“ШИВЭЭ ОВОО” ХК-ИЙН ТӨЛӨӨЛӨН УДИРДАХ ЗӨВЛӨЛИЙН ХАРААТ БУС ГИШҮҮНИЙГ СОНГОН ШАЛГАРУУЛАХ ЗАР

2025-04-04, 10259

Компанийн тухай хуулийн 62 дугаар зүйлийн 62.1.7, 75 дугаар зүйлийн 75.4, 81 дүгээр зүйлийн 81.5.1, 81.5.2, 81.5.3 дахь заалт, Монгол Улсын Засгийн газрын 2023 оны 85 дугаар тогтоолоор батлагдсан “Төрийн өмчит компанийн Төлөөлөн удирдах зөвлөлийн хараат бус гишүүнийг сонгон шалгаруулах нийтлэг журам”-ыг тус тус үндэслэн “Шивээ-Овоо” ХК-ийн Төлөөлөн Удирдах Зөвлөлийн хараат бус 3 (гурав) гишүүний сонгон шалгаруулалтыг зарлаж байна.

Сонгон шалгаруулалт 3 үе шаттай явагдана:

Материалын бүрдэл шалгах
Нийтлэг болон тусгай шаардлагыг үнэлэх
Ярилцлага гэсэн

А. ХАРААТ БУС ГИШҮҮНД НЭР ДЭВШИГЧИД ХУУЛЬ ТОГТООМЖООР ТАВИГДДАГ НИЙТЛЭГ ШААРДЛАГА:

Тухайн хуулийн этгээдийн Төлөөлөн удирдах зөвлөлийн гишүүний үүргийг гүйцэтгэхэд шаардагдах ур чадвар, мэдлэг боловсрол, ажлын туршлагатай байх;
Тухайн хуулийн этгээдийн Төлөөлөн удирдах зөвлөлийн гишүүн байхад ашиг сонирхол үүсэхгүй байх;
Нэр дэвшигч нь өөрөө, эсхүл нэгдмэл сонирхолтой этгээд нь компанийн төлөөлөн удирдах зөвлөлд бие дааж нэр дэвшүүлэх эрх олгохуйц хувьцааны багцыг эзэмшдэггүй байх;
Нэр дэвшигч өөрөө, эсхүл эхнэр, нөхөр, эцэг, эх, хүүхэд, төрсөн ах, эгч, дүү болон тэдгээртэй нэгдмэл сонирхолтой этгээд нь компани, эсхүл түүний хараат, охин компанид эрх бүхий албан тушаал эрхэлдэггүй, сүүлийн 3 жилийн хугацаанд ажил, албан тушаал эрхлээгүй байх;
Компани, эсхүл түүний хараат, охин компанитай нэгдмэл сонирхолтой болон компанийн үйл ажиллагаанд оролцогч талуудын (зээлдүүлэгч, хувь нийлүүлэгч, хувьцааны багцыг эзэмшигч, хамтран ажиллагч гэх мэт) ашиг сонирхлыг төлөөлдөггүй байх;
Компанийн Төлөөлөн удирдах зөвлөлийн бусад гишүүн, гүйцэтгэх удирдлагын багийн гишүүн болон хяналтын багц эзэмшигчтэй нэгдмэл сонирхолтой этгээд биш, эсхүл тэдгээртэй төрөл, садны холбоогүй байх;
Эрүүгийн хуульд заасан эдийн засгийн, авлигын, өмчийн эсрэг гэмт хэрэгт шүүхийн шийдвэрээр гэм буруутай нь тогтоогдоогүй байх;
Эрх бүхий албан тушаалтнаар нь ажиллаж байсан хуулийн этгээд нь дампуурсан, төлбөрийн чадваргүй болсон нь түүнээс аливаа хэлбэрээр шалтгаалаагүй байх;
Тодорхой албан тушаал эрхлэх, эсхүл үйл ажиллагаа явуулах эрхийг нь шүүхийн шийдвэрээр хасаагүй, Эрүүгийн хуульд заасан гэмт хэрэг үйлдэж шүүхээс ял шийтгэл хүлээгээгүй байх;
Компанийн засаглалын сургалтад хамрагдаж, гэрчилгээ авсан байх;
Төрийн үйлчилгээнээс бусад төрийн алба хашдаггүй байх;
Төрийн алба хаах насны дээд хязгаарт хүрээгүй байх;
Сүүлийн дөрвөн жил улс төрийн намын ажилтан , сонгуульт удирдах албан тушаал хашиж байгаагүй, эсхүл улс төрийн албан хаагчаар ажиллаагүй байх;
Тухайн салбарын төрийн өмчит болон хувийн өмчийн хуулийн этгээдийн төлөөлөн удирдах зөвлөлийн гишүүнээр ажилладаггүй байх.

