МАН жагсаалтдаа салбар салбарын төлөөллийг багтааснаас боловсролын салбарыг төлөөлж орж ирсэн нь “Шинэ Монгол”-ын гэх тодотголтой Жанчивын Галбадрах. Гуравдагч хөршийн хөрөнгө оруулалттай “Шинэ Монгол” сургуулийг 2000-аад оны эхэнд байгуулж, японы боловсролын системийг эх орондоо нутагшуулсан гэгддэг. Ж.Галбадрахын тухайд физикийн багш мэргэжилтэй, ХААИС болон нийслэлийн 84 дүгээр сургуульд багшилж байсан. Улмаар 1995 онд Японы Засгийн газрын тэтгэлэгт хамрагдаж, тус улсын Ямагата их сургуульд суралцсан. Буцаж ирмэгцээ буюу 2000 онд “Шинэ Монгол” сургуулийг үүсгэн байгуулсан.   Ж.Галбадрах УИХ-ын сонгуульд нэр дэвшихдээ мэдүүлсэн 2023 оны хөрөнгө орлоготоо “МРЖ” ХХК, “Шинэ монгол эрдмийн хүрээлэн” ХХК, “Түмэн Амгалан Өргөө” ХХК-д хувьцаа эзэмшдэг гэж мэдүүлсэн.  Бизнесийн тухайд УИХ-ын гишүүн Ж.Галбадрах гишүүн болмогцоо “Шинэ Монгол” сургуулиа том охин Г.Тогосоороо удирдуулж байна. Өдгөө тус сургууль “Шинэ Монгол эрдмийн хүрээлэн”, “Шинэ Монгол" бүрэн дунд сургууль, “Косэн” буюу техник инженерийн коллеж, “NMIT” буюу технологийн дээд сургууль болж өргөжсөн. Мөн  саяхан Сумогийн их аварга Харумафүжи Д.Бямбадоржтой хамтран Яармагт “Шинэ Монгол Харумафүжи” сургуулийг үүсгэн байгуулсан. Боловсролын салбарт эрдмийн үр таригч гэх “имиж”-ийг өнгөрсөн хугацаанд ийн бүрдүүлж ирсэн Ж.Галбадрах улс төр сонирхох болсон нь анхаарал татаж байгаа юм. Гэвч ачир дээрээ тэрбээр нийгэмд танигдсан шигээ дардан мөртэй, нэр цэвэр нэгэн биш аж.

          Өөрөөр хэлбэл, гаднын хөрөнгө оруулагчидтай хамтарч бизнесээ томруулж, гавьяат багш болтлоо тодорсон Ж.Галбадрах хөрөнгө оруулагч нартаа халгаатай нэгэн гэдгийг батлах ноцтой баримт бий. Тодуулбал, “Суруга Монгол” ХХК-ийн хөрөнгө оруулагч, захирал Цүнэяки Харад хар тамхины хэрэг тохож, хууль хяналтынхантай хуйвалдан хөөж явуулсан гэх дуулиант хэргийн цаад эзэн нь УИХ-ын гишүүн Ж.Галбадрах тэргүүтэй түүний шавь, хамаарал бүхий этгээдүүд байсан гэгддэг.

          Хэргийг эргэн сануулахад, Т.Г 2012 оны хоёрдугаар сарын 28-29-нд шилжих шөнө Хан-Уул дүүргийн I хороонд байрлах “Палас” зочид буудлын 609 тоот өрөөнд буюу “Суруга Монгол” ХХК-ийн хөрөнгө оруулагч, захирал Цүнэяки Харагийн байрлаж байсан өрөөнд хар тамхи халаасалж очсон. Улмаар хар тамхиа орных нь дэрний доор нуугаад гарч явсан. Түүнийг явсны араас цагдаа нар орж өрөөг нэгжээд өнөөх “нуусан” хар тамхийг олсон дүр үзүүлж, Цүнэяки Хараг баривчилсан. Ингээд “Японы хөрөнгө оруулагчийг өрөөндөө хар тамхи хэрэглэж байхад нь үйлдэл дээр нь баривчиллаа” гэж нийтэд мэдээлсэн.

