Өсвөр насны хүүхдүүд нэгнээ зодож, танхайрах, эрх чөлөөнд нь халдаж, эрүүл мэнд болон амь насанд нь хохирол учруулах хэрэг сүүлийн жилүүдэд нэмэгдэж байна. Өөрөөр хэлбэл, хүүхэд үйлдсэн, хүүхдээс улбаатай гэмт хэрэг гарах нь ихсэж байна гэсэн үг. Иймээс эцэг, эхчүүд, асран хамгаалагч та бүхнийг өсвөр насны хүүхдүүддээ тавих анхаарал халамжаа сулруулахгүй байх, хараа хяналт тавьж байхыг анхааруулах үүднээс дараах “Хавтат хэрэг”-ийг хүргэж байна.

18 настай, эрэгтэй Э  насанд хүрээгүй хүүхдүүдтэй зодолдож, нэгийг нь хутгалж, гэмтээсэн хэрэгт холбогджээ.

          Насанд хүрээгүй хохирогч Х.Д мөрдөн шалгах ажиллагаанд мэдүүлэхдээ “...Баянзүрх дүүргийн 27 дугаар хороо, Шинэ буудлын орчим очиход саравчинд 10 гаруй хүүхэд сууж байсан. Тэр хүүхдүүд бидэн рүү хутга бариад дайрсан. О.Сүх-Очир гэдэг хүүхэд нь миний гуя руу хутгалсан. Гэхдээ би хутгалуулсанаа тухайн үед мэдээгүй, гэнэт хөл өвдөөд байхаар нь үзсэн чинь цус гарсан байсан. Гэртээ очоод байж байхад Эбо гэх залуу AG AICO гэх хаягнаас “Цагдаа сэргийлэхээр явж хэрэггүй, эм тарианы чинь мөнгийг өгье” гээд байсан. Зодоон болсон өдөр хэнд хутгалуулсанаа би огт мэдээгүй. Тэгээд надад чатаар Э гэдэг хүүхэд холбогдоод “Манай найз О.Сүх-Очир чамайг хутгалсан” гэж хэлэхээр нь цагдаад мэдүүлэг өгөхдөө О.Сүх-Очир хутгалсан гэж хэлсэн...” гэжээ.

        Харин насанд хүрээгүй гэрч О.Сүх-Очир мөрдөн шалгах ажиллагаанд мэдүүлэхдээ “...Э буюу Эбо бид нар руу гүйж ирээд “Бүгдээрээ над руу бөөнөөрөө дайрахаар нь айсандаа хутгаар хутгалчихлаа” гэж хэлсэн. Тэгээд бид нар явцгаасан. Дараа нь Эбо “Цагдаагаас намайг хайгаад байна. Шоронд явуулах гээд байна, чи миний өмнөөс хутгалсан гээд хэлчихээч” гээд байсан...” гэсэн байна.

           Яллагдагч Э мөрдөн шалгах ажиллагаанд мэдүүлэхдээ “...Талбайн цаана байдаг гудамжнаас танихгүй 20 орчим хүүхэд гарч ирээд орилоод, хараал хэлээд байсан. Бид нар өөдөөс нь очсон чинь нэг банди “Үзэх үү, нэг нэгээрээ хүрээд ир” гээд манай найз Сүх-Очир тэд нарын урдаас очсон чинь гудамж руу бүгдээрээ зугтаачихсан. Бид нар хөөгөөд гүйсэн чинь тэд нар бид нар руу чулуу шидээд, манайхан зугтаагаад би гудамжинд ганцаараа үлдсэн. Тэгсэн над руу Д гэх хүүхэд дайраад ирэхээр нь би газраас төмөр аваад цохисон чинь гуя руу хатгачихсан.  Тэгсэн Д надаас зугтаагаад би ч тэд нараас зугтаагаад яваад өгсөн. Өөр ямар нэгэн маргаан зодоон болоогүй. Маргааш  нь над руу Д залгаад сааданд хүрээд ир уулзъя, гуя гэмтээсэн байна гэж хэлсэн. Тэгээд би сааданд яваад очсон чинь Дүүрэнбаяр өөрөө ирээгүй...” гэжээ.

 ШҮҮХИЙН ШИЙДВЭР

1. *******г хүний эрүүл мэндэд хөнгөн хохирол санаатай учруулсан буюу Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан гэмт хэрэг үйлдсэн гэм буруутайд тооцсугай.

2. Монгол Улсын Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар *******д 250 /хоёр зуун тавь/ цаг нийтэд тустай ажил хийлгэх ял шийтгэсүгэй.

3. Эрүүгийн хуулийн ерөнхий ангийн 5.4 дүгээр зүйлийн 2 дахь хэсэгт зааснаар *******д оногдуулсан нийтэд тустай ажил хийлгэх ялыг өдөрт наймаас дээшгүй цагаар тогтоосугай.

4. Эрүүгийн хуулийн ерөнхий ангийн 5.4 дүгээр зүйлийн 4 дэх хэсэгт зааснаар *******д нь нийтэд тустай ажил хийлгэх ялыг биелүүлээгүй бол нийтэд тустай ажил хийлгэх ялын найман цагийн ажлыг нэг хоногоор тооцож хорих ялаар солихыг дурдсугай.