Цагтаа төрийн эрх барьж, хүчтэй сөрөг гэгдэж байсан Ардчилсан нам өнөөдөр лидер ч үгүй, толгой хорогдох байр ч үгүй, түрээсийн байр дамжсан  “халаасандаа тамга”-тай намаас нэг их ялгагдаад байх зүйлгүй л байна. Ямар сайндаа л нааш гэсэн рүү нь царай алдан гүйж, толгой хорогдож байх билээ.

        2016 сонгуулийн дараа С.Эрдэнэ намын даргаар сонгогдож, “Шонхор таур”-таа Ардчисан намыг дөвхнүүлж байлаа. С.Эрдэнэ намын даргаас буусны дараа тарж, бутарсан Ардчилсан нам тал нь “Шонхор таурт” тал нь “Бодь таур”-ын түрээслэн толгой хорогдож байсан удаатай. Тэгвэл ирэх сонгуулиар тэд намаа байртай болгох том зорилго тавьж, Ардчилсан намд дэвшихээр горилж буй толгой бизнесмэнүүд байр барьж өгнө гэх амлалт өгч эхэлсэн сурагтай. Ингэхдээ намынхаа нэр хүндийг нүүрсний гэх хэргээр унагаасан хэмээн УИХ-ын гишүүнээс чөлөөлөгдсөн “Ажнай” Д.Бат-Эрдэнэ УИХ-д дахин горилж АН-аас нэр дэвшихээр амлалт өгөөд байгаа гэнэ. Нөгөө нь Ардчилсан намын гишүүнчлэлээс татгалзаж, Ж.Батзандантай хамтран ШИНЭН-ыг байгуулсан Лу.Болд намдаа элсэх хүсэлт удаа дараа тавьж, Ажнайтай хамтарч байр барьж өгнө хэмээн ам тангаргаа өгөөд байгааг баттай эх сурвалжууд мэдээлж байна.

          УИХ-ын гишүүн Д.Бат-Эрдэнийг 2012-2016 оны хооронд УИХ-ын гишүүнээр ажиллаж байхдаа “Таван толгой” ХК-ны ТУЗ-ийн дарга Б.Түвшинбаяр, гүйцэтгэх захирал Р.Сэддорж нарт хууль бусаар нөлөөлсний улмаас 323,900 тонн нүүрсийг өр төлбөрт авсан мэтээр хуурамч бичиг баримт бүрдүүлэн “Таван толгой” ХК, “Тавантолгой транс” ХК-иудын хувьцаа эзэмшиж байсан албан тушаалын байдлаа ашиглаж “Тавантолгой” ХК-д 18,478,856,284 төгрөгийн хохирол учруулан хөрөнгө завшихыг удирдан зохион байгуулсан хэрэгт нь Эрүүгийн хуулийн тусгай ангийн 17.4 дүгээр зүйлийн 2 дахь хэсгийн 2.1, 2.2 дахь / Хөрөнгө завших/ заалтад зааснаар эрүүгийн хэрэг үүсгэн яллагдагчаар татан мөрдөн шалгах ажиллагаа явуулж эхэлсэн байна. Түүнчлэн Д.Бат-Эрдэнэт таслан сэргийлэх арга хэмжээ авч, хилийн хориг тавьсан гэдгийг хуулийн байгууллагаас албан ёсоор мэдэгдэж байлаа.

    Ардчилсан нам фракцын зодооноосоо хамгийн их хохирч үлдсэн нэг асуудлын нэг нь яалт ч үгүй байр. Угтаа бол үе үеийн лидерүүд, удирдлагууд нь Ардчилсан намын гэх нэр дээрх өмч хөрөнгий хувьдаа “завшиж” хувааж идсэн гэх асуудлаар хоорондоо түжин хагарч, намаа тарж бутархад хүргэсэн гэдэгтэй санал нийлэх хүн олон биз. Угтаа бол Ардчилсан намын байрны түүх их адармаартай. 1990 онд Ардчилсан холбоог анх байгуулахад гурван холбоонд улсаас том байр гаргаж өгснөөр үйл ажиллагаа явуулах боломжтой болсон гэдэг.

        Угтаа бол МоАX-нд өдгөөгийн 11 дүгээр хороололд байдаг xуучин Соёлын яамны байрыг, АСX-нд СТӨ-ний дунд байрлах “Хүзүүвч” гэгдэх байрыг, МҮДН Төв шуудангийн урдаx хоёр давхар байрыг тус гаргаж өгснөөр Ардчилсан холбоо толгой хорогдох газартай үйл ажиллагаагаа явуулах боломжтой болсон гэсэн үг. Үүнээс хойш 2008 онд Н.Алтанхуягийн үед Ардчилсан нам шинэ байртай болохоор хандив хүртэл цуглуулж, тухайн үед намынхаа үйл ажиллагааг тогтмол явуулж байсан СТӨ-ний “Хүзүүвч” гэгдэх байраа нурааснаар толгой хорогдох байргүй болсон  гэгддэг. Улмаар Ардчилсан намыг байргүй болгосон, намдаа их хэмжээний хохирол учруулсан хэмээн Н.Алтанхуягийг намын гишүүнчлэлээс нь хасах хүртэл шийдвэр гаргаж байлаа. Ийн намаасаа хөөгдсөн Н.Алтанхуяг 2020 онд Орхон аймагт бие даан нэр дэвшиж, УИХ-ын гишүүн болж байлаа.

      Харин МоАХ-ын болон Төв шуудангийн урд байх байрууд хэдийнээ хувь хүний эзэмшилд шилжсэн гэх яриа ч бий. Тодруулбал, МоАХ-ны үйл ажиллагаа явуулж байгаа Ардчилалын ордонгэх байр Ерөнхийлөгч асан Х.Баттулгын, Зоригийн хөшөөний урд буюу Төв шуудангийн урд байрлах байр Голомт банкны эзэн Д.Бясгалангийн эзэмшилд шилжсэн гэх баримтууд ч гарч байв. Ийн Ардчилсан намынхан байраа хувааж авснаар өнөөдөр тус нам бүрэн бүрэлдэхүүнээрээ хуралдах байргүй, түрээсийн байранд толгой хорогдож байна.

         Ийн “Ажнай”  Д.Бат-Эрдэнэ, Лу.Болд нар АН-ыг байртай болгох амлалтаар нэр дэвших эрх өвөртлөхөөр тохирсон гэв үү.