Ардчилсан намынхан ашиг сонирхлоо дотроо нэгтгэж чадахгүй бол улс төрд өөдлөхгүй нь ээ, үнэндээ. Хаяанд ирсэн Ерөнхийлөгчийн сонгуульд эрх баригч намынхан аль хэзээнээс бэлдээд эхэлсэн атал Ардчилсан намынхан мөнөөх л сандал суудлын төлөөх хэрүүлээсээ салаагүй  явна. Энэ байдлаараа хоёрдогч хүчин гэгдэх Ардчилсан намын эрх баригчдын халаасны нам болоход ойрхон байна.  

       Ганцхан өдрийн өдрийн дотор АН-ынхан гурван өөр мэдээлэл хийж, олныг төөрөгдүүлж байгаагаас харахад тэдэнд нэгдсэн бодлого, нэгдсэн удирдлага гэж огтоос алга. Угтаа бол АН-ынхан өнөөдрийг хүртэл нам дотроо ярилцаж ойлголцолд хүрээгүй гэдгээ харуулж байгаа нь энэ.

         Үнэндээ өнгөрсөн сонгуулиар эрх баригчид өөрсдөө Үндсэн хуульд гар хүрч, гишүүдийн тоогоо нэмээгүй бол өдийд АН хамтарсан Засгийн газарт багтах нь битгий хэл харин  улс төрд хоёрдогч хүчин байх уу, үгүй юү гэдэг хэмжээний асуудал яригдахаар байв. Гэтэл “Тэнэг хүнийг тэнгэр ивээнэ” гэгчээр эрх баригчид Үндсэн хуульд өөрчлөлт оруулж, жагсаалтаар гишүүдийн тоог нэмснээр АН-ынхан арай гэж Их хуралд 48 суудалтай болсон. Харин хамтарсан Засгийн газарт багтсан нь тусдаа асуудал.

        Парламентад чамлахааргүй суудал авсан хэрнээ АН-ынхны улс төр дэндүү жижигхэн, тэр чинээгээрээ намынхаа нэрийг хөөтэй хутгаж байна. Үнэндээ Ардчилсан нам арай гэж олж авсан одоогийн байр сууриа хамгаалж, бэхжүүлэхийн оронд дотроо тэмцэлдэгчдээр дүүрч байгаагааг өчигдрийн хоёрхон жишээ харууллаа.

         УИХ дахь Ардчилсан намын бүлгийнхэн намын даргатайгаа ч ойлголцолд хүрэхгүйгээр өнгөрсөн хоёр чуулганы хуралдааныг дур мэдэн “тасалсан” юм уу даа. Тодруулбал, УИХ-ын гишүүн Ж.Баярмаагийн асуудлаар Ардчилсан намын бүлгийнхэн чуулганы хуралдаанаас завсарлага авсан. Ингэснээр хэлэлцэхээр товолсон хоёр чухал асуудал хойшилсон атал намын дарга Л.Гантөмөр нь “Хуулийн хүрээнд бүх ажил явах ёстой. Бид ажлаа хиймээр байна. Гадна, дотно нөхцөл байдал амаргүй байна. Нүүрсний үнэ 40 хувь унасан байна. Намрын ажлууд хүлээгдэж байна. Наанадаж ноолуурын экспортоо яах юм бэ. Энэ төлөвлөсөн ажлууд явах ёстой. Тэрнээс биш нэг асуудлыг нэг долоо хоног, хоёр долоо хоногийн хэрүүл болгоод явах ямар ч утга учиргүй” гэх зэргээр намынхнаа өмөөрөх нь битгий хэл зад загнасан мэдээлэл хийж, олны нүдийг орой дээр нь гаргав. Харин “Нэгдэх болтол асуудлаа ярилцана” гэж чуулганы хуралдаанаас завсарлага авсан АН-ынхан намын бүлгийн хурал дээрээ хоёр талцаж, маргаад ширүүхэн үзэлцсэн сурагтай.

        Ийн намын даргаа мэдээлэл хийсний дараа “Ерөнхий сайдаас уулчлалт гуйлгаж, нөгөө нь уучилсан” болж хэдэн өдөр хэрүүлийн алим тарьсан сэдвээ хааж санаа амарлаа.   Эндээс харахад анхнаасаа Ардчилсан намынхны акцлаад Төрийн ордныг “түйвээх шахсан” хэд хоногийн хэрүүл намын даргад нь падлий ч үгйү асуудал байж таарав. Нэг ёсондоо Ардчилсан намын нэр хүнд, УИХ-ын гишүүний халдашгүй байдал, тэгээд бүүр парламентын бүрэн эрхэнд халдлаа гэж Бүлгийн гишүүд нь сандралдаж гүйгээд гишүүнээ өмөөрч, төрийн ажлыг долоо хоног шахуу хойшлуулж орхисон бололтой.

        Тэр тусмаа Бүлгийн дарга О.Цогтгэрэл намын даргаасаа ч илүү ач холбогдол өгч, гүйсэн юм даг уу даа. Сүүлдээ намын даргаасаа урьтаж, Ж.Баярмаа гишүүнийг Ерөнхий сайдын өрөөнд “сугадаж” ороод гомдлыг нь тайлсан байж таарах нь. Ийн АН Төрийн ордонд шуудайдаад хийсэн үхрийн эвэр шиг харжигналдаж, дур дураараа дургицгааж байгаа нь илт байна. Намын дарга нь ч намынхнаа зангидаж, хаана нь улстөржиж, хаана нь хүлээцтэй байх вэ гэдгээ ярилцдаггүй юм байна.

       Төрийн ордны булан тохой болгонд тус тусдаа бүлэг фракц болчихоод төрийн ажлыг битгий хэл төрлөх намынхаа асуудлыг ч ярьж, нэгдсэн ойлголцолд хүрдэггүй нь тод харагдлаа АН-ынхнаас. Ерөөс нь энэ мэт жишээ дан ганцхан Ж.Баярмаа гэх ганцхан гишүүний асуудал дээр гарч байгаа юм биш. Өнгөрсөн өвөл Ерөнхий сайдыг огцруулна гээд Төрийн ордонд Ч.Лодойсамбууу гишүүн гарын үсэг зуруулж, ганцаараа баахан мэдээлэл хийхэд нь Ардчилсан намын гишүүд ард нь лав зогсож байгаагүй. Ганц үг ган хийлгүй чимээгүй сууцгаасаар асуудлыг намжаад галыг унтраасан юм даг.

      Ерөөс Ардчилсан намынхны амбиц ашиг сонирхол нь хувь хувь гишүүнд нь байгаагаас биш нам болж нэгдэж, бүл болж ойлголцож чадахгүй яваа нь энэ мэт цөөхөн хэдхэн жишээнээс илэрхий харагдаж байна.

       Эцэст нь, энэ мэтээр хувийн тоглолт, хийсээр Ардчилсан намынхны задрал Ерөнхийлөгчийн сонгуулийн өмнө туйлдаа хүрч, ахиад л суудлаа бэлэн тавьж өгөхөд тун ойрхон байна.