Шүүгдэгч Н.Ч нь 2021 оны арваннэгдүгээр сарын 22-ны өдрийн 17:35 минутын орчим Сонгинохайрхан дүүргийн ... дугаар хороо ... зам буюу ... гудамжны баруун замд ... ХХК-ны эзэмшлийн Huyndai маркийн ... улсын дугаартай автобусыг жолоодож явжээ. Тэрбээр замын хөдөлгөөнд оролцох үедээ зорчих хэсэг дээр замын цас арилгаж байсан Л.Б-ийг автобусны арын хэсгээр цохиж унаган, эрүүл мэндэд нь хүндэвтэр хохирол учруулсан хэргийг “Хавтаст хэрэг” буландаа онцолж, сэрэмжлүүлэг болгон хүргэж байна.

             Хохирогч Л.Б мэдүүлэхдээ “Эхнэр бид хоёр хамт ТҮК-д ажилладаг юм.  Тэр өдөр цагаа бүртгүүлээд ажилдаа гарсан. Дөрөвдүгээр буудлаас ертөнцийн зүгээр хойшоо чиглэлд эцэс рүүгээ замын цасыг цэвэрлэж, би боржурыг, эхнэр явган замыг шүүрдэж байсан. Би зорчих хэсэг дээр зогсоод цас хүрздээд байж байтал хажуугаар өнгөрч байсан автобус хойд хэсгээрээ миний баруун ташаа руу шүргэж, намайг газарт унагаасан. Автобусны жолооч бууж ирээд “Түргэн дуудаж өгье, яаж байна, цагдаа дуудах уу” гэхээр нь би “Хөл зүгээр бадайрч байна” гэж босон. Тэгээд жолоочид “Гайгүй байна. Та яв яв”  гэхэд “Би буцаад рейс хийчхээд ирье” гээд явсан. Тухайн үед хөл гишгэж болохгүй байсан. Би ажлынхаа залууг дуудаж эцэс ороод үзүүлэхэд хөлийн шилбэ, шагай хугарсан гэж хэлээд, эмнэлэгт долоо хоног хэвтэж хагалгаа хийлгэсэн” гэжээ.

           Гэрч болох эмэгтэй буюу хохирогчийн эхнэр мэдүүлэхдээ “Би өөр тийшээ хараад хогоо цэвэрлэж байсан. Гэтэл нөхөр маань “Яая” гээд хашхираад явчихсан. Би эргэж хараад “Яасан бэ” гэхэд “Автобус намайг бөгсөөрөө цохичихлоо” гэсэн. Тэгээд автобусны жолооч бууж ирээд “Түргэн дуудах уу, цагдаа дуудах уу” гэхэд манай нөхөр “Хэрэггүй, гайгүй байна” гээд эд явуулсан. Тэр жолоочийг өмнө нь танихгүй бөгөөд жолооч буцаад ирье гээд явсан. Б хөл нь гишгэж чадахгүй байсан тул би түшээд машиндаа оруулаад эцэс хүртэл аваад явсан. Эцэс дээр очоод 20:00 цаг хүртэл нөгөө жолоочийг хүлээсэн боловч ирэхгүй байхаар нь Гэмтлийн эмнэлэг орсон. Гэмтэлд хоног хэвтэж, хагалгаанд ороод гарсан. Нөхрийг маань автобус аль хэсгээрээ шүргэснийг би хараагүй. Яая гэхийг нь сонссон...” гэсэн байна.

              Тус хэргийн улмаас хохирогч Л.Б-ийн эрүүл мэндэд хүндэвтэр гэмтэл учирсан байх бөгөөд хохирогч нь эмчилгээ хийлгэсэнтэй холбоотой 417.561 төгрөгийн баримт гаргаж өгчээ. Мөн шүүгдэгч Н.Ч нь 1.200.000 төгрөгийг хохирогчид төлж барагдуулсан, хохирогч нь “1.200.000 төгрөг өгсөн учир санал гомдолгүй болсон” гэх хүсэлтийг гаргасан байх тул шүүгдэгч Н.Чийг энэ тогтоолоор бусдад төлөх төлбөргүй гэж үзжээ.

         Харин шүүгдэгчийг... ХХК-нд жолооч хийдэг буюу ажил хөдөлмөр эрхэлдэг зэрэг хувийн байдлыг нь тус тус харгалзан прокуророос гаргасан саналын хүрээнд шүүгдэгч Н.Ч-т Эрүүгийн хуулийн тусгай ангийн 27.10 дугаар зүйлийн 1 дэх хэсэгт зааснаар 500 нэгжтэй тэнцэх хэмжээний буюу 500.000 төгрөгөөр торгох ял ногдуулж, гурван сарын хугацаанд төлүүлэхээр шийдвэрлэсэн байна.

Иймээс замын хөдөлгөөнд оролцож байгаа жолооч нарыг сэрэмжтэй байхыг, аюулгүй байдлаа хангаж, хүний эрүүл мэнд, амь насанд аюул учруулахгүй байхыг анхааруулж байна.