Гэтэл уг хэрэгт холбогдсон Т.Г нь “Шинэ Монгол” сургуулийн эзэн Ж.Галбадрахын төрсөн дүү Ж.Түвшинтунгалагийн том хүү байсан байдаг. Улмаар Т.Г нь “Шинэ Монгол” ахлах сургуулийн анхны буюу 2003 оны төгсөгч болж, 2004 онд “Шинэ Монгол” ахлах сургуулийн тэтгэлгээр Япон руу сургуульд сурахаар явж байсан нэгэн байв. Сургуулиа төгсөж, Монголд ирмэгцээ эхэнд дурдсанчлан “Суруга Монгол” ХХК-д ажиллаж эхэлсэн. Тухайн үед Ж.Галбадрахын охин ч мөн “Суруга Монгол” ХХК-д ажилд орсон байдаг. Ингэж 70 шүргэж явсан Цүнэяки Хараг “хар тамхичин” болгож, хөрөнгөөс нь салгах хуйвалдаан эхэлсэн түүхтэй. Цүнэяки Хараг зургаан сар хориод сулласны дараа хамаг хөрөнгө хаяад нутаг буцсан. Харин Т.Г-д “Хар тамхи хууль бусаар олж авсан, бусдыг зохион байгуулалттайгаар гэмт хэрэгт гүтгэсэн” хэргээр эрүүгийн хэрэг үүсгэсэн ч Эрүүгийн хэргийн анхан шатны шүүхээс 2012 оны есдүгээр сарын 2-нд 1093 дугаартай тогтоолоор цагаатгах шийдвэр гаргаж, сулласан байдаг.

            Хотын дарга Х.Нямбаатар нэгэнтээ “Т.Г гэгч нь “Суруга Монгол”-ын өвгөний дэрэн доогуур хар тамхи хийснийхээ хариуд Сонгинохайрхан дүүрэгт авто угаалгын газраар шагнуулсан” гэж мэдэгдэж байлаа. Мөн түүний ард Ж.Галбадрах “Шинэ Монгол” сургуулийн захирал асан, одоогийн Боловсролын сайд П.Наранбаярыг холбоотой хэмээн мэдэгдэж байв.

Ж.Галбадрахын төрсөн дүүгийн хүү Т.Г “Суруга Монгол”-ын хар тамхины хуйвалдаанаас цагаатгагдаад, жилийн дараа буюу 2013 оны наймдугаар сард “Жи Би Жэй корпорэйшн” ХХК-ийн эзэн болж, бизнесийн салбарт орсон. Тодруулбал, Сонгинохайрхан дүүрэгт авто угаалгын газар нээж, 2015 онд Баянгол дүүрэгт “Гермес” худалдааны төвийн эсрэг талд “Ниппон” нэртэй дөрвөн давхар зочид буудал, караоке, ресторан паб ажиллуулж эхэлжээ. Харин 2019 онд “Хата фарм” ХХК-ийг байгуулж, Япон Улсаас эм, тариа импортолж, эмийн сангуудаар бөөндөж зардаг болсон байна. Мөн ээж Ж.Түвшинтунгалаг нь ЭХЭМҮТ-ийн их эмчээр ажиллаж байгаад Баянзүрх дүүргийн XXVI хороо, “Шинэ Монгол” сургуулийн хажууд “Рэйва мед” гэх эмэгтэйчүүдийн эмнэлэг нээсэн. Ноцтой нь, төрсөн дүүгийнх нь хүү, түүний байгуулсан сургуулийн захирал хоёрынх нь орооцолдсон хэргийн ард УИХ-ын гишүүн Ж.Галбадрахыг байсан, гаднын ялангуяа Японы хөрөнгө оруулагчдыг хашраасан, үргээсэн хүмүүсийн эхний гуравт түүнийг багтдаг гэх яриа нь таамаг төдий зүйл биш юм.