Бусдын биед санаатайгаар халдаж, хүчирхийлэх гэмт хэрэг хаалттай хаалганы цаана өдөр бүр гарч байна гэхэд хилсдэхгүй. Тэр дундаа бага насны хүүхдийг хүчирхийлэх жигшүүрт хэрэг гарсаар байна. “Хавтаст хэрэг” буландаа хүчирхийлэх гэмт хэргийн золиос болж байгаа охид, эмэгтэйчүүдийн хэргийг тоймлон хүргэж байна.

1989 онд төрсөн, бүрэн дунд боловсролтой эрэгтэй Ү нь эхнэрийнхээ дүүг хүчирхийлж, хүчиндсэн гэмт хэрэг үйлджээ. Шүүхээс түүний гэм бурууг дэнсэлж, нэг жилийн тэнсэн харгалзах ял оноосон байна.

Хавтаст хэрэгт хуульд заасан үндэслэл журмын дагуу цуглуулж, бэхжүүлсэн нотлох баримтуудаас шүүхийн хэлэлцүүлэгт яллах болон өмгөөлөх талын хүсэлтээр дараах нотлох баримтуудыг шинжлэн судалжээ.

          Хохирогч Г мөрдөн шалгах ажиллагааны явцад өгсөн мэдүүлэгтээ “Би Баянзүрх дүүргийн .. тоотод өөрийн төрсөн эгч М.Ганцэцэгийн гэрт 2021 оны арванхоёрдугаар сарын 12-ны өдөр хүүхэд харах хүнгүй болоод очсон. Манай эгч Г ээлжийн ажилтай учир гэртээ байхгүй байдаг. Арванхоёрдугаар сарын 20-нд хүргэн ах Ү ажлаасаа бууж ирээд, ганцаараа архи уусан. Би 18:00 цагийн үед ажлаасаа гэртээ ирээд эгчийн хоёр, өөрийнхөө нэг хүүхдэд хоол хийж өгөөд, унтахаар ороо зассан. Унтах гээд 01:00 цаг орчмын үед хүргэн ах өрөөнд орж ирээд, намайг орноос босгож татаад, зочны өрөөнд оруулаад, учир зүггүй хүзүүн дээр үнссэн. Би ахад “Та яагаад байгаа юм, болиоч” гэхэд “Юун сүртэй юм бэ” гээд үнсэх гээд байхаар нь би том охиныг нь дуудаж, сэрээсэн. Том охин А босож ирээд, гэрэл асаахад хүргэн ах үйлдлээ зогсоосон. Тэгээд би хүргэн ахад “Би явлаа” гэж хэлсэн. Гэтэл хүргэн ах уучлалт гуйгаад “Ах нь ахиж ийм зүйл гаргахгүй, эгчдээ битгий хэлээрэй” гэсэн. Би тухайн үед нь “Үгүй, явлаа” гэхэд хүргэн “Тэгвэл би чамтай унтаж байж сална” гээд намайг гаргахгүй, зочны өрөөнд хажуудаа хүчээр суулгаад, босох гэхээр дарж аваад байхаар нь би толгойгоороо хүргэний хамар руу мөргөж, цус гаргасан чинь босоод цусаа угаахаар явсан. Буцаж ирэхдээ хоолны халбага авч ирээд, өөрөө хувцсаа тайлаад “Орон дээр хэвт, үгүй бол би хүчээр хэвтүүлнэ” гэж хэлээд байсан. Би “Үгүй” гэхэд хоолны халбагаар миний нуруу, бөөр, мөр хэсэгт нь цохиод, “ална” хэмээн сүрдүүлж, намайг буйдангийн зүүн тал руу түлхэж унагаагаад, хувцас тайлах гэж дайрч байхдаа миний нуруу орчим гараараа урсан. Би эсэргүүцэхэд өөрөө орон дээр хэвтээд, миний ар талаас гараараа боогоод, амьсгалж чадахгүй болохоор буцааж суллаад, буцааж боож байсан. Тэгээд надад “Чамтай заавал бэлгийн харьцаанд орж байж санаа амарна, үгүй бол миний амьдрал нэгэнт дууссан” гэж хэлээд байхаар нь би ахиж орилоод, дүү А-г дуудахад хүргэн Ү унтлагын өрөө рүү орсон. Би тухайн үед эгч Г рүү ярьж, болсон асуудлын талаар хэлсэн. Хүргэн Ү надтай бэлгийн харьцаанд хүчээр орох гэж оролдож, хувцас тайлах гэж оролдож байгаад биеийг маань маажсан. Миний хүзүүнд хүрч үнсээд, хөхнөөс барьсан. Толгойгоор ор мөргүүлсэн, хоолой боосон, өмд тайлах гэж нуруу маажсан. Урьд өмнө нь намайг оролдож байгаагүй. Анх удаа л ийм асуудал болж байна” гэж мэдүүлжээ.

