ДОНАЛД ТРАМП: ОХУ, Украин эрчим хүчний салбарт гал зогсоохооор болсон

2026-10-12, 124

АНУ-ын Ерөнхийлөгч Доналд Трамп ОХУ, Украин эрчим хүчний салбарт гал зогсоох шийдвэрт хүрснийг зарлалаа. Трамп ОХУ-ын нефт боловсруулах үйлдвэрүүд рүү онилсон халдлагаа зогсоох шаардлагыг Украины талд тавьсан. Ийнхүү хэдэн өдрийн турш шахалт үзүүлсэн юм. Тэрбээр дээрх тохиролцоо нэн даруй хэрэгжиж эхэлнэ гэж мэдэгдэлдээ дурдсан боловч Украины удирдагч Володимир Зеленский тохиролцооны талаар дэлгэрэнгүй мэдээллийг хүлээж байгаагаа мэдэгдэв. Одоогоор Москвагаас ямар нэг хариу өгөөгүй байна. Трамп Украины цохилтын улмаас дизель түлшний үнэ нэмэгдсэн нь ирэх сард болох АНУ-ын дунд шатны сонгуульд Бүгд найрамдахчуудын нэр хүндэд сөргөөр нөлөөлнө гэж үзэж байгаа.

Хоёр талын харилцаа огцом муудаж Украин ОХУ-ын эрчим хүчний үйлдвэрүүд рүү дайрч эхлээд буй. Трамп Зеленскийд Оросын үйлдвэрүүд рүү халдахаа нэн даруй зогсоосон нь дээр гэж сануулаад, украинчуудыг шинэ сонгуулиар удирдагчаа солихыг уриалсан удаатай. Мөн Зеленскийг Москватай тохиролцох хэд хэдэн боломжийг алдсан гэж шүүмжилжээ.

Трамп өөрийн "Truth Social" платформдоо ОХУ, Украин хоёр эрчим хүчний эвлэрэлд хүрснийг зарласан ч дэлгэрэнгүй мэдээлэл өгөөүй. Тэрбээр "Энэ мөчөөс эхлэн ОХУ, Украины дайнд ЭРЧИМ ХҮЧНИЙ ЭВЛЭРЭЛ үйлчилж эхэлнэ. Хоёр тал зөвшөөрсөн. Үүнийг зөрчиж үл болно" гэж бичжээ.

ДЭЛХИЙН ШАТАХУУНЫ ҮНИЙН ӨСӨЛТ

Иран дахь дайнаас болж дэлхийн шатахууны үнийг савлуулсан хэмээн Трампыг буруутгаж буй. Есдүгээр сарын дундуур Трамп Украин дахь эрчим хүчний эвлэрлийг зарлаж байсан ч талуудын аль нь ч тийм тохиролцоонд хүрснээ батлаагүй юм.

АНУ ОХУ-д тагнуулын мэдээлэл хуваалцахаа болино, "PURL" системээр дамжуулан зэвсэг худалдан авахад үзүүлэх тусламжаа зогсооно гэсэн шахалтыг үзүүлсэн байж болзошгүй талаар эх сурвалжууд мэдээлж байна. Харин Зеленский Трамптай үүссэн нөхцөл байдлыг зөөлрүүлэх талаар Европын удирдагчидтай ярилцаж байгаа аж. Цагаан ордон одоогоор тайлбар өгөхөөс татгалзлаа. Зеленский Трампын гал зогсоох тухай мэдэгдлийн талаар НАТО-ын Ерөнхий нарийн бичгийн дарга Марк Рютте, Канадын Ерөнхий сайд Марк Карни, Финляндын Ерөнхийлөгч Александр Стубб нартай хэлэлцсэн талаар мэдэгдсэн.

"Украин гал зогсоохыг дэмжиж байгаа, ОХУ ч мөн дэмжих нь чухал. Бид Америкийн талаас дэлгэрэнгүй мэдээлэл хүлээж байна" гэж тэр Телеграмдаа бичжээ. Зеленский видео мэдэгдэлдээ Оросын хүчнүүд эрчим хүчний дэд бүтэц рүү агаараас халдсаар байгааг, тухайлбал Украины хоёр дахь том хот болох Харьковын Дулааны цахилгаан станц руу цохилт өгснийг дурдлаа. Трампыг эвлэрэл зарласны дараа уг халдлага болсныг Украины албаны эх сурвалж батлаад байна.

ДОНАЛД ТРАМП: ОХУ, Украин эрчим хүчний салбарт гал зогсоохооор болсон

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.