Амгалан дулааны станц”-д гэмтэл гарч, халуун ус хязгаарлах талаарх мэдэгдэл Баянзүрх дүүргийн айл өрхүүдэд иржээ. Энэ талаар тус станцын дарга Ш.Баянмөнхөөс тодрууллаа. Тэрбээр “Манай станц өвлийн бэлтгэлээ сайн хангасан. Гурван зуухны нэгнийх нь хоолойд гэмтэл гарч, өнөөдрөөс зогсоолоо. Хэдийгээр нэг зуух эвдэрсэн ч дулаан хязгаарлахгүй. Ачааллыг “ТЭЦ-3”, “ТЭЦ-4” ТӨХК рүү шилжүүлж, манай ачааллыг бууруулсан. Манайх бүрэн зогсоогүй бөгөөд хоёр зуух нь хэвийн ажиллаж байгаа. Эвдэрсэн зуухыг засахад 6-7 цаг болно. Гэхдээ зуухыг зогсоож, буцаагаад ажиллуулахад 10 гаруй цаг зарцуулдаг. Одоо зуухаа унтраах үйл явц үргэлжилж байна. Унтарч дууссаны дараа засварын ажил эхэлнэ. Засаж дуусаад ажиллуулж эхлэхэд  мөн 10 гаруй цаг шаардлагатай” гэлээ.