           Хохирогчийн эгч, Г-ийн мөрдөн шалгах ажиллагааны явцад өгсөн мэдүүлэг “Би 2021 оны арванхоёрдугаар сарын 20-ны өдөр 24:00 цагийн ээлжинд гараад ажил дээрээ байхад манай гэрт түр хугацаагаар оршин суух болсон миний төрсөн дүү Г над руу шөнийн 03:00 цагийн орчимд утсаар залгаж, миний нөхөр Ү архи согтууруулах ундааны зүйл хэрэглэсэн үедээ миний охин дүүтэй хүчээр бэлгийн харьцаанд орохыг завдаж, хүч хэрэглэсэн үйлдэл хийсэн талаар хэлсэн. Ү-ын ариун цэврийн өрөө рүү орсон хооронд нь Г хүүхдээ авч зугтааж гарсан талаараа надад утсаар хэлсэн. Ү бид хоёрын харилцаа хэсэг хугацаанд салж, нийлсэн байдалтай л байдаг болохоор хаагуур, юу хийж явдаг талаар бүрэн сайн мэдэхгүй байна” гэжээ.

Яллагдагч Ү өгсөн мэдүүлэгтээ  “Би тэр үед гэртээ их хэмжээний архи уугаад унтаж байх үед манай гэрт түр байрлахаар болсон миний эхнэрийн төрсөн дүү Г ажлаа тарж ирээд манай хоёр хүүхэд, өөрийнхөө нэг хүүхдийг авч, унтлагын өрөөнд унтахаар хэвтэцгээсэн юм байна лээ. Тэгээд би нэг мэдсэн чинь том өрөөний хивсэн дээр Г-г хэвтүүлчихсэн, түүний хажууд нь өөрөө хэвтээд өмдийг нь тайлахаар оролдож байсан. Би гурван хоног дараалан архи ууснаас болж тасарсан үедээ хадам дүүгийн өмдийг тайлахаар завдан, түүнийг гомдоосондоо маш их гэмшиж байна” гэжээ.

Шүүгдэгчийн гэм буруугийн талаар:

             Ү нь өөрийн эхнэр Г-ийн төрсөн дүү, 29 настай, эмэгтэй Г-н хүсэл зоригийн эсрэг буюу нуруу, бөөр, мөр хэсэгт нь хоолны халбагаар цохиж, түлхэж унаган, хоолойг нь боож, бэлгийн харьцаанд орохыг завдсан болох нь тогтоогдлоо. Шүүх шүүгдэгч Ү-д ял ногдуулахад Эрүүгийн хуулийн ерөнхий ангийн 6.5, 6.6 дугаар зүйлд заасан эрүүгийн хариуцлагыг хүндрүүлэх болон хөнгөрүүлэх нөхцөл байдал тогтоогдоогүй тул шүүгдэгчид прокурорын саналын хүрээнд эрүүгийн хариуцлага хүлээлгэхээр шийдвэрлэв. Шүүгдэгч А Ү-г хохирогчийн хүсэл зоригийн эсрэг хүч хэрэглэж бэлгийн харьцаанд орохыг завдсан гэмт хэрэг үйлдсэн гэм буруутайд тооцсугай. Эрүүгийн хуулийн ерөнхий ангийн 2.8 дугаар зүйлийн 1, 7.1 дүгээр зүйлийн 1 дэх хэсэгт тус тус заасныг журамлан мөн хуулийн тусгай ангийн 12.1 дүгээр зүйлийн 1 дэх хэсэгт зааснаар шүүгдэгч Ү-д хорих ял ногдуулахгүйгээр нэг жилийн хугацаагаар тэнссүгэй. Эрүүгийн хуулийн ерөнхий ангийн 7.1 дүгээр зүйлийн 3, 7.3 дугаар зүйлийн 3 дахь хэсгийн 3.3 дахь заалтад тус тус зааснаар Ц.Ү.ад тэнссэн хугацаанд согтууруулах ундаа, мансууруулах бодис хэрэглэхийг хязгаарлах хязгаарлалт тогтоох албадлагын арга хэмжээ хэрэглэсүгэй.

Ийм хүчирхийллийн золиос болж буй охид, эмэгтэйчүүд та бүхнийг өөрсдийгөө хамгаалж, хууль хяналтын байгууллагад хандаж, хэргийг нуун далдалдахгүй, бусдыг өөгшүүлэхгүй байхыг анхааруулж, сэрэмжлүүлэх үүднээс энэхүү мэдээллийг нийтэллээ.