Б. ХАРААТ БУС ГИШҮҮНД НЭР ДЭВШИГЧИДТАВИГДАХ ТУСГАЙ ШААРДЛАГА:

Санхүү, уул уурхай, эдийн засаг, хууль эрх зүй, бизнесийн удирдлагын аль нэг чиглэлийн мэргэжил эзэмшсэн. Тус чиглэлээр 8-аас доошгүй жил ажилласан туршлагатай;
Компани болон хувьцаа эзэмшигчээс нөлөөлж болох ажил хэргийн болон хувийн харилцаа холбоогүй, бие даасан шийдвэр гаргах чадвартай;
Компанитай ижил төрлийн үйл ажиллагаа явуулдаг, өрсөлдөгч аж ахуйн нэгжийн удирдлагад ажиллаж байгаагүй, эсхүл ажилладаггүй;
Стратеги, бизнес төлөвлөлт, менежмент, эдийн засаг, хөрөнгө оруулалт, бизнесийн эрх зүй, компанийн засаглал, уул уурхайн чиглэлээр ажилласан туршлагатай байх; 
Бүтээлч идэвхтэй, ажлын хувь нэмэр оруулах хүсэл эрмэлзэлтэй, шударга, өндөр ёс зүйтэй, харилцааны чадвартай, хараат бусаар бие дааж шийдвэр гаргах болон багаар хамтарч ажиллах чадварууд эзэмшсэн байх;
Төлөөлөн удирдах зөвлөлийн гишүүний үүргээ биелүүлэхэд хангалттай цаг зарцуулах боломжтой байх.

ДАВУУ ТАЛ БОЛОХ ШАЛГУУРУУД (зайлшгүй биш)

Олон улсын туршлага – олон улсын нэр хүнд бүхий хөрөнгө оруулалт, банк, санхүү, хөрөнгийн удирдлага, аудитын компанид ажиллаж байсан туршлагатай;
Менежмент, эдийн засгийн чиглэл – үнэт цаас, хөрөнгө оруулалт, даатгал, санхүүгийн зах зээлд мэргэжлийн ажил үйлчилгээ явуулах эрхтэй;
Санхүү, аудит, нягтлан бодох бүртгэлийн чиглэл – Монгол Улсын мэргэшсэн нягтлан бодогчийн эрх, эсхүл татварын мэргэшсэн зөвлөхийн, аудиторын эрхтэй;
Хууль, эрх зүйн чиглэл – хуульчийн мэргэжлийн үйл ажиллагаа эрхлэх зөвшөөрөлтэй, компани, бизнес, хөрөнгө оруулалтын эрх зүйгээр мэргэшсэн, хуулийн этгээдэд удирдах албан тушаалд ажилласан туршлагатай;
Төрийн өмчит хуулийн этгээдийн төлөөлөн удирдах зөвлөлийн гишүүнээр ажиллаж байсан болон төрийн худалдан авах ажиллагаанд оролцож байсан туршлагатай бол давуу тал болно.

