ЭРГЭЛТИЙН ТОЙМ: Чөлөөтийн барилдаануудтай, олимпын медальтнуудаа угтаж авсан, Ерөнхийлөгчийн уучлалтай ДОЛОО ХОНОГ

Б. Цогтбаяр:
Улс төр- Тоймчийн үг

2021-08-07, 869

ЭРГЭЛТ.МН мэдээллийн сайт долоо хоног бүр улс төр, нийгэм, эдийн засаг, соёл урлаг, дэлхий дахинд болж өнгөрсөн онцлох үйл явдлыг тоймлон хүргэдэг билээ. Тэгвэл өнгөрөгч долоо хоногт "Токио-2020" зуны олимпын наадмын чөлөөт бөхийн төрөлд монголын шигшээ багийн тамирчид хүчээ сорилоо, МУГТ, дэлхийн хүрэл медальт М.Анхцэцэг дөрөвдүгээр байрт шалгарч, олимдын наадмыг өндөрлүүллээ, "Токио-2020" зуны олимпын жүдо бөхийн анхны медальтнууд эх орондоо ирлээ, цахим орчинд дуулиан тариад буй цагдаа нарын бичлэгийн асуудлаар салбарын сайд нь мэдэгдэл хийлээ, Ерөнхийлөгч У.Хүрэлсүх Ерөнхий сайд асан М.Энхсайханд уучлал үзүүлэхээр боллоо. Эдгээр үйл явдлыг Эргэлт.мн мэдээллийн сайт онцолж байна.

Монгол охид дэлхийн дэвжээнд хүч үзэв

Монгол Улсын гавьяат тамирчин, олимпын наадмын хүрэл медальт, дэлхийн хошой аварга С.Батцэцэг өнгөрсөн даваа гарагт 32 дахь удаагийн “Токио-2020” зуны олимпын наадмын чөлөөт бөхийн эмэгтэйчүүдийн 68 килограммын жинд хүч сорьсон. Тэрбээр эхний барилдаанаа Францын тамирчин Кумба Ларрокийн эсрэг хийж, 4:3 харьцаатайгаар цэвэр ялалт байгуулсан. Улмаар шөвгийн наймын барилдаанд ОХУ-ын бөх Ханум Вальеватай таарч, 8:5 харьцаатайгаар ялалт байгуулж, шөвгийн дөрөвт шалгарсан. Хүрэл медалийн төлөөх барилдаанд Азийн наадмын мөнгөн медальт Кыргызстаны М.Жуманазароватай оноолт таарч, 10:1 онооны харьцаагаар ялагдсан. Тэрбээр барилдааны эхний үед торгуулийн нэг оноо авсан ч хоёрдугаар үед Кыргызстаны бөх 10 оноо авч барилдааны цаг дуусахаас 54 секунд дутуу байхад цэвэр даралтад орж ялагдал хүлээсэн. Ингэснээр тэрбээр энэ удаагийн олимпын наадмыг тавдугаар байранд орсноор өндөрлүүлсэн юм.

32 дахь удаагийн “Токио-2020” зуны олимпын хүндийг өргөлтийн төрлийн эмэгтэйчүүдийн -87 килограмм жинд МУГТ, дэлхийн хүрэл медальт М.Анхцэцэг Монгол улсаа төлөөлөн оролцсон. Тэрбээр түлхэлттэй өргөлтийн дараах нийлбэр дүнгээр 252 килограммыг өргөж, дөрөвдүгээр байрт шалгарч, тэмцээнээ өндөрлүүлсэн. ОУХМ М.Анхцэцэг сүүлчийн оролдлогоороо хүрэл медалийн төлөө 147 килограммыг захиалсан ч өргөж чадаагүй юм. Тэрбээр тэмцээний дараа монголчууддаа хандан “Дараагийн олимпоос заавал алтан медаль авч, монголчуудаа баярлуулна” хэмээн билээ.

“Токио-2020” зуны олимпын чөлөөт бөхийн эмэгтэйчүүдийн -62 кг жинд зодоглосон ОУХМ Х.Болортуяа эхний барилдаанаа Энэтхэгийн тамирчин 19 настай Сонам Сонамтай хийж, 2:2 харьцаагаар тэнцсэн ч, бүхэл оноогоор ялж шөвгийн наймд шалгарсан. Эхний үед хоёр тамирчин харилцан хамгаалсан барилдаан хийсэн бөгөөд Сонам манай тамирчныг дэвжээнээс түлхэн гаргаж, нэг оноо авсан. Харин хоёрдугаар үед манай тамирчин ард нь гарч, хоёр оноо авснаар тэргүүлж эхэлсэн бөгөөд бүхэл оноотойгоор ялсан юм. Гэвч шөвгийн наймд дэлхийн аварга, Европын хошой аварга Болгарын бөх Мустафа Тайбе Юсейнд 10:0 харьцаатайгаар ялагдал хүлээж, олимпын наадмыг өндөрлүүлсэн.

