Монголын хөрөнгийн бирж болон Санхүүгийн зохицуулах хорооноос “Булган Ундарга” компанийн хувьцааны арилжааг зогсоожээ. Тодруулбал, тус компанид “Ард санхүүгийн нэгдэл” компани 2020 оны арванхоёрдугаар сард хөрөнгө оруулалт хийж, “Крипто үндэстэн” компанийн эзэмшил дэх биткойнуудаа шилжүүлсэн байна. Зах зээлийн үнэлгээ бага “Булган Ундарга” компанийн хувьцааны ханшийг өсгөж, “Крипто Үндэстэн” компанийн хувьцаа эзэмшигчдэд тус компанийн хувьцааг шилжүүлэх гэтэл Монголын хөрөнгийн бирж, Санхүүгийн зохицуулах хорооноос манипуляци хийж байна гэж үзэн “Баян Ундарга” компанийн хувьцааны арилжааг зогсоожээ. Энэ нь “Ард санхүүгийн нэгдэл” компанийн 20 мянган хувьцаа эзэмшигчийн эрх ашгийг зөрчиж байна хэмээн тус компанийн гүйцэтгэх захирал Ч.Ганхуяг үзэж байгаа юм. Тэрбээр “Санхүүгийн зохицуулах хороо, Монголын хөрөнгийн бирж дээр үйлчилж байгаа буруу журам бидэнд саад болж байна. Бид Монголын хөрөнгийн биржид бүртгэлтэй “Жинст Увс” компанийн хувьцааг худалдан авч, “Хөрөнгө оруулагч Үндэстэн” компанитай урвуу нэгдэл хийх замаар “Ард Санхүү Нэгдэл” компанийг нээлттэй компани болгосон. Яг энэ процесс банкуудад явагдаж байна. Өчигдрийн арилжааны мэдээг харвал нэлээд олон компаниуд 15 хувьд хүрсэн байгаа. Нэг компанийн хувьцааны ханшийн нэг өдрийн өсөлтийн дээд хязгаарыг 15 хувиар тогтоосон нь буруу гэж үздэг. Яагаад гэхээр хүмүүс компанийн хувьцаанд итгээд орж ирвэл тэр хувьцаа өсөх ёстой. Тэр ашгийг битгий хязгаарла гэж зохицуулах байгууллагын удирдлагуудад хэлмээр байна.

Ард санхүүгийн нэгдэлд орж ирсэн 20 мянган хувьцаа эзэмшигчийн эрх ашгийг ноцтойгоор зөрчиж байна

Манайд хөрөнгө оруулалт хийсэн “Крипто үндэстэн”-д орсон хүмүүс хожоод гарсан. Илүү их хожих боломж байна. Тэр боломжийг хамт бүрдүүлье гээд “Булган Ундарга” компанид биткойноо шилжүүлсэн. Энэ компани 10-20 сая төгрөгийн үнэлгээтэй байсан. Тэр үед нь 4-5 тэрбум төгрөгийн хөрөнгө шилжүүлж байгаа учир үнийг нь дээш нь өргөх ёстой болно. Тэгээд хөрөнгө оруулагчид болох “Крипто үндэстэн” компанийн  хувьцаа эзэмшигчдэд тэр хувьцааг нь шилжүүлэх гэхээр танайх манипуляци хийж байна гээд хаачихсан. Хувьцааг нь худалдаж авна гэдгээ ил тод зарлаж байгаад худалдаж авдаг манипуляци гэж хаана ч байхгүй. Үнэ өсөхөөр хохирдог ямар хүн байдаг юм. Яагаад бидэнд мэдэгдэлгүй, сануулахгүйгээр зөрчлийн хэрэг үүсгээд, прокурорт шилжүүлж байгаа юм. Бид энийг тууштай эсэргүүцэж байна. Ард санхүүгийн нэгдэлд орж ирсэн 20 мянган хувьцаа эзэмшигчийн эрх ашгийг ноцтойгоор зөрчиж байна” хэмээн ярилаа.

Ташрамд дурдахад, “Ард Санхүүгийн Нэгдэл” компанийн зах зээлийн үнэлгээ 2020 оны есдүгээр сарын байдлаар 30 тэрбум төгрөгтэй тэнцэж байсан бол энэ долоо хоногийн байдлаар 100 тэрбум төгрөг рүү дөхөж байна.