Энэ жилийн тавдугаар сард шинээр нээгдсэн залуусын дунд тренд болж буй “Podolk” брэндийг үүсгэн байгуулагч Б.Пүрэвдуламыг энэ удаагийн “Эх орондоо үйлдвэрлэв” буландаа урьж оролцууллаа.

-Та манай уншигчдад өөрийгөө танилцуулаач?

-Намайг Балдандоржийн Пүрэвдулам гэдэг. “Podolk” брэндийг Э.Сод-Эрдэнэ найзтайгаа үүсгэн байгуулж, үйл ажиллагаагаа явуулж байна.

-Анх бизнесийнхээ санааг хэрхэн олж байв, хэр удаан бодож биеллээ олов?

-Анх “Podolk”-ны санааг Сод-Эрдэнэ найзтайгаа ярилцаж, бизнесээ эхлүүлж байв. Өмнө бодож байсан ч биеллээ олоогүй. Бид хоёр нэг өдөр ярьж суухдаа өвөрмөц футболк хийх тухай ярилцсан юм. Ярьж эхлээд долоохон хоногийн дараа бизнес маань биеллээ олсон доо. Дэлгүүрийнхээ түрээсийн байрыг долоо хоногийн дотор олж “300 футболк гаргаад үзье” гээд бизнесээ эхэлсэн дээ.

-Бизнесээ эхлэхэд ямар саад бэрхшээлтэй тулгарч, түүнийгээ хэрхэн даван гарч байв?

-Бизнесээ эхлүүлэхдээ 90 футболк гаргаж байлаа. Гэтэл бүх футболк маань нэг угаалтаар бүдгэрч арилаад дөнгөж эхэлж байхдаа 90 футболкоор “шатаж” байсан.  Гэтэл дэлгүүрээ удахгүй нээнэ гээд олон нийтэд зарлачихсан, хүмүүс биднийг хүлээж байдаг. Тэр үед “Бүтэхгүй юм байна” гээд бууж өгөхөө шахаж байлаа.

-Ажлын тань онцлог?

-Хүмүүс юмнаас амархан уйддаг болчихсон шүү дээ. Бид цаг үетэйгээ нийцүүлсэн шинэ загваруудаа тренд болгох зорилготой ажилладаг. Одоо ямар загвар гарах вэ, шинэлэг юу байж болох вэ гэсэн хандлагатай, шинэ юм эрэлхийлж бүтээгдэхүүнээ гаргахгүй бол бизнес маань зогсонги байдалд орох боломжтой. Цаг үедээ нийцүүлэх нь миний ажлын онцлог юм уу даа.

/Оффисын зураг/

-Анх хэдэн ажилтантай эхэлж, одоо хэд болж өргөжив?

-Анх бид хоёр л эхэлж байлаа. Бид өөрсдөө ямар загварын футболк гаргах вэ гэдэг санаануудаа олоод дэлгүүрийнхээ засварыг хийж байлаа. Одоо бодоход их зоригтой байжээ.  Тавдугаар сард цар тахал хүчээ авч, олон бизнес уналтад орчхоод байхад шинэ зүйл хийх нь зөв үү гэж ярилцсан ч “Алдах зүйл байхгүй юм чинь эхлүүлээд үзье, шинэ юм туршъя” гэж шийдсэн. Бизнес маань эхэлж байхад найзууд маань ирж тусалж байлаа. Бидэнд өгөх цалин байх биш дээ. Найзууд маань сэтгэлээрээ ирж тусалсанд маш их талархдаг юм. Дараа нь бидэнд дизайнер хэрэгтэй юм байна гэж шийдээд дөнгөж их сургуулиа төгссөн Одсүрэн гээд охиныг дизайнераар ажилд авсан юм. Тухайн үедээ нэг их сүртэй цалин мөнгө өгч чадаагүй, бүгд л сэтгэлээрээ эхэлж байв. Одоо бид дизайнер, дэлгүүрийн худалдааны менежер гээд дөрвүүлээ болж өргөжсөн байна.

-Бизнесээ өргөжүүлэх ямар шинэ санаа, төсөл хэрэгжүүлж байна вэ?

-Анх бид футболк л үйлдвэрлэж эхэлсэн. Харин одоо хүйтний улирал эхэлж байгаатай холбогдуулан манайх малгайтай болон малгайгүй цамцны загваруудаа худалдаанд гаргаад эхэлчихсэн байна.

-Үйлдвэрлэл хэрхэн явагддаг талаар уншигчдад товч сонирхуулбал?

-Тухайн цаг үедээ хэдэн загвар гаргах талаар ярилцаж, хурал хийнэ. Хуралдсаныхаа дараа шинэ санааныхаа загвараа ярилцаж шилдэг гэсэн санаагаа буулгаад  дизайныг нь гаргадаг. Ямар өнгийн футболк дээр гаргах, малгайтай, малгайгүй гээд хувцсаа ярилцан хэвлэлтэд өгдөг.

- Ижил төрлөөр бизнес эхлэгчдээс танай бүтээгдэхүүн ямар онцлогтой вэ?

-Манай бүтээгдэхүүний онцлог нь “Z” үеийнхэнд болон залуучууддаа түлхүү хандсан бүтээгдэхүүн гаргадаг. Егөөтэй, хөгжилтэй, сонирхолтой  санаануудыг тусгаж өгье гэсэн зорилго нь бидний онцлог гэж харж байна.

-Алсын хараагаа хэрхэн харж байна вэ?

-Цаашдаа бизнесээ илүү өргөжүүлж, залуучуудад зориулсан хувцасны брэнд болохоор зорьж байна.

-Шинэ залуу бүтээгч хийгээд манай уншигчдад өгөх зөвлөгөө?

-Бид өөрсдөө залуу хүмүүс, дөнгөж бизнесээ эхэлж байгаа болохоор зөвлөгөө өгөх хэмжээнд биш гэж бодож байна. Гэхдээ хэрэв өөрт тань санаа байгаа бол зориглоод эхлээд үз гэж зөвлөх байна.

''Podolk'' брендийн инстаграм хаяг: https://www.instagram.com/podolk_tshirt/