Сүхбаатар, Чингэлтэй, Баянзүрх дүүргийн эрүүгийн хэргийн шүүгч Х.Идэр, З.Болдбаатар, Булган аймгийн шүүгч Д.Отгонбаатар, өмгөөлөгч Б.Баасанцогт, АТГ-ын ажилтан П.Чулуунбаатар зэрэг нэр бүхий  хууль хяналтын байгууллагад ажилладаг хүмүүс Баянзүрх дүүргийн 26 дугаар хороонд байрлах “Parkview” хотхоны 752 дугаар байрны ... тоотод цугларчээ. Мөн тэдний байгаа орон сууц руу 20 гаруй насны охид, эмэгтэйчүүд ар араасаа цувран ирж, орсон хяналтын камерийн дүрс  бичлэг олон нийтийн сүлжээнд тавигдаад байгаа билээ. Тэднийг зохион байгуулалтайгаар биеэ үнэлэлт зохион байгуулсан гэх мэдээлэл мөн цацагдаад буй.

Шүүгчдэд биеэ үнэлсэн хэрэгт холбогдоод буй эмэгтэйчүүдийн өмгөөлөгч Б.Баттулга өчигдөр хэвлэлийн хурал зарлаж, мэдээлэл өгөв. Тэрбээр “Бичлэгт нэр дурдагдсан нэр бүхий шүүгч, албан тушаалтнуудыг прокурорын зөвшөөрөлгүйгээр цагдаагийн байгууллагаас дагасан, тагнасан, мөрдсөн байж болзошгүй байна. Энэ нь Эрүүгийн тухай хуулийн 21.13-т заасан гүйцэтгэх ажиллагааны хууль, тогтоомж зөрчсөн үйлдэл. Бичлэгт гарсан эмэгтэйчүүдийг цагдаагийн байгууллагын эрх бүхий албан тушаалтнууд  амралтын өдрүүдэд ажлын бус цагаар гэрээс нь баривчилж, олон цагаар байцаасан. Ингэхдээ хэрэгт холбогдуулан эрүү шүүлт тулгасан байж болзошгүй байгаа. Бичлэгт дурдагдсан эмэгтэйчүүдийг ингэж хүч хэрэглэн байцаасан нь Монгол Улсын Үндсэн хуулийн 16.13 дахь халдашгүй дархан эрхийг зөрчсөн байж болзошгүй. Мөн орцны бичлэг үзээд тухайн хүмүүсийн нэр хүндийг зохион байгуулалттайгаар гутааж байгаа нь хүний эрхийн тунхаг болон олон улсын факт, Үндсэн хуулиар олгогдсон эрхийг нь зөрчлөө” гэсэн юм.

Тэгвэл шүүгчдэд биеэ үнэлсэн гэх эмэгтэйчүүдийн өмгөөлөгч нар ТЕГ-т гомдол гаргажээ. Тэд цагдаагийн байгууллагын холбогдох албан тушаалтнууд бичлэгт дурдагдсан шүүгч нар болон эрх бүхий албан тушаалтнуудыг хууль бусаар дагасан, тагнасан, мөрдөн мөшгисөн, гүйцэтгэх ажлын хууль зөрчсөн гэмт хэрэг үйлдсэн байж болзошгүй. Цаашлаад дээрх бичлэгийг цахим орчинд байршуулж, зохион байгуулалттайгаар тарааж байгаа үйл явдалд хамтран оролцсон байж болзошгүй нөхцөл байдал байгаа тул харьяаллын дагуу дээрх гэмт хэргийг шалгуулахаар ТЕГ-т хандаж байгаа аж.

Мөн Эрүүгийн цагдаагийн албаны мөрдөгчид гэрч нараас байцаалт авахдаа айлган сүрдүүлсэн, дарамталсан, хууль бус арга хэрэглэн мэдүүлэг авсан байж болзошгүй тул уг асуудлаар УЕПГ, НПГ, ХЭҮК болон тусгай субьектийг шалгах хэлтэст хандсан байна.  

            Мөн эмэгтэйчүүдийн өмгөөлөгч нар УЕПГ-т “Эрүүгийн цагдаагийн албаны мөрдөгч Насанжаргал, Билгүүдэй, Анарчулуун нар нь Эрүүгийн хэрэг хянан шийдвэрлэх тухай хуулийг ноцтой зөрчиж, нотлох баримт цуглуулсан хариуд хариуцлага тооцож,  хэргийг өөр мөрдөгчдөд шилжүүлж өгнө үү” хэмээн хүсжээ. Харин УЕПГ-аас өмгөөлөгч нарын гомдлыг шалгуулахаар Нийслэлийн прокурорын газарт хүргүүлсэн болохоо мэдэгдсэн байна.

Өөрөөр хэлбэл, шүүгчдэд биеэ үнэлсэн гэх эмэгтэйчүүдээс байцаалт авсан цагдаа нарыг Нийслэлийн прокурорын газраас шалгахаар болсон гэсэн үг. Мөн бичлэгтэй холбоотойгоор мэдэгдэл гаргаж, хүлцэл өчсөн "Parkview” хотхоны СӨХ болох “Биг кастел” ХХК-ийн дарга Н.Долгорсүрэнг оршин суугчынхаа бичлэгийг хууль бусаар бусдад өгсөн гэх үндэслэлээр цагдаагийн байгууллагад шалгуулахаар гомдол гаргажээ.

Хэрэв шүүгч нар биеэ үнэлэгч авсан нь батлагдвал 50 мянган төгрөгөөр торгох хуулийн заалттай гэнэ. Зөрчлийн тухай хуулийн 6.18 дугаар зүйлийн 6.18.4-т заасны дагуу биеэ үнэлэгч нарын хууль бусаар олсон орлогыг хурааж, биеэ үнэлэгч авсан этгээдүүдийг тус бүр 50 мянган  төгрөгөөр торгох хуулийн заалттай аж.