Сэлэнгэ аймгийн малчин айлд Улаанбаатар хотоос очсон 16 настай хүү хонь хариулахаар явганаар гараад сураггүй алга болсон талаар бид мэдээлсэн билээ. Тодруулбал, Баянгол сумын Баян багийн Баяны энгэр болон Хавчуу гэдэг газарт өнгөрсөн нэгдүгээр сарын 30-ны өдрийн 10:00 цагийн орчимд 16 настай эрэгтэй А нь хонь хариулахаар яваад сураггүй алга болсон юм. Алга болсон хүү тус сумын малчин О-гынд буюу эмээгийндээ Улаанбаатар хотоос өнгөрсөн оны арванхоёрдугаар сард очсон байдаг.

Баянгол сумын онцгой, ЗДТГ-ынхан, малчид нийлсэн 100 гаруй хүн морь болон машинтай эрэн хайх ажиллагааг явуулсан. Эрлийн явцад алга болсон хүү нь нэгдүгээр сарын 30-ны 20:13 цагт үүрэн холбооны “Скайтел” ХХК-ийн дугаараар Улаанбаатар хотод дуудлага хийж, хүнтэй ярьсан нь цагдаагийн байгууллагын шалгалтаар тогтоогдсон тул эрэн хайх ажиллагааг зогсоогоод байсан юм.

Тэгвэл хүүгийн цогцос Баянгол сумын нутаг дэвсгэрээс олджээ. Эх сурвалжийн мэдээлж буйгаар “Талийгаачийн цогцос гэрээс нь хойд зүгээс олдсон. Онцгой байдал, цагдаагийн алба хаагчид талийгаачийг Улаанбаатар хотод дуудлага хийсэн нь тогтоогдсон гээд эрлийн ажиллагааг зогсоогоод байлаа. Үүрэн холбооны “Скайтел” ХХК-ийн дугаараар дуудлага хийсэн байна гэж тухайн үедээ мэдэгдсэн. “Скайтел” ХХК-иас шүүгээд Сэлэнгэ аймгийн Дулаанханд, мөн Улаанбаатар хотод явж байна гээд байсан юм. Гэтэл тэр мэдээлэл худлаа байсан юм билээ. Малчид, нутгийнхан, ар гэрийнхэн, ЗДТГ-ын ажилтнууд зогсолтгүй эрлийг зохион байгууллаа. Эрэл мухардаж, ар гэрийнхэн нь цогцос байсан хэсэгт хайж үзэх санал тавьснаар очиж үзсэн.  Яг ямар байдалтай байсныг нь нарийвчлан хэлэх боломжгүй. Манай суманд 4-5 цагдаа хэргийг шалгаж, ажиллаж байгаа” гэх мэдээллийг өгөв. Мөн өөр нэг эх сурвалжийн мэдээлж буйгаар хүүгийн цогцос олдсон газар нь эмээгийнхээс нь хол, зайтай байсан гэнэ. Түүнчлэн хүү төөрч тэнд очоогүй гэдгийг хэлж байлаа.

Харин бид нөхцөл байдлын талаар тодруулахаар талийгаач 16 настай А-гийн ээжтэй холбогдоход “Хүүгийнхээ цогцсыг олсон. Өөр ямар ч мэдээлэл өгөх боломжгүй. Шаардлагатай бол Онцгой байдлын газар, хэргийг шалгаж байгаа цагдаагаас тодруулаарай” гэв.

Талийгаач хүү арваннэгдүгээр ангийн сурагч байсан бөгөөд хөл хорио тогтоож, сургууль амарсантай холбоотойгоор эмээгийндээ мал маллахаар очоод байсан юм.