Бусдын эд зүйлсийг хулгайлж, шүүхээс 1.2 жилийн хорих ял сонссон Н-нд холбогдох хэргийг сэрэмжлүүлэг болох үүднээс “Хавтаст хэрэг” буландаа онцолж байна.

         36 настай, эмэгтэй, бүрэн дунд боловсролтой, үсчин гоо сайханч мэргэжилтэй, ээжтэйгээ хамт амьдардаг Б.Н нь  2021 оны наймдугаар сарын 2-нд Баянзүрх дүүргийн V хорооны нутаг дэвсгэрт байрлах орон сууцны цонхоор нэвтэрч, Самсунг Эс-21 загварын гар утсыг хулгайлж, 2.564.050 төгрөгийн хохирол учруулсан гэмт хэрэгт холбогджээ.

          Шүүхийн хэлэлцүүлэгт шүүгдэгч Б.Н- өгсөн мэдүүлэгтээ “Гэм буруугаа хүлээн зөвшөөрч байна. Найз А-ийн гар утсыг төлөхийн тулд би хуучин хамтран амьдрагчийнхаа гэрт нууцаар орж, гар утсыг нь авсан. Авсан гар утсаа А-д өгсөн. Бид хоёр өмнө нь хамт архи уухдаа А-ийн гар утсыг зараад, хэрэглэчихсэн юм. Тэгээд А намайг гар утас төлж өг гэж байнга хэлдэг байсан” гэжээ.

         Харин хохирогч  Б.Ц өгсөн мэдүүлэгтээ  “... 2021 оны долдугаар сарын 31-ний 22:00 цагийн орчим ажлаа тараад гэр рүүгээ харих замдаа өмнө нь хамтран амьдарч байсан Н гэх хүүхэнтэй таарсан. Бид хоёр манай гэрт Н-ын авчирсан архийг хувааж уугаад хоносон. Маргааш нь гэрээс гарахад Н намайг "Гар утсаа аваач" гэхээр нь би “Хаячихна” гээд үлдээгээд гарсан. Тэгээд би ажилдаа яваагүй, Н-тай нийлээд гудамжинд таарсан хүмүүстэй архи ууж байгаад орой нь гэртээ орж, амарсан. Өглөө нь гар утсаа үзэхэд үлдээсэн газар байхгүй байсан. Би хажуу айлынхаа гэр рүү ороод камер шүүж үзэхэд Н манай гэрийн цонхоор ороод, буцаж хаалгаар гараад явж байгаа дүрс бичигдсэн...” гэж мэдүүлсэн байна.

Шүүгдэгч Н хохирогч Ц-ийн нэхэмжилсэн 2.564.050 төгрөгийг төлж, хохиролгүй болгожээ.

          Шүүхээс Б.Н-ыг Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1 дэх заалтад заасан “Бусдын эд хөрөнгийг хүч хэрэглэхгүйгээр, нууцаар, хууль бусаар хулгайлах” гэмт хэргийг “хүн байнга амьдрах зориулалттай орон байранд нэвтэрч” хүндрүүлэх шинжтэй үйлдсэн гэм буруутайд тооцжээ. Эрүүгийн хуулийн ерөнхий ангийн 1.4 дүгээр зүйлийн 1 дэх хэсэгт зааснаар,  “Энэ хуульд заасан гэмт хэрэг үйлдсэн нь шүүхээр тогтоогдсон гэм буруутай хүнд эрүүгийн хариуцлага хүлээлгэнэ” гэж заажээ.

Б.Н-д Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1 дэх заалтад заасан ялын төрөл, хэмжээний дотор шүүгдэгчийн үйлдсэн гэмт хэргийн нийгмийн аюулын шинж чанар, хэр хэмжээ, гэм буруугийн хэлбэрт тохирсон эрүүгийн хариуцлага хүлээлгэх нь хууль зүйн үндэслэлтэй бөгөөд шударга ёсны зарчимд нийцнэ.

        Шүүгдэгч Б.Н-ын үйлдсэн гэмт хэргийн шалтгаан, нөхцөл байдал, хохирол, хор уршгийн шинж чанар, хэр хэмжээ, гэм буруугаа хүлээн зөвшөөрч буй шүүгдэгчийн хувийн байдал, түүнд хүлээлгэх эрүүгийн хариуцлагын талаарх улсын яллагчийн санал, дүгнэлт зэргийг тал бүрээс нь харгалзан үзэж, Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1 дэх заалтад хэсэгт зааснаар шүүгдэгчид нэг жил хоёр сарын хугацаагаар хорих ял ногдуулж, уг ялыг нээлттэй хорих байгууллагад эдлүүлэхээр шийдвэрлэв.