Яллагдагч  С.Б нь  2019-2020 онд дагавар охиноо хүчирхийлсэн хэрэгт холбогджээ. Тодруулбал, Хэнтий аймгийн ... суманд хойд эцэг Б нь дагавар охин О-ын бэлэг эрхтэнд хэл, гараа хийх зэргээр бэлгийн харьцааны шинжтэй хүч хэрэглэсэн үйлдэл хийж, хүчиндсэн гэх гэмт хэрэгт холбогдсон байна. Энэ тухай дуудлага цагдаагийн байгууллагад өнгөрсөн тавдугаар сард ирж, мөрдөн шалгах ажиллагаа явуулжээ. Хойд эцэг болох Б-д холбогдох хэргийг шүүхэд шилжүүлж, шүүхээс тавдугаар сарын 27-нд хянан хэлэлцсэн байна.

             Шүүгдэгч С.Б нь өгсөн мэдүүлэгтээ “Тухайн өдөр гэрийнхээ гадна машиндаа архи уугаад гэртээ орсон. Охин надад гурван хоног хоол хийж өгөөгүй болохоор гомдож, загнасан. Гэтэл миний урдаас хэрэлдэж, бид маргалдаад би нэг удаа алгадаж, түлхэж унагаасан юм. Тэгээд охин уурлаад гараад явахаар араас нь гарч яваад олоогүй. Гэтэл намайг цагдаад хүчиндсэн гээд гомдол гаргачихсан байна лээ. Эхнэр Ё.А  надаас салах зорилготойгоор охиноо хүчиндсэн гэж худал өргөдөл гаргасан гэж бодож байна” гэжээ.

          Харин хохирогч охин О хэлэхдээ “2020 онд манай хойд эцэг архи уучихсан гэртээ орж ирээд, намайг элдэв янзаар харааж загнасан. Тэгээд гэрт хэн ч байгаагүй учир миний хувцсыг тайлж, хүсээгүй байхад бэлэг эрхтнийг минь оролдож, гар хуруугаа хийсэн. Би хөл муутай болохоор эсэргүүцэл үзүүлж чадахгүй, Б-ийг дийлэхгүй байсан. Би үүрээр 04:00 цаг өнгөрч байхад хөл нүцгэн гэрээсээ гарч зугтаж, хойд айлаасаа тусламж гуйсан. Мөн өмнө нь ээжийг Хятад руу явсан хойгуур хойд эцэг Б миний хөлийг барьж өгсөн. Эхлээд шилбэ барьж байгаад “Мэдрэлийн судас нь дээшээ байдаг юм” гээд миний гуя руу барьж эхэлсэн. Тэгээд намайг оролдоод байсан. Би гэр бүл байхгүй, 25 настай. Хойд эцэг, эхийн хамт амьдардаг. Гэхдээ гомдол санал байхгүй учир хойд эцэг Б-д бага ял оноож өгнө үү” гэжээ.

Шүүхээс хойд эцэг Б-д таван жилийн хорих ял оноожээ.