Дагавар охиноо зодож, гэр бүлийн хүчирхийлэл үйлдсэн тухай дуудлага цагдаагийн байгууллагад иржээ. Тодруулбал, өнгөрсөн нэгдүгээр сарын 23-24-нд шилжих шөнө Б нь дагавар охиноо зодож, хүнд гэмтээжээ. Дуудлагын дагуу цагдаагийн албан хаагчид мөрдөн шалгах ажиллагаа явуулж, хэргийг шүүхэд шилжүүлсэн байна.

Тодруулбал, шүүгдэгч Э.Б нь согтууруулах ундааны зүйл хэрэглэсэн үедээ дагавар охин М.М-ыг “Ээжийгээ өмөөрсөн” гэх шалтгаанаар зодож, хутганы ишээр цохиж, түлхэж, нүүр хэсгээр нь ширээ мөргүүлж, хөл дээр нь гишгэх зэргээр гэр бүлийн хүчирхийлэл үйлдсэн байна. Үүний улмаас хохирогч М-ийн зүүн зулайн хуйханд шарх, зөөлөн эдийн няцрал, дээд уруулын дотор салст, хоёр шилбэ, баруун тавхайд цус хуралт зэрэг гэмтэл учирчээ.

              Мөрдөн шалгах ажиллагааны явцад шүүгдэгч Б мэдүүлэхдээ “Би хийсэн үйлдэлдээ маш их гэмшиж байна. Миний буруу” гэжээ.

              Хохирогч М.М ын мөрдөн шалгах ажиллагааны шатанд өгсөн “...Шөнө гэртээ унтаж байтал хойд аав Б гаднаас согтуу орж ирээд ээжийг элдэвээр хэлээд байсан. Тэгээд гал тогооны өрөөнд ширээ, хана руу цохиод дуу чимээ гаргаад байхаар нь би явж очоод “Маргааш ажлын өдөр, унтаж амармаар байна” гэхэд надаас хэрүүл өдөөд байсан. Тэгсэн чинь ээж босож ирээд “Чи эрүүлдээ энэ асуудлаа ярь” гэсэн чинь ээжийг түлхээд унагаачихаар нь би Б г “Одоо боль” гэхэд намайг ор руу түлхээд унагаачихсан. Тэгээд “Чиний ээж архичин, чи ч архичин, чи орой үдэш юу хийж явдаг юм, энэ тэнд хэвтэж байдаг байлгүй” гээд дахиад намайг түлхсэн. Би унахдаа орон дээр байсан жижиг хураагддаг ширээг нүүрээрээ мөргөсөн. Үүний улмаас уруулын дотор талд цус хурсан байсан. Би маргааш нь ажилтай байсан болохоор ажлын хувцсаа өмсөөд ээжийн араас гарах гэтэл Б  баруун гартаа хутга, зүүн гартаа заазуур барьчихсан, “Чи эмч гэлүү, үхсэн хүн ямар байдгийг харуулна” гээд далайхаар нь айгаад нүүрээ дараад доош харсан чинь толгойн дээр нэг удаа хутганы ар хэсгээр хүчтэй цохисон” гэжээ.

                  Гэрч Э.М гийн мөрдөн шалгах ажиллагааны шатанд өгсөн “...2022 оны нэгдүгээр сарын 23-24-нд шилжих шөнө Бэлх-10-аас “Хажуу айлын хүн эхнэрээ зодоод байх шиг байна” гэсэн дуудлагын дагуу очиход нэг эгч гадаа гарч ирсэн зогсож байсан. Тухайн хүнтэй уулзахад “Манай нөхөр агсам тавиад байна” гэхээр нь гэр рүү нь ороход хаалга нь цоожтой байсан. Хаалгыг нь онгойлгоход 30-35 орчим насны эрэгтэй хүн гартаа хутга, заазуур барьчихсан зогсож байсан. Бид гарт нь байсан хутга, заазуурыг нь газарт тавиулаад, шууд машин руугаа аваад гарсан. Буцаж ороод гэрт байсан охиноос юу болсон талаар тодруулж мэдүүлэг авахад “Хойд аав Б нь ээжийг гарсны дараа хаалга хааж байгаад намайг ор руу түлхэж унагаагаад хутга барьж над руу далайгаад “Чи үхсэн хүн ямар байдгийг мэдэх үү, чи эмч гэлүү гэж хэлээд нэг удаа толгойны дээд хэсэгт цохисон” гэж хэлсэн” гэсэн байна.

      Шүүхээс шүүгдэгч Б буюу гэр бүлийн хүчирхийлэл үйлдсэн этгээдийг 500 мянган төгрөгөөр торгох ял оноожээ.