Ардчилсан намын дарга, УИХ дахь Ардчилсан намын бүлгийн дарга, УИХ-ын гишүүн О.Цогтгэрэл БНХАУ-д хийж буй ажлын айлчлалынхаа хүрээнд өнөөдөр /2026.09.08/ ХКН-ын Төв хорооны Улс төрийн товчооны гишүүн, Төв хорооны Нарийн бичгийн дарга нарын газрын нарийн бичгийн дарга, Төв хорооны Нэгдсэн фронтын газрын дарга Ли Ганьжетэй Бээжин хотноо уулзжээ.

   Уулзалтаар Монгол, Хятадын иж бүрэн стратегийн түншлэлийн харилцаа, хоёр намын хамтын ажиллагаа, улс төрийн харилцан итгэлцэл, хөрөнгө оруулалт болон цаашдын хамтын ажиллагааны шинэ чиглэлийн талаар санал солилцсон байна.

   Ли Ганьже Монгол, Хятад хоёр улс найрсаг хөрш, иж бүрэн стратегийн түншүүд болохыг онцлоод, ХКН Монгол Улсын улс төрийн гол намуудтай яриа хэлэлцээ, хамтын ажиллагаагаа тогтвортой үргэлжлүүлж, улс төрийн харилцан итгэлцлийг бэхжүүлэхэд анхаарч ажиллана гэв.

   Тэрбээр мөн Монгол Улсад оруулах Хятадын хөрөнгө оруулалтыг нэмэгдүүлэх сонирхолтой байгаагаа илэрхийлж, эрчим хүч, уул уурхай, худалдааны уламжлалт салбарын хамтын ажиллагааг эрчимжүүлэхийн зэрэгцээ ногоон хөгжил, тоон эдийн засаг, чухал ашигт малтмал зэрэг шинэ чиглэлд хамтран ажиллах боломжтойг тэмдэглэжээ.

   УИХ-ын гишүүн О.Цогтгэрэл ХКН үүсэн байгуулагдсаны 105 жилийн ойн баярын мэндчилгээ дэвшүүлээд, хоёр намын харилцаа, хамтын ажиллагааг өргөжүүлэх, харилцан ойлголцол, улс төрийн итгэлцлийг бэхжүүлэхэд уулзалт чухал ач холбогдолтойг онцолсон аж.

   Тэрбээр Монголын Ардчилсан нам гадаадын хөрөнгө оруулалтыг дэмжсэн, нээлттэй, хуульд нийцсэн, тогтвортой байр суурийг баримталж ирсэн бөгөөд цаашид ч энэ байр сууриа хадгална гэдгийг илэрхийлжээ.

   Мөн 2025 оны гуравдугаар сард АН-ын төлөөлөгчид БНХАУ-д айлчилж, хоёр намын харилцаа, хамтын ажиллагааг өргөжүүлэх санамж бичиг байгуулсан талаар дурдлаа. Тус санамж бичгийн хүрээнд ХКН-ын урилгаар БНХАУ-д ажлын айлчлал хийж байгаадаа сэтгэл хангалуун байгаагаа илэрхийлж, цаашид хоёр намын хамтын ажиллагааг улам өргөжүүлнэ гэв.

   Уулзалтаар хоёр намын харилцаа, өндөр түвшний айлчлалын давтамжийг хадгалах, улс төрийн яриа хэлэлцээ болон хамтын ажиллагааг өргөжүүлэх талаар санал нэгджээ.

   О.Цогтгэрэл тэргүүтэй төлөөлөгчид БНХАУ-д хийж буй ажлын айлчлалаа үргэлжлүүлж, Бээжин хотын Дашин дүүрэг дэх Олон улсын устөрөгчийн эрчим хүчний жишиг бүсийн үйл ажиллагаатай танилцах юм.