмд аваад очиход Гэрэлээ Саран эмчийн өгсөн өмд гэж хэлээд цэнхэр өнгийн даавуун өмд өмсчихсөн зогсож байхаар нь хувцсыг нь сольж өмсүүлээд Эх нялхсын эмнэлэгт дүүгээ хүргэж өгсөн. Тухайн үед Саран эмч надад хэлэхдээ “Эм тариа хэрэглэсэн талаар юу ч хэлж болохгүй шүү. Гэртээ байж байгаад л гэнэт ус нь гарчихлаа гэж хэлээрэй” гэхээр нь би Саран эмчийн зааж өгсөн үгийг нь хэлээд очсон.

Шүүхийн Шинжилгээний Үндэсний Хүрээлэнгийн шинжээчийн дүгнэлт: Гэрэл нь төрөх насны залуу эмэгтэй тул эхлээд умай авахгүйгээр эрхтнийг хадгалах, идээт үрэвслийг намдаах, эмийн эмчилгээ хийгээд үр дүн муу, өвчтөний биеийн байдал сайжраагүй тул эхийн амь насыг аврах зорилгоор идээт голомтыг арилгах буюу умай тайрах эцсийн арга болох мэс засал хийсэн нь эмчилгээний тактикийн хувьд зөв байна. Жирэмслэлт таслах оролдлого хууль бус аргаар хийснээс хүндрэл үүсч умай тайрах мэс засал хийгдсэн байна. Энэ нь хүнд зэргийн гэмтэл болно.

Шинжээч эмч мэдүүлэхдээ “Хохирогч Гэрэл нь өөрийн эрүүл мэндийн боловсрол муу, бусдын үгэнд итгэж хууль бус аргаар жирэмслэлтийг таслуулах оролдлого хийлгэж удсанаас өгсөх замын халдвар болж хүндрэл үүсч умайг тайрах мэс ажилбар хийгдсэн байна” гэжээ.

Шүүхийн зүгээс шүүгдэгч эмч Саранг эх барих, эмэгтэйчүүдийн чиглэлээр, мэргэжлийн үйл ажиллагаа явуулах, эрүүл мэндийн тусламж, үйлчилгээ үзүүлэх тусгай зөвшөөрөлтэй ч эмч эмнэлгийн бус нөхцөлд үр хөндсөний улмаас хохирогчийн эрүүл мэндэд хүнд хохирол учруулсан. Энэ нь гэмт хэргийн шинжийг агуулж байх тул эрүүгийн хариуцлага хүлээлгэх үндэслэлтэй гэж шүүх үзжээ. Шүүхээс түүнд хорих ялыг ногдуулахгүйгээр дөрвөн жилийн тэнсэн, үүрэг хүлээлгэх албадлагын арга хэмжээг ногдуулсан байна.

ЖИЧ: Хохирогчийн нэрсийг өөрчилсөн болно.

Эх сурвалж: Монголын Криминологичдын холбоо

ХАВТАСТ ХЭРЭГ: Өрхийн эмнэлэгт хууль бусаар үр хөндсөн эмчид ДӨРВӨН жилийн тэнсэн харгалзах ял оноожээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2020-12-11 17:05:18

amidraliin gai: oorsdoo гуйж ircheed emchiin amidrald gai bolood... hogiin batsaan, hogiin ail bna. emchiin huuhed bish dee, haana yu hiij yawaagaa ooroo medej bsan bizde

Шинэ мэдээ

Нийтлэлчид