-Дорноговь аймгийн Замын-Үүд сум дахь төрийн байгууллагын толгой дээр суусан эрх мэдэлтнүүд албан тушаалаа урвуулан ашиглаж, олон тэрбум төгрөгийн авлигын сүлжээг бий болгосон уу-

            Монголчуудын ачаа Эрээний гудамжаар хөглөрч, бараагаа хүлээсэн жолооч сар гаруй хугацаанд машиныхаа кабинд унтаж, нийлүүлэлт нь удааширсан бизнес эрхлэгчид ээлж дараагаар дампуурсан гээд монголын эдийн засгийн гол урсгал болсон Замын-Үүд сүүлийн хэдэн сар хүнд байдалд байгаа. Төрийн үйлчилгээ тэр чигтээ “гацсан” дээрх асуудал авлигачдаас үүдэлтэй гэдгийг эх сурвалжууд онцолж байна.

ХЯЗГААР НУТАГТ “ХААН” СУУСАН ДАРГА НАРЫН БАРИВЧИЛГАА

            Сүүлийн хэдэн өдөр монголын урд хилд томоохон үйл явдлууд өрнөж байна. Тухайлбал, энэ сарын 2-ны өдөр Монгол Улсын Ерөнхий сайд Л.Оюун-Эрдэнэ Дорноговь аймгийн Замын-Үүд суманд ажиллалаа. Тэрбээр, хилийн авто тээврийн зохион байгуулалт, хилийн боомтын өргөтгөлийн барилгын ажлын явцтай танилцсан юм. Энэ үеэр Ерөнхий сайд “Замын-Үүд дэх нөхцөл байдал 30 хоногт сайжрахгүй бол албан тушаалтнуудад хариуцлага тооцно” гэдгийг онцолж байв. Үүгээр зогсохгүй хилийн хяналтын байгууллагуудыг зангидаж ажиллах Засгийн газрын бүрэн эрхт төлөөлөгчийг томилсон.

Ерөнхий сайд “Замын-Үүд дэх нөхцөл байдал 30 хоногт сайжрахгүй бол албан тушаалтнуудад хариуцлага тооцно” гэдгийг онцолж байв. Үүгээр зогсохгүй хилийн хяналтын байгууллагуудыг зангидаж ажиллах Засгийн газрын бүрэн эрхт төлөөлөгчийг томилсон.

            Харин Ерөнхий сайдыг очихоос өмнө Авлигатай тэмцэх газар болон хууль хяналтынхан Замын-Үүдийг зорьж хуулийн хүрээнд гүйцэтгэх ажиллагаа явуулжээ. Энэ хүрээнд нэр бүхий албан тушаалтнуудын гар утас, компьютер зэрэг мэдээлэл холбооны хэрэгслийг нь чагнах, өөрийнх нь болон хамаарал бүхий этгээдийнх нь дансны мэдээллийг цуглуулах зэрэг хэд хэдэн гүйцэтгэх ажиллагаа явуулсан байна. Гүйцэтгэх ажиллагааны үр дүнд “БНХАУ-ын Эрээн хотоос Монголын хил рүү ачаа, бараа оруулдаг компани, хил, гаалийн нэр бүхий албан тушаалтнуудтай сүлбэлдэж авлига авдаг байсан байж болзошгүй” зөрчил илэрсэн аж. Улмаар хууль хяналтынхан “Хил дээрх төрийн үйлчилгээ, ачаа тээврийн хөдөлгөөний царцсан шалтгаан авлигачдаас үүдэлтэй болохыг гүйцэтгэх ажиллагааны явцад илрүүлсэн” гэдгээ Засгийн газарт танилцуулсан байна. Мөн энэ нэр бүхий албан тушаалтныг баривчлах юм бол Замын-Үүд тэр чигтээ удирдлагагүй болно гэдгийг ч онцолжээ.

            Өөрөөр хэлбэл, гүйцэтгэх ажиллагааны үр дүнтэй танилцсан учир Замын-Үүд дэх завхарлыг арилгаж, асуудлыг шийдэхээр Монгол Улсын Ерөнхий сайд Л.Оюун-Эрдэнэ Дорноговийг зорьсон аж. Түүний араас ХЗДХ-ийн сайд Х.Нямбаатар Замын-Үүдэд очиж төрийн байгууллагын нэр бүхий дарга нарыг баривчилж, орных нь хүмүүсийг тэр дор нь томилсон. Тодруулбал,

• Замын-Үүд дэх Гаалийн газрын дарга Д.Зоригоог үүрэгт ажлаас нь чөлөөлж, Улаанбаатар хот дахь Гаалийн газрын даргын үүргийг түр орлон гүйцэтгэгч Б.Отгонсүхийг
• Хилийн цэргийн 0108 дугаар ангийн захирагч, хурандаа Б.Нямбатыг үүрэгт ажлаас нь чөлөөлж, В.Намхайнямбууг
• Авто тээврийн Үндэсний төвийн Замын-Үүд дэх салбарын дарга А.Хатансайханыг үүрэгт ажлаас нь чөлөөлж, Дорноговь аймгийн Авто тээврийн төвийн дарга  Ж.Сүхбаатарыг
• Замын-Үүд боомт дахь Хилийн мэргэжлийн хяналтын албаны даргын үүргийг түр орлон гүйцэтгэгч С.Цогбадрахыг үүрэгт ажлаас нь чөлөөлж, НМХГ-ын дарга Л.Эрдэнэчулууныг тус тус томилон ажиллуулахаар болсон.

