Олон улсын эрх зүйн хөгжлийн байгууллага (IDLO)-ын Байнгын хорооны хурал 2026 оны долдугаар сарын 28-ны өдөр Ром хотноо зохион байгуулагдаж хурлыг Элчин сайд, Байнгын төлөөлөгч Д.Булган даргалав. Тус байгууллагын ерөнхий захирал хатагтай Жан Бийгл байгууллагын 2026 оны хоёрдугаар улирлын үйл ажиллагааны болон санхүүгийн тайланг тус тус танилцуулж, Байнгын хорооны гишүүн орнууд санал, дүгнэлтээ илэрхийлэв.

    ОУЭХБ-аас Монгол Улсад хамтран хэрэгжүүлж буй “Хүүхэд, өсвөр насны хүний эрхийг цахим орчинд хамгаалах, урьдчилан сэргийлэх болон эрх зүйн мэдлэгийг нэмэгдүүлэх нь”, “Монгол Улсад жендерт суурилсан хүчирхийлэлтэй тэмцэх тогтолцоог бэхжүүлэх”, “Шүүх эрх мэдлийн байгууллагын хамтын ажиллагаа ба ил тод байдал” төсөл амжилттай хэрэгжиж, тодорхой үр дүн гарсныг ерөнхий захирал илтгэлдээ онцлов. Олон улсын эрх зүйн хөгжлийн байгууллага нь дэлхий дахинаа тогтвортой хөгжил, хүний эрхийг хангахад хууль дээдлэх ёсыг бэхжүүлэх, хууль эрх зүйн чадавхыг сайжруулах чиглэлээр үйл ажиллагаа явуулдаг засгийн газар хоорондын олон улсын байгууллага юм. Монгол Улс тус байгууллагын Оролцогч талуудын Ассамблейн Дэд Ерөнхийлөгч, Байнгын хорооны гишүүнээр 2023 оны 11 дүгээр сараас эхлэн амжилттай ажиллаж байна.

   2026 оны наймдугаар сарын 17-28-ны өдрүүдэд Улаанбаатар хотноо болох Цөлжилттэй тэмцэх тухай НҮБ-ын конвенцын Талуудын 17 дугаар бага хурлын хүрээнд ОУЭХБ-ын зүгээс “Малчин өрхийн эрх зүйн орчин” сэдвээр зарим арга хэмжээг зохион байгуулахаар ажиллаж байна.  Энэ удаагийн хуралд Байнгын хорооны гишүүн Монгол, Итали, Филиппин, Египет, Гондурас, Кувейт зэрэг орны төлөөлөгчид, тус байгууллагын Нарийн бичгийн дарга нарын газар, хэлтсийн удирдлагууд биечлэн оролцож, Удирдах зөвлөлийн дарга, Боловсон хүчний нийгэмлэгийн Ерөнхийлөгч нар тус тус цахимаар оролцов.