Сүүлийн жилүүдэд өсвөр насны хүүхдүүдийн мансууруулах бодистой холбоотой гэмт хэрэгт холбогдох тохиолдол нэмэгдэж байгаа. Үүнтэй холбоотойгоор “Хавтаст хэрэг” булангийнхаа энэ дугаарт “Өвс” гэх сэтгэцэд нөлөөт бодис хууль бусаар хадгалж, түүгээрээ “Шавар” гэх мансууруулах бодис үйлдвэрлэж байсан хэргийг сэрэмжлүүлэг болгон хүргэж байна.

Шүүгдэгч Б нь 2022 оны нэгдүгээр сарын 11-ний өдөр нийслэлийн Сонгинохайрхан дүүргийн ... хороо, Баянхошууны ... тоотод орших гэрийнхээ гадаах угаалгын машинд “Өвс” гэх нэршилтэй хориотой бодис хадгалж, түүгээрээ “Шавар” гэх нэршилтэй мансууруулах бодис хийж, тамхины асаагуурт нааж, ямарваа нэгэн зорилгогүйгээр хууль бусаар худалдаалж байсан хэрэгт холбогджээ. 26 настай эрэгтэй Б нь урьд өмнө нь ял, шийтгэл эдэлж байгаагүй бөгөөд “Өвс” гэх сэтгэцэд нөлөөтэй бодисыг 2021 оны аравдугаар сарын 24-ний өдөр орон нутгийн нэгэн амралтын газар орчмоос 242.9 граммыг гурван саванд хийж, бэлтгэн Улаанбаатар хот руу оруулсан байна.

Уг хэргийн талаар шүүгдэгч Б-гийн гэр бүлийн хүн, гэрч Э мэдүүлэхдээ “Би нөхрөө мансууруулах бодис хэрэглэж, хадгалж байна гэж сэжиглэж, таамаглаж байсан удаа байхгүй. Харин 20 гаруй хоногийн өмнө гадуур явж байгаад орой гэртээ орж ирээд хажуугаар зөрөхөд нь Б-гээс сонин хурц, тамхины үнэрнээс өөр үнэр үнэртэхээр нь “Ямар муухай үнэр үнэртээд байгаа юм бэ. Юу хийсэн. Яасан юм бэ” гэж асуухад өөдөөс “Юу ч хийгээгүй, яагаа ч үгүй” гээд л өнгөрсөн. Харин цагдаад шалгагдаж эхэлсэн үеэс нь хойш бодоход л тэр үед тийм муухай зүйл хэрэглээд орж ирсэн юм болов уу гэж бодож байна. Өөрөөр тэр хашаанд байдаг угаалгын машиныг хоёр жил гарангийн өмнө хашаанд гаргаж тавиад орхисон байсан юм.

             2021 оны аравдугаар сарын сүүлээр юм болов уу. Яг хэдний өдрийг нь тодорхой хэлж мэдэхгүй байна. Манай нөхөр ахынхаа “Приус-20” маркийн машинтай, найз Ч, түүний найз охин Н, Т, түүний найз О нарын хамтаар зургуулаа  .......аймгийн  ....... сумын нутаг руу агаар салхинд гарахаар өглөөдөө яваад оройдоо буцаж ирсэн. Манай нөхөр цагдаад шалгагдаж эхэлснийх нь дараа ямар учиртай талаар нь асуухад “ ....... рүү явах үедээ өвс түүж, та нарт мэдэгдэлгүй авч ирсэн” гэж байсан’’ гэжээ.