БҮРДҮҮЛЭХ БАРИМТ БИЧГИЙН ЖАГСААЛТ:

Өөрийн мэдлэг, ур чадвараа илэрхийлж, ажил байдлаа тодорхойлсон, сонгон шалгаруулалтад оролцох хүсэлт;
Төрийн албан хаагчийн анкет, 4х6 хэмжээтэй цээж зураг наасан байх;
Ажил байдлын тодорхойлолт (ажил эрхэлдэг иргэн байгууллагаасаа тодорхойлолт авах, ажил эрхэлдэггүй иргэн өөрийн хийж гүйцэтгэсэн ажлын талаарх мэдээлэл);
Ажилласан жилийг тооцох хөдөлмөрийн болон нийгмийн даатгалын шимтгэл төлөлтийн лавлагаа /E-Mongolia/;
Боловсролын диплом, үнэмлэх, бусад сургалт, семинарт хамрагдсан гэрчилгээ, сертификатын нотариатаар гэрчлүүлсэн хуулбар (гадаадад их, дээд сургууль төгссөн бол баталгаат орчуулгын хамт);
Иргэний үнэмлэхийн хуулбар;
Компанийн засаглалын гэрчилгээний хуулбар;
Эрүүгийн хариуцлага хүлээж байсан болон хүлээж байгаа эсэх талаарх тодорхойлолт /E-Mongolia/;
Банк, санхүүгийн байгууллагын хугацаа хэтэрсэн өр төлбөргүй тухай лавлагаа;
Холбогдох хууль тогтоомж болон нэр дэвшигчид тавигдаж байгаа нийтлэг шаардлагыг хангаж байгаагаа илэрхийлсэн баталгааны хуудас.

СОНГОН ШАЛГАРУУЛАЛТЫН МАТЕРИАЛХҮЛЭЭН АВАХ ХУГАЦАА, ГАЗАР:

Сонгон шалгаруулалтад оролцох нэр дэвшигчийн баримт бичгийг 2025 оны 04 дүгээр сарын 09-ний өдрийн 17:30 цаг хүртэл Улаанбаатар хот, Чингэлтэй дүүрэг, 1-р хороо, “Эрдэнэс Монгол” ХХК-ийн байранд, “Шивээ-Овоо” ХК-ийн Төлөөлөн удирдах зөвлөлийн нарийн бичгийн дарга С.Солонго хүлээн авна.

АНХААРАХ ЗҮЙЛС:

Баримт бичгийг битүүмжилсэн байх ба дугтуйны гадна талд “Шивээ-Овоо” ХК-ийн Төлөөлөн удирдах зөвлөлийн Хараат бус гишүүдийн сонгон шалгаруулалтыг зохион байгуулах түр хороонд гэж хаяглан, холбоо барих утасны дугаарыг гаргацтай бичнэ;
Нэг дугтуйнд зөвхөн 1 сонгон шалгаруулалтын баримт бичгийг хийнэ;
Баримт бичгийг сонгон шалгаруулалтын дараа буцаан олгохгүй;
Хугацаа хоцорсон баримт бичгийг хүлээн авахаас татгалзана;
Баримт бичгийн бүрдэл дутуу тохиолдолд сонгон шалгаруулалтаас хасна.

Холбоо барих утас: 8888-0769

“ШИВЭЭ ОВОО” ХК-ИЙН ТӨЛӨӨЛӨН УДИРДАХ ЗӨВЛӨЛИЙН

ХАРААТ БУС ГИШҮҮДИЙН СОНГОН ШАЛГАРУУЛАЛТЫГ

ЗОХИОН БАЙГУУЛАХ ТҮР ХОРОО

“ШИВЭЭ ОВОО” ХК-ИЙН ТӨЛӨӨЛӨН УДИРДАХ ЗӨВЛӨЛИЙН ХАРААТ БУС ГИШҮҮНИЙГ СОНГОН ШАЛГАРУУЛАХ ЗАР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2

Сэтгэгдэл үлдээсэн: 2025-05-17 17:16:58

supercodes.bgng.io: supercodes.bgng.io is your go-to destination for premium digital products and services.
Сэтгэгдэл үлдээсэн: 2025-04-18 16:09:12

хуульч: НААД МАН-Ы ГАР ХӨЛҮҮД ОРУУЛДАГАА БӨЛЧИХӨӨЧ..........ОДОО ЯМАР ГАРУУД БДГИЙГ ИЛ БОЛГО ДОО................