2021 оны нэгдүгээр сарын 01-ний өдрөөс энэ оны Төсвийн тухай хууль хэрэгжиж эхэлж байна. Мөн өнөөдрөөс эхлэн хэрэгжиж байгаа хууль, шийдвэрүүдээс онцлон танилцуулж байна. 

ХӨНГӨН ГЭМТ ХЭРЭГ ҮЙЛДСЭН ХҮМҮҮСТ ЦАХИМ ГАВ ЗҮҮХ ЯЛ ӨНӨӨДРӨӨС ХЭРЭГЖИЖ БАЙНА

Анх удаа хөнгөн гэмт хэрэг үйлдсэн тохиолдолд хорих ял биш зорчих эрхийг хязгаарлах ялаар шийтгэж цахим гав зүүлгэхээр болсон билээ. Эрүүгийн хуульд заасан уг заалт нь 2021 оны нэгдүгээр сарын 1-нээс буюу өнөөдрөөс хэрэгжиж эхэлж байна. Тухайлбал, хүний эрүүл мэндэд хөнгөн хохирол учруулах, хулгайлах, залилах, улсын хилээр барааг хууль бусаар нэвтрүүлэх, хууль бусаар мод бэлтгэх, алдуул мал, гээгдсэн хөрөнгө завших, хөдөлгөөний аюулгүй байдал ашиглалтын журам зөрчих гэх мэт хөнгөн гэмт хэрэг үйлдсэн хүнд дээрх ялыг оногдуулах юм. 

Энэхүү ял нь хэрэгт холбогдсон этгээдийн хувийн зан төлөв, үйлдсэн гэмт хэргийн нийгэмд учруулсан хор уршгийг харгалзан заавал хорих ял оноож нийгмээс тусгаарлахгүйгээр ажил хөдөлмөр эрхлэх, гэр бүл, үр хүүхдээ тэжээн тэтгэх үүргээ биелүүлэхийн зэрэгцээ сурч боловсрох эрхээ эдлэх, давтан гэмт хэрэг үйлдэх нөхцөлийг бууруулах зэрэг нийгэм, эдийн засгийн чухал ач холбогдолтой хэмээн албаныхан үзэж байгаа юм. Цахим бугуйвчийг хэрэглэснээр улсын төсөвт хорих ял эдлүүлэх зардлаас гурван тэрбум төгрөг хэмнэгдэх аж. 

АТГ-ЫН ДАРГЫГ ЕРӨНХИЙ САЙД САНАЛ БОЛГОЖ, УИХ ТОМИЛДОГ БОЛЛОО

Өчигдөр УИХ-ын чуулганы отгон хуралдаанаар Авлигын эсрэг хуульд нэмэлт өөрчлөлтөд оруулсан билээ. Ингэснээр уг хууль өнөөдрөөс эхлэн хэрэгжиж байна. Тус хуулийн өөрчлөлтөөр Авлигатай тэмцэх газрын даргыг Ерөнхий сайдын санал болгосноор УИХ томилгооны сонсгол хийж зургаан жилийн хугацаагаар томилдог болж буй юм. Мөн АТГ-ын дэд даргыг АТГ-ын даргын санал болгосноор УИХ зургаан жилийн хугацаагаар томилох юм байна.

ЭМД-ЫН САНГААС ЭМЧИЛГЭЭНИЙ БҮХ ЗАРДЛЫГ ДААХААР БОЛОВ

Эрүүл мэндийн даатгалын тухай хуульд орсон нэмэлт өөрчлөлтийн хүрээнд өнөөдрөөс эхлэн даатгуулагчид эрүүл мэндийн эрсдэл учирсан үед шаардлагатай тусламж, үйлчилгээний бүх зардлыг ЭМД-ын сангаас төлүүлэх боломж бүрдэж байна.  Өөрөөр хэлбэл, даатгуулагчид үзүүлэх эрүүл мэндийн тусламж, үйлчилгээний зардлын төлбөрийн дээд хязгаарыг 2021 оны нэгдүгээр сарын 1-нээс мөрдөхгүй болсон юм.

Одоогийн хүчин төгөлдөр хэрэгжиж байгаа хуулийн хүрээнд даатгуулагчийн эрүүл мэндийн тусламж, үйлчилгээний зардлын жилийн дээд хязгаарыг хоёр сая төгрөг байхаар тогтоосон. Гэхдээ энэ дээд хязгаарт өндөр өртөгтэй тусламж, үйлчилгээ, хорт хавдрын химийн болон туяаны өдрийн эмчилгээ, урьдчилан сэргийлэх үзлэг, оношилгоо, шинжилгээний зардал хамаарахгүй байхаар зохицуулсан байдаг.