Хотын төвийн дүүрэг, түүнчлэн зуслангийн бүс гэгдэх Чингэлтэй дүүрэг бодит байдал дээрээ хогондоо дарагдчихсан, үерт үйж, хөгжлөөрөө хол тасархай хоцрогдчихсон явааг оршин суугчид нь бэлэхнээ батална. Гэтэл тус дүүргийг удирдаж, төлөөлөл болж суугаа томчууд нь зэрэг зиндаа ахин, тушаал дэвшээд талийж өгөх нь тэр. Үнэндээ бол НИТХ-ын төлөөлөгчөөр суух нь хотын хөгжил, дүүргийн ирээдүй гэхээсээ илүүтэй, Төрийн ордонд тухлах гүүр болдог гэдгийг өнгөрсөн хугацаанд УИХ-д суусан гишүүдийн намтраас бэлэхнээ харж болно.

        Тодруулбал, Чингэлтэй дүүргийн Засаг дарга Н.Батсүмбэрэл УИХ-ын сонгуульд нэр дэвшиж, ялалт байгуулаад Саарал ордонд тухалчихсан,  чих амар суугаа. Түүний араас Төрийн ордонд залрах дараагийн түшээдээр тодрохоор МАН-ын мандах дуртай улстөрчид орон нутгийн сонгуульд дараалал үүсгээд жагсаж эхэллээ.

         Тухайлбал, НИТХ-ын хуралд Чингэлтэй дүүргээс Н.Мандуул, Л.Ариунтуяа, Б.Мөнхбат, З.Төмөртөмөө нар нэр дэвших эрхээ өвөртлөөд байгаа. Түүнээс өмнө Чингэлтэй дүүргийн одоогийн удирдлагууд ард түмнээр дөрвөн жилийн ажлыг дүгнүүлж, дүнгээ тавиулна.  Чингэлтэй дүүргийг удирдаж, иргэдийг төлөөлөх учиртай улстөрчид энэ хугацаанд түмнээ төлөөлсөн үү, түрүүвчээ түнтийлгэсэн үү гэдгийг баримтаар танилцуулъя.

ТӨЛӨӨЛӨГЧӨӨР СУУЖ, ТҮШЭЭД БОЛСНООСОО ХОЙШ ОРЛОГО НЬ ОГЦОМ НЭМЭГДЭЖ, ТӨРӨЛ АРИЛЖСАН ЧИНГЭЛТЭЙ ДҮҮРГИЙН ШИНЭХЭН ЗАСАГ

         Чингэлтэй дүүргийн Засаг дарга Н.Батсүмбэрэл УИХ-д сонгогдож, түшээдийн суудалд тухалснаар түүний орыг НИТХ-ын төлөөлөгч Балжиннямын Мөнхбат залгах болсон. Архангай аймгийн Их тамир сумын уугуул, багш мэргэжилтэй гэх даруухан намтартай. Тэрбээр нийслэлийн 23 дугаар дунд сургуульд багшаар ажиллаж, Чингэлтэй дүүргийн Засаг даргын Тамгын газарт мэргэжилтэн хийж, хэлстийн дарга, цаашлаад Засаг даргын орлогч болж тушаал дэвшсээр 2016 оноос хойш нийслэлд чингэлтэйчүүдийг төлөөлөхөөр болсон. Хоёр сонгууль дараалан нийслэлд чингэлтэйчүүдийг төлөөлсөн тэрбээр дахин НИТХ-д нэр дэвших эрхээ өвөртлөөд байна. Үндсэндээ төрийн албанаас салаагүй, тусдаа  бизнесгүй түүний хөрөнгө орлого дөрвөн жилийн хугацаанд чамлахааргүй нэмэгдэж, түрүүвчээ зузаатгасан байна.

      Тодруулбал, Балжиннямын Мөнхбат 2017 он АТГ-т мэдүүлсэн хөрөнгө орлогын мэдүүлэгтээ жилийн орлого нь 76 сая, гэр бүлийн орлого нь 13 сая төгрөг хэмээн мэдүүлж байсан бол 2022 онд жилийн орлого нь огцом нэмэгдэж 250 сая, гэр бүлийн орлого нь 472 сая төгрөг болсон байна.

      Түүнчлэн 2017 онд 347 сая төгрөгөөр үнэлэгдэх орон сууцтай гэж мэдүүлж байсан бол 2022 онд орон сууцны үнэлгээ нь өсөж, 709 саяд хүрчээ.  Дээр нь дансандаа 100 сая гаруй төгрөгийн хадгаламжтай болж, “Түмний хурд гал уяа Нөхөрлөл”, “Сүү” ХК, “Си Юу” сүлжээ дэлгүүрт хувьцаа эзэмшдэг болсон байх. Ингээд харахаар таван жилийн хугацаанд төрийн албанаас салаагүй хэр нь түрүүвч нь зузаарснаас харахад төлөөлөгч болж суух нь юу юунаас илүү ашигтай байдаг бололтой.

