Хүүхдээ зөв байрлалаар хөхүүлэх, хэвтээгээрээ хөхүүлэхгүй байх, нярай хүүхдийн ам хамрыг хөхөөр, хөнжил, хучлагаар дарах, хучих зэргээр болгоомжгүй үйлдэл үзүүлэх, эх нойрмоглон хөхөөрөө хүүхдээ дарахаас сэрэмжлүүлэхээс үүднээс “Хавтаст хэрэг” булангаараа нэгэн харамсалтай хэргийг тоймлон хүргэе.

Монгол Улсын Эрүүгийн хуулиар “Эх хүүхдээ хөхүүлэх явцдаа унтаж, хөхөөрөө амыг нь дарснаар хүүхэд амьсгалах боломжгүй болж, амьсгал бүтэлтэд орж болзошгүй байх үр дагаврыг урьдчилан мэдэх боломжтой байсан боловч ухамсарлан ойлгоогүй, мэдэлгүй үйлдэж гэм буруугийн болгоомжгүй хэлбэрээр хүний амь насыг хохироосон гэм буруутай үйлдэл”-ийг Эрүүгийн хуулийн 10.6 дугаар зүйл “Хүний амь насыг болгоомжгүйгээр хохироох” гэмт хэрэгт тооцож зохих хариуцлагыг ногдуулдаг байна. 

 Шүүгдэгч А нь 20.. оны .. сарын 5-6-нд шилжих шөнө  унтаж байхдаа хоёр сартай охиноо хөхөөрөө дарж, амийг нь болгоомжгүйгээр хохироосон гэмт хэрэгт холбогджээ. Тэрбээр мэдүүлэхдээ ... “Охиноо өвөртлөөд унтсан. 02:00 цаг өнгөрч байхад хүүхдээ хөхүүлсэн. Хэвтээгээрээ хөхүүлж байгаад унтсан байсан. 06:00 цаг өнгөрч байхад сэрэхэд хүүхэд сонин байдалтай байхаар нь эмнэлэг дуудсан. Ядраад байсан учир тэр шөнө өөрийн эрхгүй нойр хүрээд байсан. Би гурван настай хүү, 56 хоногтой охиныхоо хамт орон дээр, нөхөр газар унтсан. Талийгаач охин маань уушгиндаа хатгалгаатай гээд эмнэлэгт хэвтээд гарч ирээд удаагүй байсан. Би буруу зүйл хийсэн. Сэтгэлээс хэзээ ч гарахгүй юм. Маш их харамсаж байна” гэжээ.

Талийгаачийн аав мэдүүлэхдээ “Манай эхнэр хоёр хүүхэдтэйгээ хамт орон дээр унтсан бөгөөд би газар ганцаараа газар унтсан. Манай эхнэр орон дээрээ унтахдаа том хүүгээ урдуураа, бага охиноо голдоо өөрөө захдаа унтсан байсан. Тэгээд үүрээр 06:00 цаг болж байхад эхнэр гэнэт орилоод “Охины царай хөхөрчихсөн байна ш дээ.  Би дараад унтчихсан байна. Чи босоод ир” гэхээр нь босоод очиход охины царай болон уруул хөхөрчихсөн байхаар нь би очоод охиныхоо цээжин дээр дарж хиймэл амьсгаа хийгээд амьсгалахгүй байхаар нь түргэнд дуудлага өгсөн бөгөөд түргэн тусламж тав орчим минутын дараа ирээд охиныг үзээд “Нас барчихсан” байна гэж хэлсэн” гэжээ.

Шинжээчийн дүгнэлтээр “Хүүхдийн үхлийн шалтгаан нь ам хамар дарагдсанаас үүссэн механик амьсгал бүтэлт болно. Хүүхдийг хөхөөр дарах тохиолдолд ам, хамар дарагдах, цээж, хэвлий дарагдах зэргийн улмаас амьсгал бүтэлт үүсдэг” гэжээ. Шүүхийн  зүгээс шүүгдэгч А-г гэмт хэрэг үйлдсэн гэм буруутайд тооцож Эрүүгийн хуулийн ерөнхий ангийн 7.1 дүгээр зүйлийн нэг дэх хэсэгт заасныг журамлан Эрүүгийн хуулийн тусгай ангийн 10.6 дугаар зүйлийн нэг дэх хэсэгт зааснаар шүүгдэгч А-д нэг жилийн хугацаагаар тэнссэн харгалзах ял оноожээ.

Эх сурвалж: Монголын Криминологичдын холбоо