Эрүүл мэндийн яамнаас коронавирусийн нөхцөл байдлын талаар мэдээлэл хийж байна. Өчигдрийн 11:00 цагийн байдлаар нэг хүнээс коронавирусийн халдвар илэрч, батлагдсан тохиолдол 918 болсон юм. Тодруулбал, Сэлэнгэ аймагт тусгаарлалтад байсан иргэнээс халдвар илэрсэн. Харин бусад голомттой аймаг болон нийслэлд халдвар илрээгүй. 

Өнөөдрийн нөхцөл байдлын талаар ХӨСҮТ-ийн Тандалт судалгааны албаны дарга А.Амбасэлмаа "ХӨСҮТ, ЗӨСҮТ, Дархан, Сэлэнгэ, Орхон, Дорнод аймагт нийт 10599 шинжилгээ хийхэд таван хүнээс халдвар илэрлээ. Халдвар илэрсэн таван хүний гурав нь Улаанбаатар хотын халдварын ойрын хавьтлуудаас илэрсэн. Харин Баянзүрх дүүргийн Нэгдсэн эмнэлэгт эмчлүүлж байсан хоёр хүнээс халдвар илэрлээ. Тус хоёр хүн нь эмнэлэгт хэвтэхдээ шинжилгээ өгөхөд сөрөг гарсан байсан. Нууц үедээ буюу 4-5 хоногийн дараа шинжилгээ өгөхөд халдвар илэрлээ. Цар тахлын үед эх үүсвэр нь тодорхойгүй халдвар алаг цог илэрдэг. Өчигдрийн 18:00 цагаас хойш ажиллаж, шинээр халдвар илэрсэн хоёр хүний ойрын хавьтал болох 69 хүнийг тусгаарлаж, шинжилгээ авсан. Халдвар илрээгүй" гэлээ. Мөн тэрбээр "Нийт дотоодын халдвар 470 боллоо" гэв.