УИХ-ын гишүүн С.Ганбаатар, эдийн засагч Ч.Отгочулуу нар өчигдөр МҮОНРТ-ээр “Дубайн гэрээг цуцлах нь зөв үү” гэсэн сэдвээр мэтгэлцсэн билээ. УИХ-ын гишүүн С.Ганбаатар Ч.Сайханбилэгийн Засгийн газрын үед байгуулагдсан “Дубайн гэрээ” хэмээн нэрлэгддэг Оюутолгойн далд уурхайн бүтээн байгуулалтын төлөвлөгөөг цуцлах ёстой гэсэн байр сууриа хамгаалсан бол эдийн засагч Ч.Отгочулуу “Хэн нэгэн улстөрчийг хамгаалах гэж ирээгүй. Оюутолгойн ТУЗ-д ажиллаж байсан эдийн засагч хүнийхээ хувьд няцаалт өгнө” гэсэн юм. Тэрбээр “Дубайн гэрээг цуцлах нь буруу” хэмээн үзэж байгаагаа тайлбарлаад, Монгол Улсын эдийн засаг Оюутолгойн нуруун дээр явж байгаа талаар дурдсан.

УИХ-ын гишүүн С.Ганбаатарын хувьд өнгөрсөн нэгдүгээр сарын сүүлчээр Оюутолгойн гэрээг өөрчлөх ёстой гэсэн шаардлагыг тавьж, тав хоногийн өлсгөлөн зарласан. Тэрбээр өчигдрийн мэтгэлцээнд  “Оюутолгой “Рио Тинто” компанийн хувьд ломбарданд тавьдаг бөгж болсон. Биднийг барьцаанд тавьж зээл авч байна” гэсэн тайлбарыг өгсөн. Мөн “Монгол Улс газар доорх эрдэс баялгаа өгсөөр байтал 22 тэрбум ам.долларын өрөнд орж байна” гээд “Рио Тинто”-гийн 2019 оны дөрөвдүгээр улирлын менежмент, маркетингийн зардлын тайланг олон нийтэд үзүүлсэн юм.

Энэ үеэр яригдсан нэг зүйл нь Монгол Улсыг төлөөлж Оюутолгойн ТУЗ-д сууж байгаа гишүүдийн талаар байв. Учир нь Монгол Улсын эрх ашиг хөндөгдөж буй энэ үед Оюутолгойн ТУЗ-ийн гишүүд нэг ч удаа байр суурь илэрхийлэхгүй байгааг С.Ганбаатар гишүүн буруутгасан. Тэрбээр “Оюутолгойн ТУЗ-ийн гишүүд ямар ч идэвхгүй, амралтын газар оччихсон юм шиг байгаа нь гурван сая монголчууд бүгдээрээ Оюутолгойн талаар санаа зовж, уурхайн инженер болохоос өөр аргагүй байдалд түлхээд байна” гэсэн юм.

Оны өмнө ТУЗ-ийн гишүүдийг сольсон бөгөөд Ерөнхийлөгч асан Н.Багабанди дахин сонгогдсон байдаг. Үүнийг УИХ-ын нэр бүхий гишүүд эсэргүүцсэн бөгөөд Ерөнхий сайд Л.Оюун-Эрдэнэ “Н.Багабандийг ТУЗ-ийн гишүүнээс чөлөөлнө” гэдгээ мэдэгдсэн.

Эдийн засагч Ч.Отгочулуугийн хэлснээр “Оюутолгойн ТУЗ-ийн гишүүд ажлаа хийхгүй байгааг шүүмжлээд Ерөнхийлөгч асан Н.Багабандийг өдөр бүр оффис дээр ирээд Оюутолгойн асуудалд анхаарал хандуулдаг гэж бодохгүй байна” гэсэн. Мөн Э.Баясгалан нь одоог хүртэл Нью-Йоркт амьдардаг бөгөөд Оюутолгойн асуудлаар мэдлэггүй байсан гэх шүүмжлэл ч энэ үеэр гарсан юм.

Дубайн гэрээг өөрчлөх асуудалд талууд байр сууриа хамгаалсан бол үзэгчдийн олонхи нь мэтгэлцээнд УИХ-ын гишүүн С.Ганбаатар ялалт байгуулсан гэж үзэж буй. Түүний хувьд Сангийн сайд асан С.Баярцогттой Оюутолгойн асуудлаар мэтгэлцээд ялагдаж байсан. Харин энэ удаад баримт, нотолгоонд тулгуурлаж мэтгэлцсэн аж.