            Мөн Замын-Үүд дэх сум дундын цагдаагийн хэлтсийн замын цагдаагийн дарга, цагдаагийн хошууч, Х.Уранбаярыг үүрэгт ажлаас нь чөлөөлсөн. Нэгэнтээ орных нь хүнийг томилсон учир төрийн байгууллагын нэр бүхий дарга нар болон сумын Засаг дарга Б.Анхбаярт эрүүгийн хэрэг үүсгэж, яллагдагчаар татсан байна.

ҮГСЭН ХУЙВАЛДАЖ, ҮНИЙН ХӨӨРӨГДӨЛ ҮҮСГЭДЭГ ЖОЛООЧ НАРЫГ ШАЛГАЖ ЭХЭЛЖЭЭ

            “Боохой борооноор, хулгайч чөлөөнөөр” гэгчийн үлгэрээр авлигач дарга нарынхаа ард, урдуур гүйдэг хэсэг бүлэг жолооч тээврийн зардлыг гурав нугалах болжээ. Өөрөөр хэлбэл, гурван сая төгрөгөөр захиалагчдаа хүрдэг байсан ачаа тээврийн хөлс арван сая болтлоо өссөн байна. Албан бус эх сурвалжийн мэдээлснээр “Нэр бүхий таван жолооч Замын-Үүдэд монопол болсон. Тэд хоорондоо үгсэн хуйвалдаж үнэ тогтоодог. Хэд ч гэж дуугарсан тэдний хэлснээр өгөхгүй л бол урт дараалалд түгжирч, хоцорно. Харин хүссэн хөлсийг нь өгвөл дараалалгүй оруулах зохион байгуулалт хийж өгдөг” байв.

            Ихэнх жолооч үүнийг хүлээн зөвшөөрсөн бөгөөд нэрээ нууцлахыг хүссэн тээврийн жолооч “Мань мэт нь амных нь зоргоор өгч чадахгүй болохоор сар гаруй хугацаанд хүлээж л байна. Урдаас ачих бараа маань барилгын материал байдаг нь миний аз. Хөөрхий хурдан муудах хүнс тээвэрлэж байгаа жолооч нар хэлснийг нь өгөөд л гарахаас өөр арга байдаггүй. Арай ч ийм өндөр үнэтэй байгаагүй юм. Тэдний шунал л энэ хэмжээнд хүргэсэн. Барааны эзэд “Тээврийн зардлаа нэмлээ гэж уурлаад байна” гээд үнэн учраа цөөнгүй хэлж үзсэн. Хариуд нь “За ямар биеэр ирж үзэх биш. Монголд коронавирус их гарч байгаа гээд Хятадын тал хилээ чангатгасан, халдваргүйжүүлэлтийн тоног төхөөрөмж цөөн болохоор үнэтэй ордог гэж хэлэхгүй юу” гэсэн үг л сонсдог. Амьдралын төлөө л зуны халуунд, өвчин тахлыг үл тоон зүтгэж байна даа” гэсэн юм. Бидний авсан мэдээллээр Замын-Үүд сумын хууль хяналтынхан дээрх бүлэг этгээдийг шалгаж эхэлсэн байна. Ямартай ч амандаа орсон үнээ хэлж, ард иргэдийг “сааж” суудаг тэдний давруу үйлдлийг хууль хяналтынхан таслан зогсоож, зохих арга хэмжээг авах бололтой.

Арай ч ийм өндөр үнэтэй байгаагүй юм. Тэдний шунал л энэ хэмжээнд хүргэсэн.

АВЛИГЫН ХЭРЭГТ ХОЛБОГДСОН ДАРГА НАРТАЙ ТАНИЛЦ

Цагдан хорьж, Эрүүгийн хэрэг үүсгэн шалгаж эхэлсэн нэр бүхий зургаан албан тушаалтан.

1. Хилийн 0108 дугаар ангийн захирагч Б.Нямбат

2. Хилийн 0108 дугаар ангийн авто замын шалган нэвтрүүлэх заставын дарга Б.Баттүшиг

 3. Замын-Үүдийн Цагдаагийн хэлстийн Замын цагдаагийн хэлстийн дарга Х.Уранбаяр

4. Авто тээврийн үндэсний төвийн Замын-Үүд салбарын дарга А.Хатансайхан

5. Замын-Үүд сумын Засаг дарга Б.Анхбаяр

6. Зам тээврийн хөгжлийн төвийн ахлах н.Саруул