Шувууд чимээгүйхэн нисэлдэнэ. Дуугарахгүй болохоор дээш харахгүй л бол тэдний тийнхүү нэг зүгээс өөр зүг рүү нисэн явааг мэдэхгүй. Хүн бүтээж байгаа нь үл мэдэгдэнэ. Бүтээлийг үзэж, сонсож, мэдэрч гэмээнэ сая нэг бүтээснийг нь мэддэг, түүгээр дамжуулан хүмүүнийг танидаг. Дүр харин сэтгэлд үлдэж, санаанд торниж, үзэх бүрд мартагдашгүйгээр хоногшдог. Сайхан хүн сайхан дүр байдаг. Сайхан дүр сайхан хүн байдаг. Энэ ертөнц бол түүний байсан, бүтээсэн орон зай.

        Гомбодорж гуайг сахлаа имрээд,бодож эргэцүүлэн суухад нь мөрчөөс ч илүү алив юмны утга учрыг олохдоо гаргууд гэмээр бодогдоно. П.Дэлгэрбаяр найруулагчийн “Мөрч” кинонд Б.Энхбаяр жүжигчний бүтээсэн энэ дүр хуучны дархлагдсан хөх өвгөдийг ч санагдуулна. Харин донорын архаг эмч болоод, шавиа хатуухан гараар бэлтгэж, хайрлахдаа хайрлаж байсан “Хүнд хэрэгтэй хүн” киноны дүр нь мэргэжлээрээ олон жил ажиллаад туршлагажиж, залуу үедээ зааж сурган халаагаа өгөх гэх хэн бүхний л төлөөлөл дүр. Тэр дундаа донорын эмч болно гэдэг өндөр хариуцлага, сэрэмж, анхааралтай ажил гэдгийг тэр дүрээрээ харуулсан.  Энэ мэргэжлийн үнэ цэнийг ч бичсэн зохиол, найруулгаараа бүгдэд илчлэн гаргасан.Түүний бүтээсэн дүр, бүтээсэн киноноос дурдахад л ийм содон байх бөгөөд ховор сонин, мартагдашгүй дүрийг хүнд хүргэнэ гэдэг, тийм дүрийн эзэн байна гэдэг гарцаагүй онцгой уран бүтээлчид л найруулагчаас ирэх дүрийн санал болов уу. Тэгээд бүр тийм содон дүрийг нь үзэх бүрдээ бүтээсэн уран бүтээлчийг нь дурсаж, дүр мөнх гэдгийг мэдэрдэг аж. Киноны зохиолын тухайд тэр хувь тавилан, үйлийн үр, үргэлжлэлийн тухай бичдэг гэсэн нь бүтээл бүрээс нь илэрдэг. 

      Түүний “Тавилан I, II”, “Халуун сэтгэл”, “Хайр харуусал” тэргүүтэй түүний найруулгаар бүтсэн олон сайхан кино бий. Нөхөрлөл, хайрын тухай өгүүлсэн онцгой энэ бүтээлд үзэгчид их дуртай. Магад найруулагч болгонд л нөхөрлөлийн үнэ цэнийг харуулсан гарцаагүй нэг бүтээл уран бүтээлийн жагсаалтад нь байдаг байх. Дараагийн нэг онцлог түүний уянга, хайр, харуусал, амьдрал, хүслийн ээдрээг харуулсан бүиээл бол “Хайр харуусал”. Амьдрал өөрөө баялаг болохоор тэр дунд ямар ч зүйл өрнөж болно. Гэр бүлийн харилцаа гэдэг бол чухам эгэл найзууд шиг тийм харилцаа, бие биенээ ойлгох чадвар, сонсох хүлээцтэй байх, өөр дээрээ тусгаж харах зүйл аж. Энэ хамтын амьдралд юу нь юунаасаа чухал, юуг нь барьж авах гэх мэт маш хариуцлагатай сонголтуудыг хэрхэн хийхээс гэр бүлийн аз жаргал хэрхэн өрнөх нь шийдэгдэнэ гэдгийг энэ бүтээл бидэнд илэрхийлэх аж. Харин энэ найруулагчийн халуунаас халуун бүтээл, халуун сэтгэлээс нь урган гарсан нэгэн бүтээл бол “Халуун сэтгэл”. Бодит түүхээс сэдэвлэсэн эл кино олон ч хүнд онцгой сэтгэгдэл, мартагдашгүй үйл явдлыг үлдээсэн. Ингэж тэр цөөн боловч жинтэйхэн хэдэн бүтээлийг Монголын кино урлагийн санд бүтээж, мөнхөлж чадсан байна.

 

     Тийм ээ, тун товчоор түүний бүтээлээс дурдлаа, энд. Зөвхөн түүний зүрх сэтгэл, оюун бодол, авьяас билиг, хөдөлмөр зүтгэлээс төрөн гарсан бүтээл гэж бий аж. Түүнийг та ч, би ч давтан үзэж, автан сонирсноор сая эцсийн дүндээ эл уран бүтээлч жинхнээрээ тодрох юм байна. Бүтээлээсээ, бүтээлээрээ уран бүтээлч дахин тэгж төрдөг байх нь. Энэ ертөнц бол түүний байсан, бүтээсэн орон зай…