Монгол Улсаа төлөөлж, олимпын чөлөөт бөхийн эмэгтэйчүүдийн -57 килограмм жинд өрсөлдсөн ОУХМ Б.Хонгорзул тавдугаар байрт шалгарч, олимпын наадмыг өндөрлүүлсэн. Тэрбээр дагах барилдаанаа Гвинейн бөх Фатүмата Камаратай хийж, 10:0 харьцаатайгаар ялж, олимпын хүрэл медалийн төлөө өрсөлдөхөөр болсон. Гэвч хүрэл медалийн төлөө Риогийн олимпын аварга, дэлхийн хошой аварга, АНУ-ын тамирчин Хелен Луйз Марулистай барилдаж, ялагдал хүлээснээр тавдугаар байрт шалгарсан юм.

“Токио-2020” зуны олимпын анхны медальтнууд эх орондоо ирлээ

Өнгөрсөн лхагва гарагийн 23:00 цагт Токио-Улаанбаатар чиглэлийн нислэгээр “Токио-2020” зуны олимпын наадамд оролцсон зарим тамирчид эх орондоо ирсэн. Манай улс “Токио-2020” зуны олимпын жүдо бөхийн төрөлд хоёр хүрэл, нэг мөнгөн медаль хүртээд буй билээ. Дэлхийн олимпод эх орныхоо нэрийг дуурьсгаж, төрийн далбаагаа мандуулсан тэднийг Монголын үндэсний олимпын хороо, Монголын жүдо бөхийн холбооны төлөөлөл болон гэр бүл, найз нөхөд, жүдо бөх сонирхогчид хүлээн авч, баяр хүргэсэн юм.

Энэ үеэр “Токио-2020” зуны олимпын жүдо бөхийн -73 килограмм жинд Монгол Улсаа төлөөлөн оролцож, хүрэл медалийн эзэн болсон ОУХМ Ц.Цогтбаатар сэтгэгдлээ хуваалцсан юм. Тэрбээр “Цаг ямагт тусалж, дэмжиж байсан багш, Сүлд спорт хороо, Ус сувгийн удирдах газар, “Наран мандал” компанийн хамт олондоо баярлалаа. Мөн хайрт ээж, хань, ах,эгч нартаа маш их талархаж буйгаа илэрхийлмээр байна. Оно Шохейг ялах боломжтой байсан. Дараагийн тэмцээнд ялах болно. Ирэх 2024 оны олимпоор медалийн өнгөө өөрчилж, та бүхнийгээ олон жил баярлуулах болно” хэмээсэн.

Түүнчлэн “Токио-2020” зуны олимпын наадмын мөнгөн медальт, дэлхийн аварга, Монгол Улсын тамирчин Саид Моллайн сэтгэгдлээ хуваалцсан. Тэрбээр “Олимпын наадам үнэхээр сайхан болж өнгөрлөө. Маш их баяртай байна. Энэ цугласан хүмүүс бүгдээрээ баяртай байгаа байх гэж бодож байна. Учир нь энэ олимпын мөнгөн медаль Монголынх. Бас миний анхны олимпын медаль болсон. Би олимпоос мөнгөн медаль авсныгаа монголчуудад барьж чадах хамгийн том бэлэг гэж бодож байна. Би одоог хүртэл “Монголын Саид Моллай” гэж дуудсанд маш их баярлаж байна. Өмнө нь би Ираны төлөө барилдаж байсан бол одоо Монгол Улсын төлөө барилдаж байна. Учир нь би одоо Монгол хүн болсон шүү дээ. Би өмнөх амьдралаа мартсан. Надад одоо байгаа нь л чухал. Надад тусалж, дэмжиж байсан бүх хүнд баярлалаа гэж хэлмээр байна. Багш маань, Монголын залуу үеийнхэн намайг дэмжиж байсан нь надад маш их тусалсан. Хэрэв гэр бүлийнхэн маань Монголд ирвэл би үнэхээр аз жаргалтай байх болно” хэмээсэн.

Мөн “Токио-2020” зуны олимпын жүдо бөхийн эмэгтэйчүүдийн -48 кг жинд барилдаж, эх орондоо анхны хүрэл медалийг авчирсан МУГТ М.Уранцэцэг "Медаль авахад миний баг хамт олон маш их тусалсан. Гурав дахь олимпдоо ороод анхны медалиа авч байна. Аав ээж, ах дүү, хамаатан садан, найз нөхөд, Хүч спорт хорооныхондоо маш их баярлалаа. Энэ медалийг авахын төлөө 16 жил хичээсэн, маш их баяртай байна" хэмээсэн.

Х.НЯМБААТАР: Цагдаагийн албан хаагчид зодуулсан иргэд сүүлийн хоёр жил зургаан сая төгрөг авсан нь тогтоогдсон

Цагдаагийн алба хаагчид цэнгээний газарт иргэдийг зодож буй бичлэгээс үүдэлтэй дуулиан өнгөрөгч долоо хоногт ч үргэлжиллээ. Уг асуудал эцэстээ салбарын сайдынх нь анхааралд хүртэл орж, өнгөрсөн баасан гарагт Х.Нямбаатар биечлэн тайлбар хийсэн юм. Ингэхдээ цагдаа нарт зодуулсан иргэд хяналтын камерын бичлэгээр шалтаглан цагдаа нараас зургаан сая төгрөг авсан гэх мэдэгдэл хийсэн юм.