ЧИНГЭЛТЭЙ ДҮҮРГИЙН ИТХ-ЫН ДАРГА БҮЛТЭНХҮҮГИЙН МӨНХБАТ ТӨЛӨӨЛӨГЧӨӨР СУУЖ, ТЕНДЕР ХАМСАН УУ

         Чингэлтэй дүүргийн ИТХ-ын дарга Бүлтэнхүүгийн Мөнхбат нь Увс аймгийн Сагил сумын харьяат, ЗХУ-д гирдоинженерээр суралцаж, "Отгонтэнгэр" сургуульд хуульч, эрх зүйчээр мэргэжил дээшлүүлсэн гэх намтартай. 2003 оноос хойш одоог хүртэл Монголын өмгөөлөгчдийн холбооны гишүүнээр ажиллаж буй.  Нийслэлийн МАН-ын хорооны бага хурлын гишүүн, МАН Шинэчлэл хөгжлийн хорооны удирдах зөвлөлийн гишүүнээр ажиллаж, Нийслэлийн Чингэлтэй дүүргийн МАН-ын хорооны тэргүүлэгчээр дөрвөн жил ажилласан. Улмаар Чингэлтэй дүүргийн ИТХ-д 2016 оноос хойш хоёр удаа сонгогдож, 2020 оноос хойш тус дүүргийн ИТХ-ын даргаар ажиллаж байгаа юм.

      Тэгвэл Б.Мөнхбат Чингэлтэй дүүргийн төлөөлөгч болж, улс төрд орохдоо төрийн тендер түүсэн байж болзошгүй зарим баримтыг хүргэе.

      Бүлтэнхүүгийн Мөнхбат нь Чингэлтэй дүүргийн төлөөлөгчөөр суух хугацаанд буюу 2016 онд түүний төрсөн ах Бүлтэнхүүгийн Энхжаргал агсны үүсгэн байгуулсан  “Хүрд” ХК-ийн алба хариуцсан захирал албан тушаалыг давхар хашиж байсан. 2007 онд байгуулсан цахилгаан сантехник угсралтын "Хүрд" ХК нь Б.Мөнхбатыг Чингэлтэй дүүргийн төлөөлөгчөөр сонгогдсоноос хойш буюу 2017 оноос хойш төрийн тендерийг түүжээ. 

Тодруулбал,     

1. 2017 онд- Дархан хотын бохир ус цэвэрлэх байгууламжийн дулааны шугам сүлжээг барих ажил
2. 2017 онд- Онцгой байдлын албанд хувцас хэрэглэл нийлүүлэх (ОБЕГ/201711001)-553 сая төгрөг
3. 2017 онд- “Түлхүүр гардуулах гэрээгээр хэрэгжих Гэр хорооллын хүчдэлийн уналттай болон шинэ суурьшлын бүсийн гэр хорооллын айл өрхийг цахилгаан хангамжаар хангах ажил /Улаанбаатар/” (ЭХЯ/201702002)-213 сая төгрөг
4. 2018 онд Онцгой байдлын албанд техник, тоног төхөөрөмж, багаж хэрэгсэл худалдан авах (Т-15-01)- 1.4 тэрбум төгрөг
5. 2020 онд- "СИП" утас нийлүүлэх (ЕТ-2013/01/08) -87 сая төгрөг
6. 2020 онд- Дэнжийн 1000-ын цахилгааны шугамыг чөлөөлөх шилжүүлэх ажил. /ЧД/ (НХААГ-13/0219)- 500 сая төгрөг
7. 2020 онд- Шинэ суурьшлын бүсийн дэд бүтцийн ажил (СБАОНӨГ/202007091)- 887 сая төгрөг
8. 2021 онд Сүхбаатар аймагт Хөл бөмбөгийн талбайгаас 4-р тойрог хүртэлх 1,1 км хатуу хучилттай авто зам дагасан гэрэлтүүлэг, явган зам талбай байгуулах төсөл- 200 сая төгрөгийн тендерт тус тус шалгарсан байна.  Өдгөө тус компанийн гүйцэтгэх захирлаар Б.Энхжаргал агсны хүү Э.Тэмүүжин бүртгэлтэй байна.

Түүнээс гадна Бүлтэнхүүгийн Мөнхбат нь Чингэлтэй дүүргийн ИТХ-ын төлөөлөгч Тогтохын Идэрцагаантай халаас нэгтэй хамтрагчид байж болзошгүй сэжим ч бий. Тодруулбал, Б.Мөнхбат нь автомашины завсар үйлчилгээ, худалдаа эрхэлдэг “Хүрдмонголиа” компанийг Тогтохын Идэрцагаантай хамтран үүсгэн байгуулсан байдаг. Улмаар тэд тус компаниа 2022 онд татан буулгажээ. Харин Б.Мөнхбатын дангаараа хариуцдаг "Хүрдэнтөмөр битон" компани нь барилгын материалын худалдаа эрхэлдэг. Мөн л "Хүрд" ХК-ийн охин компани юм.

Ийн Чингэлтэй дүүргийн удирдлагууд түмэн олнлл төлөөлж суухаасаа илүүтэй, төрийн тендер түүж, түмний боломжийг "хулгайлж" суугаа бололтой.