             Харин шүүгдэгч Б-тэй хамт “Өвс” түүхээр явсан гэх түүний найз, гэрч Ч мэдүүлэгтээ “2021 оны аравдугаар сарын 20-ны үеэр. Хэдний өдөр гэдгийг нь санахгүй байна. Манай найз Т, Б бид гурав өөрсдийн найз охин болон эхнэрээ дагуулаад зургуулаа Б-гийн тухайн үед унаж байсан “Приус-20” маркийн машинтай  .......аймгийн  ....... сумын нутагт байх ахмадын амралтын ойролцоох амралтын газарт өглөө очоод өдөржин тэндээ байж байгаад оройдоо 19:00-20:00 цаг болж байх үед буцаж ирсэн. Би амралтын газарт Б-г өвс, ургамал түүж бэлтгэсэн талаар мэдээгүй, Б-тэй хамт мансууруулах бодис хэрэглэсэн зүйл байхгүй” гэсэн байна.

Шүүгдэгч Б-гийн гэрээс мөрдөн шалгах ажиллагааны үеэр эд мөрийн баримтаар хурааж авсан хажуу хэсэгт нь хоёр цоолсон хуванцар сав, хуйлсар 50 төгрөгийн мөнгөн дэвсгэрт, бараан өнгийн зүйлээр бохирдсон шаазан аяга, тал плиткаг тусгай химийн шинжилгээнд оруулахад НҮБ-ын 1971 оны “Сэтгэцэд нөлөөлөх бодисын тухай конвенц”-ийн II жагсаалтад багтдаг “Дельта-9” гэх сэтгэцэд нөлөө бодис илэрчээ. ШШҮХ-д хүргүүлсэн зип лок ууттай, шар өнгийн асаагуурын хоёр талд наасан шавар шиг зүйлийг мөн химийн шинжилгээнд оруулахад 0.4246 грамм мансууруулах бодис илэрсэн байна.

Монгол Улсын Эрүүгийн хуулийн тусгай ангийн 20.7 дугаар зүйлд заасан сэтгэцэд нөлөөт бодисыг хууль бусаар бэлтгэсэн, хадгалсан, олж авсан гэмт хэрэг нь нийгмийн аюулын шинж чанар, хор уршиг ихтэй, энэ төрлийн бодис нь олон нийтийн эрүүл мэндэд болон нийгэмд хортой үр дагавартай учир тухайн төрлийн бодис, эм бэлдмэлийг хууль бус аргаар олж авах, хадгалах, тээвэрлэх, илгээх, борлуулах, түгээх, тарьж ургуулах, боловсруулж бэлтгэхэд чиглэсэн аливаа үйл ажиллагаа, уг төрлийн бодисын үндэстэн дамнасан хууль бус аливаа эргэлтийг хориглож, олон нийтийн аюулгүй байдал, ашиг сонирхлын эсрэг гэмт хэргийн төрөлд хамааруулж үндэсний хууль тогтоомж болон Олон улсын гэрээ, конвенцид заасан байдаг. Улмаар шүүгдэгч Б-гийн “Мансууруулах сэтгэцэд нөлөөт бодисыг худалдаалах зорилгогүйгээр хууль бусаар бэлтгэсэн, хадгалсан,” үйлдэл нь Эрүүгийн хуулийн ерөнхий ангийн 3.2 дугаар зүйлийн 1 дэх хэсэгт заасныг тус тус журамлан мөн хуулийн тусгай ангийн 20.7 дугаар зүйлийн 1 дэх хэсэгт заасан гэмт хэргийн шинжийг хангасан учир хорих ялаар шийтгүүлэх хууль зүйн үндэслэлтэй юм.

Харин шүүгдэгч Б нь шүүхийн хэлэлцүүлгийн үеэр “Би хийсэн хэрэгтээ гэмшиж байна. Миний ар гэрийн байдлыг харгалзаж үзэж, надад хөнгөн ял оногдуулж өгнө үү” гэсэн учир түүний Эрүүгийн хуулийн ерөнхий ангийн 3.2 дугаар зүйлийн 1 дэх хэсэгт заасныг журамлан мөн хуулийн тусгай ангийн 20.7 дугаар зүйлийн 1 дэх хэсэгт зааснаар улсын яллагч Ц.Урангуагаас шүүгдэгч Б-д нэг жилийн хугацаатай хорих ял ногдуулсан байна.