Цагдаагийн алба хаагчид иргэний биед халдаж, зодож буй бичлэг өнгөрсөн сарын 29-ны 21:00 цагийн орчимд цахим орчинд цацагдаж, иргэдийн бухимдлыг төрүүлсэн. Уг бичлэг дээрх үйл явдал нь 2019 оны хоёрдугаар сарын 25-ны 03:00 цагийн орчимд Чингэлтэй дүүргийн III хорооны нутаг дэвсгэрт байрлах нэгэн цэнгээний газарт болсон гэдгийг ЦЕГ-ын Аюулгүй байдал, дотоод хяналт шалгалтын хэлтсээс мэдэгдсэн бөгөөд бичлэгт гарсан цагдаагийн албан хаагчдыг ажлаас нь чөлөөлсөн. Түүнчлэн Нийслэлийн прокурорын газраас хэрэг бүртгэлийн хэрэг нээж, харьяаллын дагуу АТГ-т шилжүүлэн шалгаж байгаа. Хоёр жилийн болсон энэ хэргийг тухайн үед яагаад хэн ч мэдэлгүй өнгөрсөн, зодсон цагдаа нар, зодуулсан иргэд хоорондоо үгсэн хуйвалдаж, харилцан тохиролцсон эсэх талаар үргэлжүүлэн шалгаж буй юм.

Тэгвэл энэ хэргийн талаар Хууль зүй, дотоод хэргийн сайд Х.Нямбаатар “Тухайн үед цагдаагийн байгууллагад “Чингэлтэй дүүргийн III хороо, Улаанбаатар их дэлгүүрийн ард байрлах цэнгээний газраас нэр бүхий иргэд төлбөр тооцоо хийхгүй маргаан үүсгэж байна” гэх дуудлага бүртгэгдсэн. Энэ дагуу эргүүлийн албан хаагчид ажилласан. Тухайн хэргийн талаар нэмж, шалгаж тодруулахад дуудлагаар очсон алба хаагчийг нэг иргэн нь сандлаар цохисон. Улмаар цагдаагийн алба хаагчид тухайн иргэдтэй зүй бусаар харьцах процесс өрнөсөн байна. Тухайн хоёр иргэний гэр бүл энэхүү бичлэгийн олон нийтэд дэлгэнэ гэж алба хаагчдыг сүрдүүлж, сүүлийн хоёр жил зургаан сая төгрөг авсан нь тогтоогдсон” гэсэн юм.

Ерөнхийлөгч У.Хүрэлсүх Ерөнхий сайд асан М.Энхсайханд уучлал үзүүлж, суллахаар боллоо

Монгол Улсын 18 дахь Ерөнхий сайд М.Энхсайханд Ерөнхийлөгч У.Хүрэлсүх уучлал үзүүлж, суллахаар болсон мэдээлэл өнгөрөгч долоо хоногийн улс төрийн хүрээний нэг чухал үйл явдал байлаа.

Тэрбээр “Таван толгой”-н нүүрсний ордын төслийн нэгжийг удирдаж байхдаа эрх мэдэл, албан тушаалаа урвуулан ашигласан, хөрөнгө оруулагч талд ашигтай байдал бий болгосон, энэ үйлдлээрээ хүн амын амьдралыг хангах үйл ажиллагааг доголдуулж, хорлон сүйтгэхийг завдсан гэж буруутгагдсан. Мөн шүүхээс түүнийг Эрчим Хүчний яамны харьяа Тавантолгой цахилгаан станц төслийн нэгжийн захирлаар ажиллаж байхдаа 75 сая төгрөгийн үнэлгээтэй автомашиныг 130 саяар худалдан авч, улсад 55 сая төгрөгийн хохирол учруулсан гэж дөрвөн жилийн хорих ялаар ялласан байдаг.

Тэгвэл Ерөнхийлөгч У.Хүрэлсүх түүнд уучлал үзүүлснээр хорих ялаасаа бүр мөсөн чөлөөлөгдөхөөр болж байна. Энэ талаар бид өнгөрөгч пүрэв гарагт М.Энхсайханы өмгөөлөгч Д.Оросоогоос тодруулахад "Надад одоогоор албан ёсны мэдэгдэл ирээгүй байна. Гэхдээ би М.Энхсайханд уучлал үзүүлэх тухай хүсэлт Ерөнхийлөгчид гаргасан" гэсэн юм.

Өмнө нь буюу тав дахь Ерөнхийлөгч Х.Баттулга бүрэн эрхийн хугацаагаа дуусахын өмнө Ерөнхий сайд асан М.Энхсайхан уучлал үзүүлэх санал гаргасан ч тэрбээр хүлээж аваагүй билээ.

ЭРГЭЛТИЙН ТОЙМ: Чөлөөтийн барилдаануудтай, олимпын медальтнуудаа угтаж авсан, Ерөнхийлөгчийн уучлалтай ДОЛОО ХОНОГ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.